Génesis

24 Abrahán’ra biode zõnabasi. Akʉza Jeowabara nek’ãrẽ bia mejãcha diasi. 2 Ewari aba, Abrahán’ra bed’easi iyi nezok’a zõrãyirume, Abrahánba nek’ãrẽ jõma erbada akʉbʉme, iya jarasi: «Mʉ̃ bia ok’ãrãpe, bʉ juwata mʉ̃ bakara edre kʉbʉra. 3 Jeowa k’area wãrĩnuta jarada, Daizeze ʉ̃tʉbema k’area akʉza Daizeze naʉ̃ drʉadebema k’area, mʉ̃ warraita kima jʉrʉbʉrʉde jʉrʉ ẽ baita kananeora kaurata, dayibʉmae. 4 Awuarabʉrʉ bʉra wãibara mʉ̃ drʉa eda, mawũã jidaita mʉ̃ mebẽrãnebemata, mʉ̃ warra Isaac kima b’aita». 5 Mamina yi nezok’aba jarasi: «¿Mʉ̃ara k’ãrẽta oi maʉ̃ wẽrãta mʉ̃ k’aidu zekĩrã ẽ bʉrʉ naʉ̃ drʉa eda? ¿Bʉa kãgaika bʉ warrata edemarẽã bʉ nããbada drʉaidu?». 6 Abrahánba panʉsi: «Mʉ̃ warrara kamara jipa ederãra. 7 Jeowa, Daizeze ʉ̃tʉbemaba, mʉ̃ra wãbisi mʉ̃ yibarira dedaʉba akʉza mʉ̃ mebẽrã drʉadeba. Iyira mʉ̃me bed’easi adewara jarasi iyi k’area wãrĩnuta jaraita: Mʉ̃ara naʉ̃ drʉata diayi bʉdeba zebʉa. Iyara zok’aita angelta bʉ nãã akʉza bʉara maʉ̃ wẽrã k’ãrẽ bed’ea neẽã ũduita mʉ̃ warraita. 8 Mamina maʉ̃ wẽrãta bʉ k’aidu zekĩrã ẽ bʉrʉ bʉra maʉ̃ bed’eadebara ãĩbayi. Mʉ̃ warratrʉ namaʉ̃ba mama ederãra». 9 Aramaʉ̃ta nezok’abara iyi nok’o Abrahán bakara edre kʉbʉsi iyi juwara mõbe jarasi jõma aripe oita iya jaradara. 10 Mawũã nezok’abara jidasi 10 kameyo iyi nok’odeta mõbe wãsi Nacorchu pʉwʉrʉidu Mesopotamiane. Iyi k’aidura nek’ãrẽ bia iyi nok’oba diabʉedata edesi. 11 Jʉ̃ẽbʉrʉde, kameyorata sãkokode babisi pozo k’awa, pʉwʉrʉ ãĩ. Ewarira kibʉsawasi, maʉ̃ ũmadaʉdera wẽrãra bania juede wãbasi. 12 Mõbe yiwid’isi: «Jeowa, mʉ̃ nok’o Abrahán Zeze, jõma bia berabaribira, mʉ̃ bia ok’ãrãpe. Mʉ̃ nok’o Abrahán’a kãga jõkata ũdubira. 13 Mʉ̃ra namachu do dabʉ bi’ia b’ai kiru k’awa, ẽbẽrarã naʉ̃ drʉade panʉra kaurãra zebʉsia bania juede. 14 Mʉ̃ bia ok’ãrãpe, mʉ̃a wẽrã naʉ̃ bed’ea jarai’a mʉ̃ bia ok’ãrãpe bʉa kʉgʉrʉ bania erbʉta kenetara mʉ̃ mawũã bania doita, maʉ̃ne iya mʉ̃a panʉmarẽã bʉa doseabʉ akʉza bʉ kameyoraitabida bania weyi dodamarẽã, maʉ̃ wẽrãra bʉa jʉrʉda b’aibara Isaac’ita. Mawũã ũdubiyi kãga jõkata mʉ̃ nok’o’a». 15 Iyi yiwid’i berabari naweda, zesi pʉwʉrʉdeba wẽrã yi trʉ̃ Rebecata iyi okiwade kʉgʉrʉta abasi. Iyira Betuel kaubasi, Milcá waubasi, iyira Nacor kimabasi, naʉ̃ra Abrahán mebẽãbasi. 16 Maʉ̃ wẽrãra bi’iakĩrãsi adewara yizakebasi; akʉza mia k’ai yumakẽrãʉ̃me aba k’ãĩkabasi. Iyira do dabʉ bi’ia b’ai kiruidu jʉ̃ẽsi, iyi kʉgʉrʉ tʉ k’ãrãpe akʉza jẽda wãsi. 17 Maʉ̃ nezok’ara iyima wẽiba wãsi mõbe jarasi: «Mʉ̃ bia ok’ãrãpe bʉ bania kʉgʉrʉdebemata mʉ̃a wika diara». 18 Aramaʉ̃ta iya panʉsi: «Doseabʉ». Mawũã maʉ̃ kʉgʉrʉra mesera uda baebisi iyi okiwadeba, adewara maʉ̃ba domuena iya jidabasi 19 Jõma bania diada tẽã, iya jarasi: «Bʉ kameyoraitabida baniata jueyi mawũã domarẽã». 20 Mesera baniata nedʉwʉrʉraita juesi akʉza mawũã wãpe zebasi pozo eda bania jueita. Mawũã bania juebasi maʉ̃ yumakẽrã kameyoraita. 21 Iyi maʉ̃ obʉ eda, yumakẽrãbara chupea kĩrãkita akʉbasi, iyikʉza widibasi Jeowa jõma bia wãbi k’awuaita. 39 Mamina mʉ̃a jarasi mʉ̃ nok’o’a: «¿Mʉ̃ara k’ãrẽta oi maʉ̃ wẽrãta mʉ̃ k’aidu zekĩrã ẽ bʉrʉ?». 41 Mawũãra bed’ea neẽbayi, bʉta mʉ̃ mebẽrãra deda jʉ̃ẽpe ãya diada ẽ bʉrʉ. Mawũãra bʉra ãĩbayi naʉ̃ bed’ea odadebara. 57 Aramaʉ̃ta ãya jarasida: «Wẽrãta trʉ̃drʉ iya’a wididaita» 58 Aramaʉ̃ta trʉ̃bʉesida Rebecata mõbe widisida: «¿Bʉra wãika naʉ̃ yumakẽrã k’aidura?». Iya panʉsi: «Ãjã, mʉ̃ra wãkĩrãbʉ». 65 Aramaʉ̃ta widisi iyi nezok’a: «¿K’ai jari ẽbẽra ya dayima urura?». Yi nezok’aba panʉsi: «K’aʉra mʉ̃ nok’o». Aramaʉ̃ta yi wua jira eda k’ãrãpe buru anasi. 67 Maʉ̃ tẽã Isaacbara yi papa Sara karpa dema edesi. Mawũã Rebecara yi kimabasi. Isaacbara kãgasi iyira, maʉ̃ba yi papa beida tẽã so zareata ũdusi.