Éxodo
16 Elimneba wãna tẽã Israel pʉwʉrʉ jõma jʉ̃ẽsida Sin drʉa ibʉawabʉmae, maʉ̃ra basi Elim akʉza Sinaí ẽzadra. Egiptodeba ẽdrʉdata jedeko ũme babʉrʉde ewari 15de mama jʉ̃ẽsi 2 Jõma Israel pʉwʉrʉra drʉa ibʉawabʉdera i kayirua bed’easida Moisés ʉ̃rʉ akʉza Aarón ʉ̃rʉ. 3 Israelitaraba jarapanasi: «Daira Jeowaba beaibarabasi Egiptode. Mama pana k’awa jeweda k’ãrãpe chichi kopanasi jãwãñiena. Mamina marabara daira nama wesi drʉa ibʉawabʉma pʉwʉrʉ jõma beimarẽã jarrababa». 4 Aramaʉ̃ta Jeowaba jarasi Moisés’a: «Bajãneba kue zebari kĩrãk’a bajãneba panta zebiya jõma pʉwʉrʉba jʉrepeyi maya koibitabai, mʉ̃a mawũã k’awuayi maraba mʉ̃a ley diabʉta ũrĩbʉta mawũã ẽ bʉrʉ ũrĩ ẽãta. 5 Ewari 6dera maraba ewariza jʉrepepanʉ audre jʉrepedayi». 6 Moisésba Aarón’ʉ̃meba jarasida israelitara jõmaʉ̃’a: «Kewarare maraba k’awuayi Jeowaba ẽdrʉbisita Egipto drʉadeba. 7 Diapeda maraba ũduyi Jeowaba oita miõba okata, Jeowaba ũrĩsi baera iyi ʉ̃rʉ bed’ea barabʉta. ¿K’ai daira marata dai ʉ̃rʉ imitia bed’eamarẽãra?». 8 Akʉza Moisésba jarasi: «Jeowaba kewarare chichi diabʉrʉde akʉza diapeda pan diabʉrʉde mara maʉ̃ba jãwãbidade maraba k’awuayi Jeowaba ũrĩbʉrʉta marara iyi ʉ̃rʉ imitia bed’eabʉta. ¿K’ai daira? Marara dai ʉ̃rʉ imitia bed’eanʉmʉ ẽ. Awuarabʉrʉ Jeowa ʉ̃rʉ imitia bed’eanʉmʉ». 9 Moisésba jarasi Aarón’a: «Jarada pʉwʉrʉ jõma Israel’ra: Jeowa nãã zedamarẽã iya ũrĩbʉrʉ iyi ʉ̃rʉ imitia bed’eabarabʉta». 10 Aarón Israel pʉwʉrʉ’a bed’ea berabaridogode Israelitarabara jẽda akʉsida drʉa ibʉawabʉma mama ũdusida Jeowaba yãrãba okata oũdubisi bajãne. 11 Jeowaba jarasi Moisés’a: 12 «Mʉ̃a ũrĩsi israelitaraba imitia bed’eabarabʉra. Jarada: Kibʉsiare chichita kodayi, diapeda panta kodayi ãyi jãwãñiena. Mawũã ãya k’awuayi mʉ̃ra Jeowa ãyi Daizezeta». 13 Kewarare ãyi bʉmae mejãcha zezi zuerrurata maʉ̃ba biranʉmesi maʉ̃ nrʉemane ãyi bʉmae audubasi kue jinokamata. 14 Naʉ̃ kue jinokamata põasãsidera drʉa ibʉawabʉdebasi naʉ̃cha torroabʉta uruya bai kideabayi. 15 Israelitabara k’awua ẽ basi naʉ̃ra k’ãrẽta maʉ̃ k’area ãya widisida: «¿K’ãrẽ naʉ̃ra?» Moisésba jarasi: «Naʉ̃ra pan Jeowaba diasi maraba komarẽã. 16 Naʉ̃ta zok’asi Jeowaba mara aba abakaʉba jʉrepemarẽã maya koibitabai, ẽbẽra mara de karpa edrebʉbara jidaibara omer aba». 17 Maʉ̃ta osida israelitarabara. Ʉ̃kʉrʉba arabia jʉrepesida ʉ̃kʉrʉbara wiña jʉrepesida. 18 Mamina omerba zapanasidera yi ẽbẽra ʉ̃ta jʉrepedabara ʉ̃ta erba ẽ basi akʉza eda jʉrepedabara eda erba ẽ basi. Aba abakaʉba jʉrepesi ãya koibitabai. 32 Aramaʉ̃ta Moisésba jarasi: «Naʉ̃ta Jeowaba zok’abʉrʉa: Jidara omer aba manata mõbe wuagara maraneba ʉ̃rabʉrʉ zeiraita akʉdamarẽã mʉ̃a sãwũã pan kobisita drʉa ibʉawabʉde Egiptodeba ẽdrʉbida tẽã». 33 Moisésba jarasi Aarón’a: «Kʉgʉrʉ aba jidara omer aba manaba biramarẽã mõbe Jeowa nããbʉra bʉdeba zebʉraita». 34 Jeowaba Moisés’a zok’ada kĩrãk’a Aarónbara Testimonio nãã bʉsi wuagaita.