Jeowara mesera kĩrʉ ẽ basi Jonásʼʉ̃mera

Asiriade basi pʉwʉrʉ Níniveta, maʉ̃ pʉwʉrʉdebema ẽbẽrarã so kayiruarabasi. Jeowaba jarasi Jonásʼa wãmarẽã maʉ̃ pʉwʉrʉ Níniveidu, mõbe maʉ̃ra ẽbẽrarã jaramarẽã ãyara awuara oibarabasita. Jonásʼra Nínive eda wãi kaude barkode aña wãsi pʉwʉrʉ Tarsisʼeda.

Ãyi puza ẽzadra wãne pʉãdrʉ zromata zesi akʉza ẽbẽrarã maʉ̃ barkodebadara mejãcha perasida. Ãyira ãyi daizezeʼa yiwidʼi jʉ̃drʉsida, ãya jarasida: «¿Daira kʼãrẽa kʼãwũã berabaribara?». Jonásba jarasi: «Jõma naʉ̃ra kʼãwũã berabarinʉmʉ mʉ̃a Daizeze Jeowa bedʼeata ũrĩ ẽ basi baera. Mʉ̃ra iyideba mĩrʉ wã. Mʉ̃ta doi balbʉeidua mawũã naʉ̃ pʉãdrʉ zromata taʉmarẽã». Ẽbẽrarãbara doi balbʉeamapanasi Jonásʼra. Mamina Jonásba jarada ʉ̃rʉ jarasi iyita doi balbʉemarẽã. Mawũẽra ãya Jonásʼra doi balbʉesida mawũã pʉãdrʉ zromanʉmanara taʉ totosi.

Jonásbara krĩchasi iyira beita. Iyi puza ẽzadra ta wãne Jeowaʼa yiwidʼisi. Mawũẽra Jeowabara beda zromata zokʼasi Jonásta mimarẽã, mamina bea ẽ basi. Jonásʼra iyi beda zroma biteda bʉde Daizezeʼa yiwidʼisi: «Idiba ʉ̃ta bʉa mʉ̃aʼa jarabʉra jõma oyi». Jeowabara Jonásʼra beda biteda babisi ewari ũbeabayeda. Maʉ̃are osi maʉ̃ bedaba puza oriya wue bʉemarẽã.

Jeowaba kʼarebasi Jonásʼra. ¿Mawũã kʼarebadaba jarakĩrãkʉasika Jonásʼra Níniveʼeda wã ẽ baibarata? Mawũã ẽ. Jeowabara akʉza zokʼasi Jonásʼra wãmarẽã, naʉ̃nebʉrʉ wãrĩnu wãsi. Jonás Níniveʼeda jʉ̃ẽ kʼãrãpe ẽbẽra kayiruara jarasi: «Ewari 40 babʉrʉde Jeowabara ẽbẽrarã Nínivedebemara makenañi». Mawũẽra ãya kʼawua ẽ badata berabarisi. Nokʼo Nínivedebemaba jarasi iya zokʼabʉ ẽbẽrarã: «Daizezeʼa yiwidʼidua, mõbe nekʼãrẽta bia ojʉ̃drʉidua, mawũã ora makena ẽ baikĩrã dayirãra». Jeowaba wãrĩnu ũdubʉrʉde ẽbẽrarã wãrĩnu soiduba bia ojʉ̃drʉsidera makena ẽ basi.

Jonásʼra Jeowaba ẽbẽrarãta makena ẽ basi baera kĩrʉ totosi. Krĩchara naʉ̃ta: Jeowara mesera kĩrʉ ẽ basi Jonásʼʉ̃mera akʉza so zʉbʉria akʉsi Jonásʼta. Mamina Jonásbara so borekea akʉ ẽ basi ẽbẽrarã Nínivedebemara. Awuarabʉrʉ iyira Nínive pʉwʉrʉdeba ara jĩga wã kʼãrãpe, ãburuburu pãwãrana edre kĩrʉ edaʉchu besi, maʉ̃ne ãburuburu ne ura bagʉ totosi. Maʉ̃ba Jonásʼra mejãcha kĩrʉ totosi. Maʉ̃ kʼarea Jeowaba jarasi: «¿Bʉitara audre bigaka naʉ̃ ne uta ẽbẽrarã Nínivede nʉmʉira? Mʉ̃a kʼaʉ̃ra ẽbẽrarã so borekea akʉsi, maʉ̃ba ãyira beida ẽ basi». ¿Kʼãrẽta jaradiakĩrãkʉasi Jeowabara Jonásʼra? Ẽbẽrarã Nínivedebʉra audre yibiabasi maʉ̃ ne uira.