Revelación

14 Mʉ̃a ũdusia Korderota, katuma Sion ʉ̃rʉ edaʉnʉmʉta, iyibawarabasi 144.000, ãyi datrʉde Kordero trʉ̃ta bʉ apanasi akʉza yi Zeze trʉ̃sida. 2 Akʉza ũrĩsi ʉ̃tʉba biabʉta, bania mejãchanʉmʉ kĩrãkʼa biabasi akʉza ba toutoubari kĩrãkʼa. Mʉ̃ara ũrĩsi arpa zapanʉ kĩrãkʼa trãbʉrʉde. 3 Ãyira trãpanʉ nokʼo jewedabari kĩrãbita akʉza ẽbẽra kimare zokʼaipanʉra kĩrãbita adewara zõrãrã kĩrãbita, trãpanʉ trãbi yiwidi kĩrãkʼa. Mia abaʉba bia trãbeda ẽ basi maʉ̃ra, 144.000rabʉrʉ bia trãsida, maʉ̃rãra egorode jidasida. 4 Naʉ̃ratrʉ yuwẽrãʉ̃me neida ẽ basi, ãyira yizake baera. Naʉ̃rabara pẽwã wãna Korderota iyi wãmae. Naʉ̃ratrʉ nããra jidasi ẽbẽrarãne eda Daizezeita akʉza Korderoita, 6 Ũdusi awuru angel ʉ̃tʉ ewarade wãbaribʉta. Edeita bedʼea bia jõkata ẽbẽrarã jõma naʉ̃ drʉade panʉraita: bedʼea awuarabʉraita, ẽbẽra awuarabʉraita adewara pʉwʉrʉraitabida. 7 Nemi jĩgʉa jarasi: «Wawiaidua Daizezera akʉza iyi ʉ̃rʉ ibia bedʼeabidua, zesi baera iya kʼawua oi ewarita. Maʉ̃ kʼarea yiwidʼidua bajã oda, drʉa oda, pusa oda akʉza do kĩbʉra biʼia oda».