Ezequiel
15 Jẽda akʉza ũrĩsi Jeowa bedʼata. Iya jarasi: 16 «Bʉta yumakẽrã warra, bakuruta jidara mõbe maʉ̃ ʉ̃rʉ bʉra: Judáita akʉza ẽbẽrarã Israeldebema iyiʉ̃me bʉita. Maʉ̃ tẽã jidara awuru bakuruta mõbe bʉra naʉ̃ ʉ̃rʉ: Joséita, bakuru Efraínʼita akʉza ẽbẽrarã Israeldebema iyiʉ̃me bʉita. 17 Maʉ̃ tẽã ãba kʉbʉra mawũã bʉ juwade bakuru abapai erbaita. 18 Bʉ pʉwʉrʉba widibʉrʉde ¿Bʉa jara ũrĩbi ẽ baika kʼãrẽta jarakĩrãbʉ naʉ̃ba?, 19 bʉa panʉñi: Naʉ̃ta jarabʉ Jeowa nejõma zokʼaseabʉba: «Jidayi bakuru Josédeta Efraín juwadebʉta akʉza ẽbẽrarã Israeldebema iyiʉ̃mebʉ akʉza ãba bʉeyi bakuru Judáʉ̃me. Mawũã bakuru abapai bayi mʉ̃ juwade». 24 Mʉ̃ nezokʼa Davidʼra ãyi nokʼobayi akʉza ãyi jõmaʉ̃ba obeja akʉbari aba erbayi. Ãyara ũrĩñi mʉ̃ leyta akʉza mʉ̃a zokʼabʉta oyi. 25 Panañi mʉ̃ nezokʼa drʉa diadade, Jacobʼa, mama panasi mara yibarirara. Mama panañi ewari jõmaʉ̃nẽ, ãyita, yi wũãwũãrata akʉza yi wũãwũãra wũãwũãta. David mʉ̃ nezokʼara mara nokʼobayi ewari jõmaʉ̃nẽ. 26 Mʉ̃ra ãyiʉme bedʼea abarika zeyi aduʼa bʼaita, maʉ̃ bedʼea abarika zedara ewari jõmaʉ̃nẽ bayi. Mama babiyi, mejãcha eababiyi akʉza mara ẽzadra mʉ̃ Santuariota ewari jõmaʉ̃nẽ babiyi. 27 Mʉ̃ karpa dera ãyiʉ̃me bayi, mʉ̃ra ãyi Daizeze bayi akʉza ãyira mʉ̃ pʉwʉrʉ bayi.