Daizezebara parãsi yumakẽrãta akʉza yuwẽrãta

Jeowabara parãsi drʉa kĩrãwãreã Edén drʉade. Maʉ̃ drʉa kĩrãwãreãnẽra mejãchabasi neponorata, nedʉwʉrʉrata akʉza bakururata. Daizezebara nãã parãsi yumakẽrã aba, maʉ̃ trʉ̃ra Adánbasi. Jeowaba egorodeba parãsi maʉ̃ yumakẽrãta, maʉ̃are kĩbʉma jãrapuasi, ¿kʼaubʉka maʉ̃ba kʼãrẽta berabarisita? ¡Maʉ̃ yumakẽrãra zokʼai besi! Jeowaba jarasi Adánʼa drʉa kĩrãwãreãta akʉmarẽã akʉza nedʉwʉrʉrata trʉ̃ diamarẽã.

Jeowabara Adánʼara nekʼãrẽ biata omarẽã zokʼasi. Maʉ̃ne jarasi: «Bʉara koseabʉ jõma bakurudebema netara, mamina bʉ bakuruta aba, maʉ̃ netara kobe ẽ, jipa awuarabʉ baera. Maʉ̃ kobʉrʉdera bʉra beiyi».

Maʉ̃ tẽã Jeowaba jarasi: «Mʉ̃a oyi ẽbẽra aba, Adánta kʼarebamarẽã». Jeowabara osi Adánta kʼãĩ ara kʼãĩmarẽã, mawũã Adán orrodeba yuwẽrã parãita. Maʉ̃ trʉ̃ra Evabasi, maʉ̃ra diasi Adánʼa yi kima bamarẽã. Adán Evaʉ̃mera nããrabema ẽbẽrarãbasi akʉza nããrabema kima arabasi. ¿Adánʼra sãwũãsi yi kima ũdusidera? Iyira mejãcha sobia kʼãrãpe jarasi: «¡Jeowaba yuwẽrã mʉ̃ orrodeba parãsi baera, iyira mʉ̃ kĩrãkʼa bʉa!».

Jeowabara jarasi Adánʼa akʉza Evaʼa wũãwũãrata todamarẽã, mawũã naʉ̃ drʉata ẽbẽrarãba biradamarẽã. Jeowabara kãgabasi Adánta Evaʉ̃mera sobia trajadamarẽã, naʉ̃ drʉa jõma kĩrãwãreã bamarẽã, Edén drʉa bada kĩrãkʼa. Mamina maʉ̃ra mawũã berabari e basi, ¿kʼãrẽa? Maʉ̃ra akʉdayi wuarebema kapitulode.