Revelación

19 Maʉ̃ tẽã mʉ̃a ũrĩsi ʉ̃tʉ bajãne nemi jĩga bioʉba jarapanʉta, ãya jarapanasi: «Yiwidʼidua Jeowaʼa, ẽdrʉita, nebia zromata akʉza zareata Daizezede, 2 iya sãwũã obʉra wãrĩnu baera akʉza aripe bʉ baera, iya beasi baera wẽrã jipa odebemara, naʉ̃ drʉa kayirua obisi baera mia erkʼãĩneba akʉza zʉbʉriabisi iyi nezokʼarata zʉbʉria osi baera». 3 Aramaʉ̃ta jẽda jarasida: «¡Yiwidʼidʉa Jeowaʼa! Ewari jõmaʉ̃ne iyi koʉgara ʉ̃ta wãñi». 11 Ũdusi mʉ̃a bajã ewaranʉmʉta; maʉ̃ne ʉ̃tʉ deguesi kabayo totorroa chuta. Yi ʉ̃rʉ jirabʉ trʉ̃ra Kʼẽrẽpabʉ akʉza Wãrĩnu, aripe obʉ adewara kʼẽrẽpa yõbʉ. 12 Iyi Dabʉra pʉreabʉ kĩrãkʼabʉ, mõbe iyi burude mejãchabʉ koronata, iyabaʉ erbʉ trʉ̃ta miõba kʼawuada ẽãta iyabʉrʉ ũdukʼawuabʉ. 13 Iyara jʉ̃bʉ wua waba barachuta, mõbe naʉ̃ trʉ̃ta jarapanʉ: Bedʼea Daizezedebema. 14 Adewara gorogorora ʉ̃tʉbemarãra iyi kʼaidu teibasida, ãyira lino biaba wua jʉ̃basi totorroabʉba akʉza jaigʉa ẽãbʉba. 15 Iyi iedaʉba ʉ̃tʉdegueba kucho drazoachuta akʉza pepedeachuta maʉ̃ba yõita pʉwʉrʉrabawara, mõbe jiorro drazoabʉba jʉre edeyi adewara iya uba birachibʉ kĩrãkʼa abarikʼa birachiyi maʉ̃ra jõma Daizeze yõi ewaride. 16 Akʉza iyi wuade bakara kʼawa, naʉ̃ trʉ̃ra bʉabʉ: Nokʼora Nokʼo akʉza yibarira Yibari. 17 Akʉza ũdusi mʉ̃a angel aba bisia kĩrãbita edaʉnʉmʉta, nemi jĩgʉa jarasi iya jõma ibanara wãbaribeʼa: «Zeidua nama, ãba yijʉreidua Daizezeba diada yikota kodamarẽã. 18 Koidua nokʼora chichita, yõbarira nokʼoraneta akʉza yumakẽrãra zarea barabʉraneta, koidua kabayora chichita akʉza iyi ʉ̃rʉ jirabʉranesida, jõmaʉ̃ra chichita koidua nezokʼara ẽãneta akʉza nezokʼaraneta, wĩkaderaneta akʉza yizromaraneta». 19 Ũdusi nedʉwʉrʉ mẽsiata, adewara nokʼora drʉadebemata akʉza ãyi gorogororata, ãyi jõma ãba yi jʉrepanasi yõita yi kabayo ʉ̃rʉ jirabʉme akʉza iyi gorogorobawara. 20 Nedʉwʉrʉ mẽsiara jidasida akʉza propeta pãta, naʉ̃ propeta pãbara nekʼãrẽ mejãcha osi nedʉwʉrʉ mẽsia nãã, maʉ̃ra osi nedʉwʉrʉ mẽsia marka abʉra sewaita akʉza yi nedʉwʉrʉ parãnaʼa yiwidʼidara sewaita. Ãyi ũmena waidide zokʼaipanʉena doi balbʉesida do azufreda pʉreabʉma. 21 Mamina yi kabayo ʉ̃rʉ jirabʉ yedaʉba espadata ʉ̃tʉ zebasi, maʉ̃ba makenasi yi wuabemarata. Akʉza ibanara jõmaʉ̃ta jãwũãsida ãyi yaraba.