Elisabetʼra wũãwũã barabʉ

Saserdote Zacaríasta iyi kima Elisabetʼʉ̃mera basi Jerusalén kʼawa. 400 poaga berabarisi Jerusalén murora ara odapeadadeba. Zacaríasta Elisabetʼʉ̃mera ãyi juwa jidadapeada dããrabasimina, wũãwũã neẽãpanasi. Ewari aba Zacaríasbara insiensota banʉmʉne santuario templodebemane, iya ũdusi angel Gabrielta, Zacaríasʼra mejãcha perasi. Mamina Angel Gabrielba jarasi: «Perarãra mʉ̃ara bedʼea biata erbʉ bʉita Daizezeba jaramarẽã zokʼadata. Bʉ kimabara yumakẽrã zaketa toyi, yi trʉ̃ra Juanbayi. Jeowabara iyira jidasi trajo yibiata omarẽã». Zacaríasba widisi: «¿Mʉ̃a sãwũã kʼawuai bʉa jarabʉra wãrĩnuta? Mʉ̃ kimata mʉ̃mera zõnababʉda wũãwũã baraira». Gabrielba panʉsi: «Daizezeba zokʼasi naʉ̃ bedʼea biata bʉaʼa jaramarẽã, mamina bʉa ĩjã ẽ basi baera bʉra bedʼeabe ẽ bayi wũãwũã todayieda».

Zacaríasʼra ewari biobasi santuariode, mawũã iyi ãĩ wãside ẽbẽrarã ãĩ badara kʼawuakĩrãbasi kʼãrẽta berabarisita. Iyira bedʼeabe ẽ basi baera, juwaba nekʼãrẽ obasi ẽbẽrarãba kʼawuadamarẽã iyi kʼãrẽ berabaridata. Mawũã ẽbẽrarãbara kʼawuasi Daizezeba iya bedʼeata jara amaesita.

Tẽã Elisabetʼra maʉ̃ angelba jarada kĩrãkʼa yumakẽrã zaketa tosi. Elisabet mebẽrãta akʉza neũdukʼawuarata zesida wũãwũã ũdu kʼawuade, ãyira mejãcha sobiapanasi Elisabet kʼarea. Elisabetba jarasi: «Wũãwũã trʉ̃ra Juanbayi». Ãya panʉsida: «Maʉ̃ trʉ̃ kĩrãkʼara neẽ bʉ mebẽrãnebemara, ¿kʼãrẽa marabara trʉ̃ga ẽ Zacarías yi zeze kĩrãkʼa?». Mamina Zacaríasba bʉsi: «Iyi trʉ̃ra Juan». Maʉ̃ ewaride Zacarías akʉza jẽda bedʼeasi. Ẽbẽrarã Judeadebema jõmaʉ̃ba kʼawuasida maʉ̃ ʉ̃rʉra, maʉ̃ kʼarea ãya widisida: «Naʉ̃ wũãwũã yi zroma babʉrʉdera, ¿kʼãrẽta oi?».

Zacarías ʉ̃rʉ Daizeze jaure zareata zesi baera iya naʉ̃ propesiata jarasi: «¡Jeowa ʉ̃rʉ ibia bedʼeaidua! Iya jarasi Abrahán zokʼaita Dayirã ẽdrʉbibarita. Juanʼra propetabayi, bedʼeai baera Dayirã ẽdrʉbibari ʉ̃rʉ».

Elisabet mebẽrãnebemasida nekʼãrẽ biata berabarisi, maʉ̃ trʉ̃ra Maríabasi. Akʉdaya kʼãrẽta berabarisita wuarebema kapitulode.