Mateo
3 Maʉ̃ ewaridera Juan buru kʼoebaribara jaradia jʉ̃drʉsi Judea desiertode. 2 Jarabasi: «Idubʉidua kayiruara, Daizeze Nokʼo ʉ̃tʉbemara arakꞌaita ba baera». 4 Juanbara jʉ̃basi wua kameyo kara omata akʉza kurruta jʉ̃basi nedʉwʉrʉ ẽ omaba, kobasi adichichita miel oidebemaena. 5 Akʉde wãpanasi ẽbẽrarã Jerusalénꞌnebemaba, Judeadebemaba akʉza Jordánꞌnebemaba. 6 Iyara buru kʼoekʉabasi Jordán doeda akʉza ãyara jarapanasi wuabemara deidu ãya kayirua obada ʉ̃rʉ. 7 Iya ũduside pariseorata akʉza saduseorata iyi buru kʼoebʉidu uruta Juanba jarasi: «Damaneba zebʉrʉ marara ¿kʼaiba jarasi marara zʉbʉriadeba ẽdrʉita? 8 Nããra oidua nebiata jẽda krĩchabʉ ũdubidaita. 9 Mayirai jararaidua ‹Daira Abrahán warrara›. Mʉ̃a mara jaraya Daizezebara ʉ̃tʉ zebiseabʉta naʉ̃ra mõgaradeba Abrahán warrara bꞌaita. 10 Zagarara bakuru karra kʼaitabʉ, maʉ̃ba bakuru neta bia dia ẽãra tʉda kʼãrãpe babʉedayi. 13 Mawũẽra Jesúsʼra wãsi Galileadeba Jordánʼena Juanba buru kʼoemarẽã. 14 Mamina Juanbara oẽ baibasi, iya jarasi: «Mʉ̃trʉ bʉabʉrʉ buru kʼoei kaude, ¿mʉ̃aʼa jarabʉka bʉta buru kʼoebimarẽã?». 15 Jesuba jarasi: «Iduaribira naʉ̃nebʉrʉ kʼãwũã berabarimarẽã, mawũã nebiata jõma aribaedaita». Mawũẽra Juanbara buru kʼoesi. 16 Jesu buru kʼoe kʼãrãpe doedaʉba ãĩ totosi, aramaʉ̃ta bajãrãra ewara ewaradrʉ totosi adewara iyara ũdusi Daizeze jaureta ʉ̃tʉba uruta pusira kĩrãkʼa, mõbe Jesús ʉ̃rʉ deguewata. 17 Mawũẽra bajãraneba nemita ũrĩsida, maʉ̃ba jarasi: «Naʉ̃ mʉ̃ Warra mʉ̃a kãgabʉra, mʉ̃a naʉ̃ta bia akʉbʉrua».