Salmo

139 Jeowa bʉara mʉ̃ra bi’ia ũduk’awuabʉa. 2 Kawuabʉ mʉ̃ sãwũã jebedabʉra akʉza mʉ̃ piradrʉ dogota. Mʉ̃ sãwũã krĩchabʉra bʉa jĩgaʉba bi’ia k’awuabʉ. 3 Bʉa akʉbʉ mʉ̃ aña wãbʉrʉde akʉza kʼãĩbʉrʉde. Kʼawuabʉ jõma mʉ̃a obʉra 4 Jeowa mʉ̃ bed’eai naweda bʉa bi’ia k’awuabʉ mʉ̃ kĩrãmeba k’ãrẽ jaraira. 5 Bʉra mʉ̃ audu wãbʉ akʉza mʉ̃ tẽã jʉ̃nea wãbʉ, bʉ juwara mʉ̃ ʉ̃rʉ bʉebʉ bʉara. 6 Bʉa mʉ̃ra biʼia ũdukʼawuabʉ. Mʉ̃ krĩchabʉde wũẽta. 7 ¿Sama mĩrũ wãi mʉ̃ra bʉ jaure zareadebara? ¿sama wãi mʉ̃ra bʉ kĩrãnebara? 8 Mʉ̃ta bajãena wãrezera bʉsida mainʉ bayi, akʉza mʉ̃ta zobeade eda wuagadara mainʉbida bayi bʉra. 9 Mʉ̃ta wãbari wãra ʉ̃madau ʉ̃tʉbʉsi daucha baita pusa audre wawarabʉidu, 10 mainʉbida bʉ juwaba kʼarebayi mʉ̃ra, jidayi bʉa mʉ̃ra bʉ juwaraba. 11 Mʉ̃ pãrĩgʉa jarara mʉ̃ta mĩrʉbimarẽã, mawũãsidʉ pãrĩguara ũnañi mʉ̃ kʼawa. 12 Mia pãrĩguadebida mĩrʉbe ẽbayi mʉ̃ra bʉdebara, bʉitara diamasira iyaba ũnachʉ baera ewari kĩrãkʼa; pãrĩguata akʉza ũnaʉ̃mera iyabaʉ bʉitara. 13 Mʉ̃ kotroara bʉa parãsi baera, mʉ̃ papa biteda bʉa mʉ̃ra biʼia akʉsi. 14 Biʼia daucha parãbʉ mʉ̃ra, maʉ̃ kʼarea mʉ̃ra bʉ ʉ̃rʉ ibia bedʼeabʉ. Akʉza biʼia kʼawuabʉ mʉ̃ara bʉa nekʼãrẽ parãkʉadara jipade kĩrãwãreãta. 15 Mia abaʉba kʼawua ẽna parãsidade akʉza egoro edre parãsidade mʉ̃ bʉwʉrʉrãra bʉdebara merabe ẽ basi. 16 Bʉara mʉ̃ra ũduk’awuabʉ biteda bʉwedaʉba, bʉ librode jarabasi mʉ̃ kakuaza sãwũã b’aibasita (adewara sãwũã wari wãibasita) yi kakua neẽ weda. 17 Maʉ̃ba bʉ krĩchara jipade yi bia mʉ̃itara, bʉ krĩchara yi zroma. 18 Jipa majʉachabe ẽ mʉ̃a, ibʉ kĩrãkʼa mejãcha baera. Ʉrumabʉrʉdera wabida jʉachanʉmʉ mʉ̃ara. 23 Daizeze mʉ̃ta biʼia akʉra akʉza biʼia kʼawuara mʉ̃ sode kʼãrẽtabʉta. Biʼia akʉra mʉ̃ta akʉza bia kʼawuara mʉ̃ kʼãrẽba krĩcha obibʉta. 24 Akʉra mʉ̃ne, yi kayirua bʉ kʼawuaita akʉza o ewari jõmaʉ̃nẽbʉare edera.