Génesis

39 Maʉ̃ tẽã ismaelitarabara edesida Joséra Egipto eda. Mama nedo bʉesida egipsio yi trʉ̃ Potifar’a, iyira paraon jenene nok’obasi akʉza maʉ̃ arebasi. 2 Jeowara Joséʉ̃mebasi. Maʉ̃ba jõma bia wãsi akʉza iyi nok’o egipsioba iyi de nok’o babisi. 3 Iyi nok’obara k’awuasi Joséra Jeowaʉ̃mebasita akʉza Jeowaba iya jõma obʉra bia berabaribibasita. 4 Potifarbara bia akʉbasi Joséra akʉza iyi kʼarebabari babisi. Maʉ̃ kʼarea Potifarbara iyi deta akʉbisi akʉza iya nekʼãrẽ jõma erbʉta. 5 Iyi deta akʉza iya nekʼãrẽ jõma erbʉta akʉ jʉ̃drʉdadeba ʉ̃ta, Jeowabara nebiata dia jʉ̃drʉsi egipsiora José kʼarea. Jeowaba jõma bia wãbisi iyi deda akʉza iya drʉa erbʉde. 6 Potifarbara jõma Joséʼa akʉbisi iya erbʉra. Maʉ̃ kʼarea krĩcha zroma oba ẽ basi, bari krĩchaibarabasi iya kʼãrẽ kokĩrãbʉta. Joséra kʉ̃ra biʼiayirasi akʉza kakua zareabasi. 7 Mawũẽ nokʼo kimaba Joséta kãgasi akʉza iyaʼa jarasi: «Mʉ̃me ãba kʼãĩra». 8 Mamina iyara ĩjã ẽ basi akʉza iyi nokʼo kimaʼa jarasi: «Akʉra, mʉ̃ nokʼora krĩcha oẽ nekʼãrẽ dedabema kʼareara, mʉ̃ta bʉ kʼãrẽ baera, iya jõma mʉ̃ juwade amaesi. 9 Mʉ̃ awuara zok’abʉra neẽ naʉ̃ dedara. Iya mʉ̃a jõma diabʉ k’ãrẽ mamina bʉtrʉ dia ẽ basi iyi kima baera. Maʉ̃ba ¿mʉ̃ra sãwũã maʉ̃ nãã nekayirua oipe akʉza Daizeze nãã nekayirua zromata oipe? 10 Iya ewariza iyabaʉta jarabasi, mamina Josébara ĩjãkabasi iyi ʉ̃me ãba kʼãĩta akʉza ãba bʼaita. 11 Mawũãsidu ewari aba iyi deda jʉ̃ẽside iyi trajo oita, mia abaʉ nezokʼarata neẽ basi. 12 Aramaʉ̃ta iyi wuama jida k’ãrãpe mõbe jarasi: «Mʉ̃me ãba k’ãĩna». Aramaʉ̃ta iyi mamaʉ̃ba wẽbadogode maʉ̃ wẽrãba iyi juwade erbesi wuara. 13 Iya ũduside José wẽbadogoba akʉza wuara iyi juwade amaesita, 14 aramaʉ̃ta iyara mejãcha jʉra trʉ̃bʉsawasi yumakẽrãra dedabemata mõbe jarasi: «Akʉra, jari ẽbẽra ebreo mʉ̃ kimaba wedara dayirã ʉ̃rʉ ipidabʉa. Iyira mʉ̃ erk’ãĩta zesia, mamina mʉ̃ra k’ãbãẽã jʉrasia. 15 Iya ũrĩside mʉ̃ mawũã nemi jĩgʉa jʉrakʉbʉta wẽba wãsi, mawũã iyi wuata mʉ̃ kʼawa amaesi». 20 Aramaʉ̃ta José nok’obara jida k’ãrãpe eda bʉesi karselde nok’oba ẽbẽrarã eda bʉebadamae. Mawũã Joséra karselde eda besi. 21 Mamina Jeowara Joséʉ̃mebasi. Kãga jõkata ũdubibasi adewara karseldebʉ nok’o’a bia akʉbisi iyira. 22 Maʉ̃ k’area, nok’o karseldebemabara José’a diasi wuabemara karseldebʉta zok’amarẽã. Josébʉrʉ akʉ b’aibarabasi wuabemaraba obʉra jõma aripe omarẽã. 23 Nok’o karseldebemara adu’abasi iya José’a jõma akʉmarẽã zok’adara jõma aripe obasi baera, Jeowara Joséʉ̃mebasi baera akʉza Jeowabara jõma bia wãbisi.