Job

2 Maʉ̃ tẽã Daizeze warrarãra Jeowa kĩrãbita jʉ̃ẽsida mawũã ãyi babarimae wãita, maʉ̃rane eda jʉ̃ẽsi Diarusida iyi babarimae bʼaita. 2 Aramaʉ̃ta Jeowaba widisi, Diaru: «¿Samaʉ̃ba uru?». «Drʉ̃ade wãbaripe ze» mawũã panʉsi Diaruba Jeowaʼa. 3 Jeowabara jarasi Diarua: «¿Akʉbʉka Job mʉ̃ k’aidubʉra? Naʉ̃ drʉadera mia abaʉta neẽ kaʉ̃ kĩrãk’ara. Nemitia oẽãbʉta, k’ẽrẽpabʉta, Daizeze wawiabʉta akʉza nemitia okĩrã ẽãta. Bʉa mʉ̃a iyira beamarẽãbʉmina iyira waidide zarea obʉ kʼẽrẽpa bʼaita». 4 Diarubara panʉsi Jeowa’a akʉza jarasi: «Yarata yarabari akʉza yumakẽrãba jõma erbʉra iyi bebʉbari diayi. 5 Bʉ juwaba tõbari akʉra, yi bʉwʉrʉta akʉza iyi yarata, sãwũã bʉ kĩrãbita i kayirua jara ẽ baita». 6 Mawũẽra Jeowaba jarasi Diarua: «Iyira bʉ juwadebida mamina bearãra». 7 Aramaʉ̃ta Diarura Jeowa deiduba jʉ̃drʉtotosi, maʉ̃ tẽã Jobʼra yagaba mejãcha kayabisi jĩrʉneba buruidu bayeda. 8 Jobʼbara jidasi kʉgʉrʉ todozoamata iyi yara kuruita akʉza jewedabesi itarra ʉ̃rʉ. 9 Yi kimaba iyaʼa jarasi: «¿Waidide kʼẽrẽpa bakirãbʉka? Daizeze ʉ̃rʉ imitia bedʼeara, mõbe beira». 10 Mamina iya panʉsi: «Bʉra jari wẽrãra krĩcha neẽãbʉ kĩrãkʼa bedʼeabida. Daizeze wãrĩnuaraba nebia diabʉta jidapanʉbʉrʉ, ¿iya nekayirua diabʉsida jidaibara ẽka?». Mawũãsidu Jobʼbara nemitia jara ẽ basi.