Efesios

4 Mawũẽra mʉ̃ karseldebʉba Jesu kʼarea, soiduba widibʉ maraba ũdubimarẽã kʼẽrẽpabʉta, marara trʉ̃sida baera ʉ̃ta wãita: 2 Ʉ̃tabʉta krĩcharãra akʉza urumʉ̃rʉãbara, jʉ̃ãbara adewara awuantaidua mayirai kãgaba, 3 nek’ãrẽ jõma oidua ãba b’aita, Daizeze jaure zarea’a yi edebibʉde aduʼa ãbabʉta ãrĩ ẽ marẽã. 4 Kakua ababʉa akʉza jaure ababʉa, marãra trʉ̃sida nebia aba zei jʉ̃ãmarẽã. 5 Señor aba, ĩjã aba , buru k’oema aba. 6 Daizeze abapaibʉ akʉza jõmaʉ̃ra Zeze, jõmaʉ̃ra buru, jõmaʉ̃neba obʉ akʉza jõmaʉ̃nẽ. 7 Jesúsba dayirã aba abakaʉa iyi areba diasi nebiata oita erpanamarẽã. 8 Daizeze Bedʼeaba jarabʉ baera: «Iyi ʉ̃ta wãside jidasi yumakẽrãrata kongregasionʼa nebia kĩrãkʼa diaita». 11 Jidasi ʉ̃kʉrʉta apostolera bʼaita, ʉ̃kʉrʉta propeta bʼaita, ʉ̃kʉrʉta bedʼea bia jaradiabarira bʼaita, ʉ̃kʉrʉta jidasi pastor bʼaita akʉza ne jaradiabari bʼaita. 12 Mawũã jidasi neneẽã panʉra ara jaradiaita, biʼia jaradiadamarẽã akʉza Kristo kakuata zarea erpanamarẽã 13 mawũã abarika ĩjãnamarẽã akʉza biʼia kʼawuadamarẽã Daizeze warra ʉ̃rʉ, mawũãtrʉ Daizeze Bedʼeadebema sãwũã oita kʼawuadamarẽã, mawũã Krĩsto kĩrãkʼa panamarẽã. 14 Mawũẽra wũãwũã zake kĩrãkʼa pana ẽ baibara, do imatʉ imatʉbariba mawũã ẽ bʉrʉ pʉadrʉba nekʼãrẽ ya edebʉ kĩrãkʼa, ẽbẽrarã nekʼãrẽ sewida jaradia kaʉʼa yi edebida ẽ baibara. 15 Awuarabʉrʉ wãrĩnuta bed’eaidua, kãgata wari wãbibara nekʼãrẽ badude Cristo kĩrãk’a bʼaita, iyira dayirã buru baera. 16 Kristobʉrʉ jõma ãba babibʉ iya k’arebabʉ baera, aba abakaʉba opanʉ ãya oseabʉta yiya k’arebaita akʉza mawũã ãba panaita, mãwũã wari wãita kãgade. 17 Maʉ̃ kʼarea jarabʉ akʉza widibʉ Señor trʉ̃neba bada ẽ bamarẽã ẽbẽrarã Daizeze odebʉ ẽ kĩrãkʼa ãya obʉ baera ãyi krĩchamabʉta. 18 Ãyira krĩcha pãrĩguadebʉ akʉza jĩgarabʉ Daizezeba bebʉde dia bʼaideba ãyi krĩchadera nekʼãrẽ neẽ baera akʉza ãyi sora zarea baera. 19 Pera ẽ baera ãya nekayirua obʉ kʼarea, audre nekayiruata dajada obʉ, jipa okĩrãpanʉ nekayiruata. 20 Mamina maraba kʼawuasida Kristora mawũã ba ẽ basita 21 maraba ũrĩsida akʉza nekʼawuasida iyideba akʉza panʉ Jesuba jaradiadade. 22 Marabara k’awuasida krĩcha kayirua nããra erbadata amaenaibarata, mara nããra bada kĩrãk’a mara nekayirua yi edebipanaside. 23 Maraba sãwũã krĩchabʉra jipa awuara oibara, 24 krĩcha yiwidita erbaibara maʉ̃ra krĩchara Daizezeba oda baera, aripe obʉba jarabʉ kĩrãkʼa akʉza kʼẽrẽpa kãga oũdubibʉ kĩrãkʼa. 25 Mawũẽra, maraba awuru sewabʉta idubʉsida baera, kõbebʉrʉ wãrĩnuta jarada wuabema ẽbẽrarã, jõmaʉ̃ta dayirãra abaʉ kakuadebema baera. 26 Kĩrʉbʉrʉde kayiruata orara, ũmadaʉ baebirãra bʉ kĩrʉbʉeda. 27 Diarua idu kʉrʉgabiraidua 28 Yi zrʉgabʉbara wua zrʉgarãra, awuarabʉrʉ zarea trajaibara iyi juwaba, mawũã iya erbʉba awuruba nesidabʉ k’arebaita. 29 Bed’ea kayirua bed’earaidua. Awuarabʉrʉ wuabemara k’arebai k’area bed’ea bia bed’eaidua, mawũã maʉ̃ bed’ea ũrĩbʉra bia panañi. 30 Adewara, Daizeze jaure zareata sopʉabiraidua, maʉ̃ jaure zareaba mara wuaga erbʉ kĩrãkʼabʉ mara ẽdrʉbibari ewari zeyeda. 31 Jõma idubʉidua, mara sode krĩcha obʉra, soidu kĩrʉbʉra, i kʼaikʼaia bedʼeabʉra, yãrã imitia jarabʉra, yãrã kayirua obʉra. 32 Sobia beaidua wuabemabawara, kãga akʉidua, mara mitia odara kĩrãduaidua, Daizezeba mara kayirua kĩrãduada kĩrãk’a Kristodeba.