Zʉbʉria 4deba 9 bayedadebemata

Jeowaba jarasi Moisésʼa akʉza Aarónʼa naʉ̃ bedʼeata jaramarẽã paraonʼa: «Bʉa mʉ̃ pʉwʉrʉta idu bʉe ẽ bʉrʉ, mʉ̃ara zokʼayi ororota, bʉ pʉwʉrʉeda zemarẽã». Ororora ũgana zroma kĩrãkʼabʉ, maʉ̃bara pʉa kabʉ. Egipsiora dedara ororora mejãcha edabasi, ẽbẽra yi plata neẽmae akʉza yi plata baramae. Jõma pʉwʉrʉra orororaba birasi. Mamina Gosén drʉadera, israelita badamaera, mia kʼãrẽsida neẽbasi ororora, maʉ̃ra yi zʉbʉria kimarenebemabasi. Maʉ̃neba ʉ̃ta egipsioratrʉ zʉbʉriasi. Paraonbara jarada ʉ̃rʉ jarasi Moisésʼa: «Jarada Jeowa ãĩ bʉemarẽã ororora mejãchabʉra, mawũãra mʉ̃ara idu bʉeyi israelitarãra». Jeowabara ãĩ bʉesi ororora, mawũãsidu paraonbara bʉeamabasi israelitarãra. ¿Paraonba israelitara idu bʉei ewarira zeibasika?

Maʉ̃are Jeowaba jarasi: «Paraonba israelitarata idu bʉe ẽ bʉrʉ, mawũãra Egiptode nedʉwʉrʉrabʉra kaya kʼãrãpe beikʉayi». Maʉ̃ nrʉema Jeowaba nedʉwʉrʉra ʉ̃rʉ jarada kĩrãkʼa aripe berabarisi, mamina israelitara badamaera, nedʉwʉrʉra neida berabari ẽ basi. Paraonbara jipa ũrĩkĩrã ẽ basi akʉza iyimabʉta obasi, maʉ̃ba idu bʉeamabasi israelitarãra.

Jeowabara jarasi Moisésʼa paraonʼinʉ wãmarẽã, mõbe itarrata jamapomarẽã. Maʉ̃ mawũã itarra jamapodadeba jõma egipsiorabʉ ʉ̃rʉ baesi, maʉ̃ba osi egipsiorãra akʉza ãyi nedʉwʉrʉrata badaya mõga mõgadrʉmarẽã. Mawũãsidu paraonbara jarasi israelitarãra idu bʉe ẽãta.

Jeowabara akʉza zokʼasi Moisésta paraonʼinʉ bedʼea jʉ̃ẽmarẽã. Iya jarasi: «¿Idibasidu bʉara mʉ̃ pʉwʉrʉra bʉeamabʉka? Mʉ̃ara oyi nʉ kuetata baemarẽã». Maʉ̃ra mawũã aripe berabarisi. Jeowabara zokʼasi bata, bachidiwabʉta akʉza kuetata. Maʉ̃ba osi jõma nekʼãrẽ ne ubadara ãrĩmarẽã, mamina Gosén drʉadera neida berabari ẽ basi. Maʉ̃ne paraonba jarasi: «Jarada Jeowa naʉ̃ta taʉbimarẽã, mawũãra bʉeyi mʉ̃ara». Mamina maʉ̃ kuetata akʉza ba taʉsidera, paraonʼra awuara krĩcha besi akʉza.

Maʉ̃ kʼarea Moisésba jarasi: «Adichichibara jõma makoyi pʉãdrʉ zromaba nekʼãrẽ chirua amaenara». Adichichi mejãcha zedaba jõma ne uta akʉza nekʼãrẽ bakurura badata makokʉasida. Paraonba widisi Moisésʼa: «Jeowaʼa wididua ãĩ bʉedamarẽã maʉ̃ra adichichi zromarãra». Jeowaba maʉ̃ra adichichi zromara neẽã oside, paraonbara israelitarãra bʉeamabasi.

Tẽã Jeowaba Moisésʼa naʉ̃ta jarasi: «Juwa ʉ̃ta wuara». Aramaʉ̃ta audre ẽãne jõma pãrĩgʉa totosi. Egipsiorabara mia kʼãrẽsida ũduda ẽ basi ewari ũbeabayeda, israelitara bʉmaebʉrʉ jõma ũnabasi.

Paraonba jarasi Moisésʼa: «Bʉta bʉ pʉwʉrʉme wãseabʉ, mamina nama amaera nedʉwʉrʉrãra». Moisésba panʉsi: «Daibara edeibara dai nedʉwʉrʉrãra, mawũa sakripisio oita Jeowaita». Paraonʼra mejãcha kĩrʉpe jarasi: «¡Namaʉ̃bara jirabora! Mʉ̃a jẽda ũdura beayi bʉra».