1 Tesalonicenses

2 Maraba kʼawuapanʉ kĩrãkʼa Filiposdera dayirãra zʉbʉria osida akʉza posida, mamina Daizezebara zowaĩnĩgʉa diasi dayirã, bedʼea bia jaradiaita Daizeze ʉ̃rʉ mejãchade pẽwãpanʉmina. 4 Awuarabʉrʉ Daizezeba iduaribisi baera maʉ̃ bedʼea biata jaramarẽã, bedʼeapanʉ ẽ ẽbẽrarãba bia akʉdamarẽã awuarabʉrʉ opanʉ Daizezeba bia akʉmarẽã, iya dayirã sota akʉbʉ baera. 5 Adewara, maraba kʼawuapanʉ daira maraʼa sewata ibia bedʼeadakata, mia daibara ũdubidakata sewidata wãrĩnu kĩrãkʼa, dai mitia krĩchapanʉta odai kʼarea. Daizezebara kʼawuabʉ maʉ̃ra. 6 Akʉza daibara jʉrʉdaka yumakẽrãba, maraba akʉza mia wuabemaraba dai ʉ̃rʉ ibia bedʼeada marẽã, mamina daira Kristo apostolera baera zarea baseabʉ maraba dai ne diaita. 7 Awuarabʉrʉ, daibara marara bia edasida, papaba iyi wũãwũã ju dawabʉ kĩrãkʼa akʉza kãgade bia akʉbʉ kĩrãkʼa. 8 Marata mejãcha kãgapanasi baera Daizeze Bedʼea bia awa jaradia ẽ basi, awuarabʉrʉ dai bebʉsida diasida, mejãcha kãgapanasi baera. 11 Maraba bia kʼawapanʉ, zezeba yi wũãwũãra jaradiabʉ kĩrãkʼa, dai bida maraʼa ũrãgʼa diasida, so zarea diasida, akʉza mara aba abakaʉʼa jaradiasida 12 mawũã kʼẽrẽpa panamarẽã Daizezeba kãgabʉ kĩrãkʼa, iyara marara trʉ̃bʉ iyi Nokʼo edre bamarẽã. 13 Maʉ̃ kʼarea daibara ewariza biga diapanʉ Daizezeʼa, maraba Daizeze bedʼea ũrĩsidade (daideba), ĩjãna ẽ basi baera ẽbẽra bedʼeata awuarabʉrʉ ĩjãsida wãrĩnuarata, Daizeze bedʼeata, naʉ̃ba yi ĩjãbʉ bebʉra awuara babibʉ.