Génesis

49 Jacob’bara trʉ̃si iyi warrarata mõbe jarasi: «Ãba zeidua mʉ̃a jara ũrĩbita k’ãrẽta berabarita naʉ̃ ewari jõbodoare. 8 »Bʉta, Judá, bʉ mebẽrãra bʉ ʉ̃rʉ ibia bed’eadayi. Bʉ juwaba jidayi bʉ nejʉrara ochidau amiduduma. Bʉ zeze warrarãra bʉ nãã sãkokodebayi. 9 Judá bʉra leon wũãwũã zake. Warra, bʉa ne beadadeba wãsi. Iyira jewedape enaʉ̃bʉ leon kĩrãk’a. ¿K’aiba daʉbabi leon’ra? 10 Mia abaʉba nok’o bakuru Judá juwadebʉra jãrĩna ẽ, yõbarira nok’o bakurura ewari jõmaʉ̃nẽ iyi jĩrʉ k’awabayi Siló zeyeda, jõmaʉ̃ pʉwʉrʉba iyi bed’eata ũrĩnai baera. 11 Iya tajʉ̃ñi iyi burrura uba bakuruma akʉza burru wũãwũã zakera tajʉ̃ñi bakuru uba bi’iabʉma. Sʉgʉyi iyi wuara binoba adewara iyi wuara uba bade. 12 Iyi dabʉ jãra ʉgʉ kuarabʉ bino k’area akʉza iyi kidara totroabʉ leche k’area. 13 »Zabulón’ra bayi puza k’awa, barkora oʉ̃be k’awa. Drʉara Sidón’inʉ baya. 14 »Isacar’ra burru bʉwʉrʉ kĩrãk’a zareabʉta bulto ũme tapanʉ ẽzadra enaʉ̃bʉ. 15 Ũdubʉ mama enaʉ̃ira yibiata akʉza drʉa biata. Jira edabʉ maʉ̃ bulto okiwade atʉita, mawũã trajo zarea ojʉ̃drʉita. 16 »Dan, Israel mebẽrãnebemaba k’awua zok’ayi iyi pʉwʉrʉra. 17 Danbara ode k’awuabayi damane kĩrãk’a, dama kachubarabʉta odebʉ, kabayota kabʉ jĩrʉma mawũã yi baribʉra ẽkarra eda baebibʉ. 18 Jeowa, bʉta jʉ̃ãñi dai ẽdrʉbimarẽã. 19 »Nezrʉgamiarãra Gad ʉ̃rʉ zeyi, maʉ̃ k’area iyi maʉ̃rabawara yõñi mõbe iyara k’aidu pẽwãñi. 20 »Aserbara yiko mejãcha erbayi, adewara nok’o yiko kĩrãk’a diayi. 21 »Neftalíra begui wẽrã chĩã drazoa kirua akʉza kĩrãwãrẽa bed’eabʉa. 22 »Joséra bakuru neta zaʉmia tõnobʉ kĩrãk’abʉ, bakuru bi’ia zaʉbʉra do dabʉ bi’ia b’ai kiru k’awabʉ, bakuru juwa jiwinira muro ʉ̃rʉbʉ. 23 Enedrʉma yibarirabara, pẽwãpanasi maʉ̃ra iyima drʉsida akʉza mejãcha jʉradebasida. 24 Mamina ãyi enedrʉmara ariya taitaiabasi adewara ãyi juwara zareabasi akʉza meserabasi. Naʉ̃ra mawũãbasi Jacob juwata zareabasi baera, ẽbẽra obejara akʉbari k’area, Israel mõgara k’area. 25 Iyira zebʉrʉ bʉ zeze Daizezedeba akʉza Daizezeba k’arebayi. Iyira bʉ Daizeze jõma oseabʉme, adewara Daizezebara ʉ̃tʉbema nebiata diayi akʉza udabema nebiata, Judasbema nebiata, wũãwũã de nebiata. 26 Yi zeze nebia diaira audre yi zromabayi katuma bakikibarira akʉza audre yi zroma katuma zakeraira. Maʉ̃ta José buru ʉ̃rʉ bayi, iyi buru so yi mebẽrãne jidadata. 27 » Benjamínbara usapane kĩrãk’a tiekʉa kokʉayi iya beadara. Diapeda koyi iya beadara akʉza kewarare drayi ãya jidadara».