Rahabʼba merasi miaordamiarãra

Miaordamiara israelitarãra wãsida Jericó pʉwʉrʉeda akʉza ãyira jʉ̃ẽsi ẽbẽra wẽrã Rahab deda. Jericódebema nokʼoba kʼawuaside zokʼasi gorogororata Rahab deda. Rahabʼbara miaordamiarãra iyi de ʉ̃tre merasi, adewara jarasi gorogorora miordamiarãra jãpe jʉrʉ wãmarẽã. Mõbe Rahabʼbara jarasi miaordamiara: «Mʉ̃a kʼarebayi marara, kʼaubʉ baera Jeowara marabawarabʉta akʉza kʼarebayi naʉ̃ drʉa marane bʼaita. Mʉ̃ bia oda kʼãrãpe mʉ̃ mebẽrãta ẽdrʉbidua».

Miaordamiaraba jarasida Rahabʼa: «Bʉa jʉ̃kara pʉrrʉta tajʉra bʉ bentanane, ẽbẽrarã jõma bʉ dedabʉra kʼãrẽ berabari ẽ bayi. Mawũã bʉ mebẽrãra bei ẽ bayi».

Rahabʼba kʼarebasi miaordamiarãra iyi de bentananeba ãĩ wãnamarẽã Jericó pʉwʉrʉdeba. Miaordamiarãra ewari ũbeabayeda mĩrʉsida, Josuéma wãi nãã. Maʉ̃ tẽã israelitarãra do Jordánta kĩrãbarisida, mõbe ãyira maʉ̃ drʉama wãñawapanasi. Jericó pʉwʉrʉta nããra jidadaibasi. Jeowaba jarasi Jericó pʉwʉrʉ audu, burgama aba burgadamarẽã ewariza. Mawũã osida ewari 6 bayeda. Ewari 7 babʉrʉde burgama 7 burgasida pʉwʉrʉ audu. Maʉ̃are saserdoterabara biabisida chirurata akʉza israelita gorogororãra ãyi zarea jõma jʉrasida. Mõbe maʉ̃ pʉwʉrʉ murora bogozoa totosi, Rahab dera maʉ̃ murodebasimina bogozoa ẽ basi. Rahabʼra iyi mebẽrãbawara beida ẽ basi, iya Jeowa ʉ̃rʉ ĩjãsi baera.