Salmo
72 Daizeze, diara bʉa zokʼabʉta nokʼoʼa akʉza diara bia aripe zokʼamarẽã nokʼo warraba. 2 Bia aripe daucha zokʼamarẽã Daizeze pʉwʉrʉta akʉza aripe zokʼamarẽã ẽbẽrarã kʼaiba kʼarebai neẽãra. 3 Katumarabara wedamarẽã neneẽã baita pʉwʉrʉita akʉza katuma wãzeba aripe omarẽã. 4 Iyita arare bedʼeamarẽã kʼaiba kʼarebai neẽare pʉwʉrʉde, kʼarebamarẽã kʼãrẽ neẽãbʉ wũãwũãrata, jõbimarẽã awʉrʉ zʉbʉria obʉra. 5 Ãyara wawiadayi ũmadaʉ bʉedara akʉza jedeko bʉedara ewari jõmaʉ̃nẽ. 6 Iyira kue chirua põnãna ʉ̃rʉ baebari kĩrãkʼabʉ, kue zroma drʉa ʉ̃rʉ baebari kĩrãkʼa bayi. 7 Maʉ̃ ewaridera yi aripe obʉra bia pãwãrañi akʉza neneẽã bayi badumae, jedeko neẽãñiena. 8 Iyara zokʼayi pusa jõma ʉ̃rʉ akʉza dodeba naʉ̃ drʉa jõmaʉ̃nẽ. 11 Nokʼorãra jõma yi kĩrãbita sãkokodebayi, drʉa jõmaʉ̃nebemara iyi nezokʼabayi. 12 Iyara kʼarebai baera kʼãrẽ neẽãbʉ iyaʼa kʼareba widibʉra akʉza kʼaiba kʼarebai neẽãbʉra. 13 So zʉbʉria akʉyi kʼãrẽ neẽãbʉra akʉza kʼaiba kʼarebai neẽãbʉra adewara ẽdrʉbiyi kʼãrẽ neẽãbʉra beidebara. 14 Ẽdrʉbiyi bedʼea zromaneba akʉza kayiruadeba akʉza ãyi wara mejãcha yibiabayi iyitara. 16 Bayi mejãcha netata naʉ̃ drʉade, katuma ʉ̃rʉra audre bayi. Maʉ̃ yi netara bayi Líbanonebema kĩrãk’a akʉza yi maʉ̃ pʉwʉrʉdebema ẽbẽra mejãcha bayi egorode chirua pãwãrabari kĩrãk’a. 18 Ibia bedʼeaidua Daizeze Jeowa ʉ̃rʉ, Israel Daizeze ʉ̃rʉ, iyabʉrʉ nekʼãrẽ audre yibiata obʉ baera. 19 Ibia bedʼeaidua iyi trʉ̃ ʉ̃rʉ ewari jõmaʉ̃nẽ akʉza iyi zareaba biramarẽã naʉ̃ drʉa jõma. Mawũã, mawũã.