Génesis
18 Maʉ̃ tẽã, Jeowara Abrahán yi ũdubisi bakuru Mamréne. Mamara mejãcha jʉ̃wʉrʉbasi akʉza Abrahán’ra iyi karpa de edre jewedabasi. 2 Iyi ʉ̃ta buru wuaside, ũdusi yumakẽrãra ũbea ara jĩga edaubarabʉta. Iya mawũã ũdubʉrʉ baera aramaʉ̃ta wẽbasi iyi karpa dedauba bia edaita, mõbe sãkokode kobesi ãyi nãã. 3 Maʉ̃ tẽã jarasi: «Jeowa, mʉ̃ bia ok’ãrãpe, mʉ̃ta bʉ dabʉ nãã biabʉbʉrʉ, idu wãña berabaribirãra naʉ̃ra ẽbẽrarãta. 4 Mʉ̃a baniata jʉe webiyi mawũã ãyi jĩrʉta sʉgʉdamarẽã. Maʉ̃ tẽã ãyi ẽnaʉ̃seabʉ bakuru edre. 5 Ãyira mʉ̃ deda zebʉda baera, mʉ̃a idu panta wẽbira ãyita mawũã zareapanamarẽã. Maʉ̃ tẽã ãyi wãma wãseabʉ». Ãya panʉsida: «Biga, ora bʉa jarataeta». 6 Aramaʉ̃ta Abrahán’ra wãsi iyi karpa deda Sara jʉrʉde, mõbe jarasi: «Mesera jʉrʉda arina biata sãbʉ zroma ũbea, mõbe bʉrachira maʉ̃ba panta ora». 7 Maʉ̃ tẽã Abrahán’ra wẽba wãsi pakabʉrainʉ mõbe jidasi toro zake biata chichi borekeakĩrʉta, maʉ̃ tẽã diasi iyi nezok’ara aramaʉ̃ta maʉ̃rabara mesera ara obarabesi. 8 Maʉ̃ berabarida tẽã jidasi mantekiyata, lecheta akʉza toro zake wimata maʉ̃ta ãya diasi. Ãyi nekonʉmʉena iyira ãyi k’awa edaunʉmasi bakuru edre. 9 Ãya widisida: «¿Samachu bʉ kima Sarara?». Aramaʉ̃ta iya panʉsi: «Jari karpa deda». 10 Aramaʉ̃ta ãyi abaʉdebemaba jarasi: «Poaga aba babʉrʉde mʉ̃ra zeyi iyabaʉ ewaride, maʉ̃nera bʉ kima Sarara wũãwũã erbayi». Maʉ̃ena Sarabara ũrĩbasi karpa dedauba, naʉ̃ra ẽbẽrarã ãbʉdearechuasi. 11 Maʉ̃ ewaridera Abrahánta Saraʉ̃mera biode zõrãrãbasi. Sarara tobari ewarira berabarisi. 12 Maʉ̃ k’area Sarara iyi sode ipidasi mõbe jarasi: «Mʉ̃ k’ãwũã yõdra bachubidade akʉza mʉ̃ kima zõna bachubidade, ¿daira wũãwũã baraika?». 13 Aramaʉ̃ta Jeowaba jarasi Abrahán’a: «¿Sarara k’ãrẽa ipidasi? ¿K’ãrẽa iya jarasi wũãwũã to ẽ baita yõdra bachubida baera? 14 ¿Bʉka nek’ãrẽ Jeowaba okara? Poaga aba babʉrʉde mʉ̃ra zeyi iyabaʉ ewaride, maʉ̃nera bʉ kima Sarara wũãwũã erbayi». 15 Maʉ̃ k’area Sarara perasi baera iya jarasi: «Mawũã ẽ, ipida ẽ basi mʉ̃ra». Iya jarasi: «Bʉra, bʉra ipidasi». 16 Naʉ̃ra ẽbẽrarã piradrʉsida wãita. Aramaʉ̃ta Abrahánbara ãyira kĩrãchu bʉesi, ãya eda akʉsida pʉwʉrʉ Sodomaena. 17 Jeowaba jarasi: «¿Mʉ̃ara Abrahán’a meraika mʉ̃a nek’ãrẽ oira? 18 Abrahán’ra pʉwʉrʉ zromabayi akʉza wuabemaraira yi zromabayi, adewara pʉwʉrʉ naʉ̃ drʉade jõmabʉra iyideba nebiata ũduyi. 19 Mʉ̃a iyita idibʉrʉ ũduak’awuabʉrʉ, yi wũãwũãra jaramarẽã akʉza iyideba zebʉrʉra jaramarẽã Jeowa ode k’ẽrepa panamarẽã mawũã jõma aripe oita. Mawũã ora, mʉ̃ra Jeowa, Abrahán’a jaradara aripe oyi». 20 Mõbe Jeowaba jarasi: «Sodoma ʉ̃rʉ akʉza Gomorra ʉ̃rʉ bedʼea kayiruata mejãcha jarapanʉ akʉza ãya nemitia mejãcha opanʉ. 21 Mʉ̃a akʉde wãñi maʉ̃ bedʼea jarabarabʉra wãrĩnu kʼawuaita akʉza ãya onʉmʉra wãrĩnu nemitia kʼawuaita. Maʉ̃ta wãrĩnu ẽ bʉrʉ mʉ̃a kʼawuayi». 22 Maʉ̃ tẽã maʉ̃ra yumakẽrãra wãsi mamaʉ̃bara Sodomaena, mamina Jeowara Abrahán’ʉ̃mebesi. 23 Abrahánbara orra k’ãrãpe iya jarasi: «¿Bʉara wãrĩnu makenaika ẽbẽrarã biarata ẽbẽrarã kayiruabawara? 24 Bari jaradaita maʉ̃ pʉwʉrʉde ẽbẽrarã biarata 50 panʉbʉrʉ. Mawũãbʉmina, ¿bʉara maʉ̃ra jõma makenaika? ¿Bʉa 50 ẽbẽrarãta ũdura makenaika? 25 Bʉara makenabe ẽ ẽbẽra kayiruata ẽbẽra biabawara. Bʉara iduaribi ẽ bayi ãyi ũmena abarika berabarimarẽã, bʉa maʉ̃ra oẽbayi. ¿Baribʉrʉ naʉ̃ drʉa Juezbara aripe oi ẽka?». 26 Aramaʉ̃ta Jeowaba jarasi: «Mʉ̃a ũdura 50 ẽbẽrarã biata Sodoma pʉwʉrʉde, ãyi kʼarea makena ẽ bayi maʉ̃ pʉwʉrʉra». 27 Mawũãsidu, Abrahánba panʉsi: «Jeowa kĩrãduara mʉ̃a naʉ̃ta akʉza widi baera. Mʉ̃a kʼawuabʉ mʉ̃ra egoro omata. 28 Mamina bʉbʉrʉ 45 ẽbẽrarã biarata, ¿bʉara makenaika pʉwʉrʉ jõma waebʉ baera 5 ẽbẽrarã?». Daizezeba jarasi: «Makena ẽ bayi 45 ẽbẽrarã biata ũdura». 32 Maʉ̃ tẽã Abrahánba jarasi: «Jeowa kĩrʉrãra, mʉ̃ bia ok’ãrãpe mʉ̃ta akʉza bed’eabira. ¿Kõbe ẽbẽrarã biarata 10 panʉbʉrʉ?». Iya panʉsi: «Mʉ̃a ẽbẽrarã 10 panʉta ũdura makena ẽ bayi».