Santiago

1 Santiagodeba, Daizeze nezokʼa akʉza Jesukristo, 12 tribudebema drʉazabʉraita: Bia panaidua 2 Mebẽrãra bed’ea zroma ũdubʉdadera k’ãbẽã sobiapanaidua, 3 maraba kʼawuapanʉ baera soiduba ĩjãbʉrʉdera bedʼea zromara awuantabʉta. 4 Maraba awuantabʉ kʼarea nebiata oyi, mawũã daucha jipa bamarẽã, nejõma bia bamarẽã akʉza nekʼãrẽ wae ẽ marẽã. 5 Mawũã maranebemata burubia erbaita waebʉbʉrʉ, Daizezeʼa badua wididua, mawũã iya diakĩrãne diaya, iya jõma diabʉ baera. 6 Mamina soiduba wididua, k’ãrẽ krĩcha ẽã, yi k’ãrẽ krĩchabʉra pʉsa maraza kĩrãk’abʉ, pʉãdrʉba yiya edebʉ akʉza yiya balbʉe jirbʉ. 7 Maʉ̃ ẽbẽrabara krĩcha ẽ baibara Jeowadeba nebia zebʉra iya erbaita. 12 Sobiabʉ yumakẽrã bedʼea zroma berabaribʉ awuantabʉra, maʉ̃ bia akʉbʉrʉde burude jʉ̃bari bebʉdebemata diai baera, Jeowaba maʉ̃ta diaya asi iyi kãgapanʉa. 13 Bedʼea zroma erbude, mia kʼaiba jarabe ẽ: «Daizezeba obʉta bedʼea zromara». Daizezebara nemitiara oẽ baera, mia iyara awuruta bedʼea zroma zebi ẽ. 14 Awuarabʉrʉ, aba abakaʉba kʼãrẽ krĩcha erbʉba, edebʉ iya kãgabʉ oita. 15 Maʉ̃ krĩcha mitia daya burude erbʉdera nekayirua obari, maʉ̃ba bei eda edeseabʉ. 17 Jõma k’ãrẽ biara akʉza jõma nek’ãrẽ aripe bʉra ʉ̃tʉbemane, Zeze uruyachudeba zebʉ baera akʉza iya pãrĩgʉa erbʉra kĩrã awuara bari ẽ. 19 K’awuabeaidua naʉ̃ta, mebẽrã mʉ̃ ne kãgara. Ẽbẽrarã jõmaʉ̃ba kĩrãkita ũrĩbara, k’awua ẽã bed’eabe ẽ, mesera kĩrʉbe ẽ, 20 ẽbẽra kĩrʉbʉba iduaribi ẽ Jeowade kĩrãkʼa aripe omarẽã. 21 Maʉ̃ba ãĩbʉidua mitiara akʉza nekayiruara jõma, maʉ̃ba apasibilidadeba jidaidua bedʼea biara maʉ̃ba ẽdrʉbi baera. 22 Bedʼeaba jarabʉta oũdubidua, bari ũrĩraidua, mawũã oda ẽ bʉrʉ mayikʉza sewapanʉ. 23 Maraba bedʼea ũrĩ kʼãrãpe oũdubida ẽ bʉrʉ, yumakẽrã iyi kĩrã espejode akʉbʉ kĩrãkʼabʉ: 24 iyi kĩrã akʉbʉmina iyi wãbʉrʉde jõma kĩrãduabʉ iyi sãwũãbʉra. 25 Ley nenẽãbʉ dayi ẽdrʉbibʉde akʉbʉbara baridua akʉbʉ bari ũrĩ ẽ akʉza kĩrãdua ẽ, awuarabʉrʉ wãrĩnu obʉ; mõbebʉrʉ iyira sobiabayi iya nekʼãrẽ obʉrʉdera. 26 Ẽbẽra abaʉba krĩchabʉbʉrʉ Daizeze odebʉta, mamina iyi bedʼeata biʼia akʉ ẽ bʉrʉ, iyi sota sewabʉ. Maʉ̃ba iya Daizezeita obʉra zeri ẽ bayi. 27 Daizezebara kãgabʉ jaigʉa neẽã iya’a yiwid’idamarẽã k’ãwũã: jẽrãmara akʉita akʉza pẽdrata ãyi zʉbʉriabʉrʉde adewara naʉ̃ drʉaba nekayirua obʉ kĩrãk’a oẽã.