Nokʼora ewari jõmaʉ̃nẽ bayi

Ewari aba diamasi Nabucodonosorʼra iya jʉ̃ã ẽ badata kʼãĩmokʼãrãsi. Mawũã kʼãĩmokʼãrãdaba iyira mejãcha krĩcha zroma osi, maʉ̃ba wua kʼãĩbe ẽ basi. Maʉ̃ kʼarea trʉ̃ bʉesi jaibanarata. Mõbe jarasi: «Mʉ̃a kʼãĩmokʼãrãdata jara ũrĩbidua». Ãya jarasi: «Nebʉrada bʉ kʼãĩmokʼãrãdata». Nabucodonosorba jarasi: «¡Mawũã ẽ! Awuarabʉrʉ marabʉrʉ jara ũrĩbidua mʉ̃a kʼãrẽ kʼãĩmokʼãrãdata. Maraba mʉ̃aʼa jarada ẽ bʉrʉ mʉ̃a marara beayi». Ãya jẽda jarasi: «Jarada daiʼa bʉa kʼãĩmokʼãrãdata, mawũã daiba jara ũrĩbita kʼãrẽta jarakĩrãbʉta». Nabucodonosorba jarasi: «Maraba mʉ̃ra sewakĩrãbʉ, ¡jaraidua mʉ̃ kʼãrẽ kʼãĩmokʼãrãdata!». Ãya panʉsi: «Miõba kʼawuabeda ẽ bʉ kʼãĩmokʼãrãdara».

Nabucodonosorʼra mejãcha kĩrʉbʉba jõma bea zokʼasi ẽbẽrarã buru biarãra akʉza jaibanarata. Maʉ̃ne edabasi Danielta, Mesacta, Abednegota akʉza Sadracta. Mamina Danielbara widisi nokʼoʼa ewarita diamarẽã. Danielta akʉza yi neũdukʼawuara ũbea Jeowa yiwidʼisida ãyita kʼarebamarẽã. Maʉ̃ne, ¿kʼãrẽta osi Jeowabara?

Jeowabara ũdubisi Danielʼa Nabucodonosor kʼãrẽ kʼãĩmokʼãrãdata. Adewara jara ũrĩbisi kʼãrẽta jarakĩrãbasita Nabucodonosor kʼãĩmokʼãrãdara. Maʉ̃ nrʉema Danielʼra jʉ̃ẽsi Nabucodonosor nezokʼaidu, mõbe jarasi: «Buru biadebemarãra mia abaʉta bearãra. Mʉ̃a jara ũrĩbiseabʉ kʼãrẽta kʼãĩmokʼãrãsita nokʼora». Nabucodonosor nezokʼaba edesi Danielʼra nokʼo bʉidu. Danielba jarasi nokʼoʼa: «Daizezeba jarabʉ ʉ̃ra zeide kʼãrẽ berabarita. Naʉ̃ta bʉ kʼãĩmokʼãrã: bʉa ũdusi muñeko zromata. Yi burura oro omabasi, trʉ̃ata akʉza yi juwata plata omabasi. Yi bita akʉza yi bakarata kobre omabasi. Yi jĩrʉta jiorro omabasi akʉza yi jĩrʉ jiwinita jiorraba akʉza egorobaba basi. Maʉ̃ tẽã katumaneba ʉ̃tʉ zesi mõgarata akʉza jĩrʉma deguesi. Naʉ̃ muñeko zromata todozoa totosi, mõbe polbobasi, mawũã pʉãdrʉba edesi. Waya maʉ̃ mõgarara katuma zroma ba totosi, maʉ̃ra drʉa jõmaʉ̃nẽbasi».

Maʉ̃ tẽã Danielba jarasi: «Bʉ kʼãĩmokʼãrãbara naʉ̃ta jarakĩrãbʉ: bʉ nokʼora maʉ̃ muñeko zroma buru oro oma kĩrãkʼabʉ. Waya plata omabara jarakĩrãbʉ awuru nokʼo bʉare zeita. Kobrera jarakĩrãbʉ awuru nokʼo zeita akʉza naʉ̃ drʉa jõma zokʼa jʉ̃drʉita. Waya awuru nokʼo zebʉrʉra mejãcha zareabayi jiorro kĩrãkʼa. Akʉza tẽã awuru nokʼota bayi, maʉ̃ra bayi egoro kĩrãkʼa boregueabʉta akʉza jiorro kĩrãkʼa zareabʉta. Jari mõgara katuma badogora Daizeze Nokʼobayi. Maʉ̃bara jõma jõbiyi nokʼora naʉ̃ drʉadebʉra akʉza zokʼabayi ewari jõmaʉ̃nẽ».

Nabucodonosorʼra Daniel kĩrãbita sãkokodekʉbe kʼãrãpe jarasi: «Bʉ Daizezeba aripe jarabisi mʉ̃ kʼãĩmokʼãrãra. Kaʉ̃ kĩrãkʼara awuru daizezera neẽ». Nabucodonosorba Daniel beai kʼaude buru biara nokʼo babisi akʉza Babilonia pʉwʉrʉdebemata zokʼabisi. ¿Bʉara kʼawuasika Jeowabara sãwũã panʉsita Daniel yiwidʼira?