2 Crónicas

12 Daizeze, ¿bʉa zʉbʉria oẽ baika ãyira? Daibara kʼãrẽ obeẽ baera naʉ̃ra ẽbẽra kʼabana dai ʉ̃rʉ zeidera, mõbe kʼawua ẽ kʼãrẽta oita, mamina dai dabʉbara bʉma akʉbʉ». 13 Maʉ̃ena, jõma Judádebemarara piradrʉ panasi Jeowa nãã, yi kimaraena akʉza yi wũãwũãrãena, adewara wika yidesida. 15 Iya jarasi: «Kĩrãkita ũrĩnaidua jõma Judádebemara, Jerusaléndebemara akʉza bʉa, nokʼo Jehosafat. Naʉ̃ta jarabʉ Jeowaba: ‹Perarãidua akʉza aukʼara perarãidua naʉ̃ra kʼabana kʼarea, naʉ̃ yõra marane ẽ baera, awuarabʉrʉ Daizezede. 17 Naʉ̃nera mara yõi nesida ẽ bayi. Wãidua mayi yõibarama, k’ãrẽ oraidua akʉza akʉidua Jeowaba mara sãwũã ẽdrʉbita. Judádebemara akʉza Jerusalénebemara, krĩcharaidʉa akʉza peraraidua. Nʉ wãĩdua akʉza yõĩdʉa ãyi bawara, Jeowara maraʉme baibaera›» 20 Nrʉemane diapeda wãsida drʉa ibʉawabʉ Tecoama. Mama wãenara Jehosafat piradrʉ kʼãrãpe jarasi: «Ũrĩdua Judá akʉza ẽbẽrarã Jerusalénʹnebemaba. Ĩjãidua Jeowata mara Daizezeta, mawũã ariya piki teitea panamarẽã. Ĩjãidua iyi propetara ʉ̃rʉ, mawũãra bia wãñi». 21 Ẽbẽrarã widida tẽã, jidasi yumakẽrãrata Jeowa tranamarẽã akʉza ibia bedʼeadamarẽã nekʼãrẽ yobari neneẽãbʉdeba yumakẽrãra yõbarira nãã, mõbe jarapanasi: Jeowa biga diaidua iyi kãga jõkara ewari jõmaʉ̃nẽbʉ baera».