Éxodo

23 Sewa nebʉrata jararãra. Ẽbẽra kayiruata k’arebarãra sewa nebʉra jaraita. 2 Ẽbẽrarã naʉ̃ drʉadebʉ kĩrãk’a orãra nemitia oita akʉza nek’ãrẽ aripebʉ ẽãta jararãra wuabemare b’aita. 3 Ẽbẽra nek’ãrẽ neneẽãbʉ bed’ea zromata k’awua obʉde, iyiare barãra iyi nek’ãrẽ neneẽãbʉ k’area. 4 »Bʉa ũdura torota mawũã ẽ bʉrʉ burru bʉ nejʉradeta aduadata, jẽda edeibara maʉ̃ra. 5 Bʉa ũdura burru bʉ jʉrabʉdeta iyi bulto eda baebʉrʉta, mama iduaribirãra k’areba wãra maʉ̃ ẽbẽra iyi nedʉwʉrʉ ẽdrʉbita. 6 »Ẽbẽra nek’ãrẽ neneẽãbʉta bʉ pʉwʉrʉdebemata iyi bed’ea zroma k’awua obarabʉdera aña orãra. 7  »Sewa nebʉra jarapanʉne eda barãra akʉza beabirãra ẽbẽra neida oẽãbʉta akʉza aripe obʉta mʉ̃ara kĩrãdua ẽ ẽbẽra yi kayirua odara. 8 »Plata bari ĩjãbe ẽ iyiare b’aita maʉ̃bara yumakẽrã buru biasida dauberre obʉ akʉza ẽbẽra bia obʉbara aña jaraseabʉ. 9 »Ẽbẽrarã jãpeba zedata zʉbʉria oraidua. Marabara k’awuabʉ sãwũãbʉta ẽbẽrarã jãpeba zedara, marara Egipto drʉade jãpeba zedatabasi baera. 10  »Ne upe akʉza maʉ̃ ne u jʉrepeyi 6 poagabayeda. 11 Mamina poaga 7dera ne uda ẽ baibara drʉa enaʉ̃marẽã. Ẽbẽra nek’ãrẽ neẽãbʉ pʉwʉrʉdebemaba drʉaba diabʉrʉta komarẽã akʉza maʉ̃raba amaebʉrʉra nedʉwʉrʉra oidebemaba komarẽã. Abarika oibara ne u ubata akʉza ne u olibota. 12  »Ewari 6 bayeda trajaibara mamina ewari 7dera traja ẽ baibara bʉ torota, bʉ burruta, enaʉ̃marẽã adewara bʉ nezok’a wauta akʉza ẽbẽra jãpeba zedarasida zarea jidadamarẽã. 13  »Jõma oidua mʉ̃a zok’abʉta. Adewara awuru Daizeze trʉ̃ zeri ẽãta jararaidua, maʉ̃ra trʉ̃ra mara itaedebara ʉ̃tʉ ze ẽ baibara. 14  »Poagaza marabara mʉ̃ita piesta ũbea oyi. 15 Piesta Pan ne Oreguea Neẽãbʉta oibara. Mʉ̃a zok’ada kĩrãk’a mʉ̃a jarada ewaride jedeko abibde kodayi pan ne oreguea neẽãbʉta ewari 7 bayeda maʉ̃ ewaride Egiptodeba ẽdrʉsi baera. Mia k’aita mʉ̃ma juwa awa zebe ẽ bayi. 16 Adewara Piesta ne u Nããra udadebemata oibara maʉ̃ra oyi bʉa nããra ne uda kuarabʉrʉde bʉa ne u drʉade udata jʉrepebʉrʉde. Adewara Piesta ne u jõma Jʉrepedadebemata oibara maʉ̃ra oyi poaga aba berabaribʉrʉde bʉa uda jõma jẽda jʉrepebʉrʉde. 17 Yumakẽrãra jõma poaga abaʉde Daizeze wãrĩnuara Jeowama wãma ũbea wãibarabasi. 18  »Nedʉwʉrʉ beada wata mʉ̃a diabʉrʉdera pan ne oregeabʉbawara diarãra. Nedʉwʉrʉ draga mʉ̃ piestade mʉ̃ita diabadara nrʉemaita wuaga ẽ baibarabasi. 19  »Bʉa ne u uda nããra bia zaudata edeibarabasi Jeowa dedara kabrito zaketa yi papa jubade yurara. 20 »Mʉ̃a bʉ nãã angel aba zok’a bʉeyi bʉ k’arebamarẽã ode akʉza mʉ̃a drʉa jʉrʉdama edemarẽã. 21 Bia ũrĩda iyi bed’eata akʉza iya jarabʉde ora. Iyi ʉ̃rʉ barãra akʉza kayiruata ora iyara kĩrãdua ẽ bayi iyira mʉ̃ trʉ̃ne wã baera.