Jesúsba templode nekayirua opananata ara osi

Poaga 30, abril jedeko kʼaita Jesúsʼra Jerusalénʼena wãsibaibara. Ẽbẽra mejãchaʉta wãsida Pascua piesta odaita. Mama diapanasida nedʉwʉrʉrata oprenda diadaita templode. Ʉ̃kʉrʉbara ãyi nedʉwʉrʉta edepanasi, mamina ʉ̃kʉrʉrabara Jerusalénʼne edapanasi.

Jesús temploidu jʉ̃ẽside ũdusi ẽbẽrarãbara nedʉwʉrata nẽdopanʉta, ¡mamina templode Daizezeʼabʉrʉ yiwidʼibarabasi! ¿Kʼãrẽta osi Jesúsbara? Jesúsbara rejoba ãĩ jʉrekʉasi obejarata, pakarata akʉza mesade nẽdobariraba plata erbadasida egoro eda kʉetasi. Jesúsba jarasi pusira nẽdopananara: «¡Kʼaʉ̃ra kamaʉ̃ba ãĩ bʉeidua, mʉ̃ Zeze dera ne nẽdobari de ẽ!».

Ẽbẽrarã templode pananabara kĩrãmiga akʉpanasi Jesúsʼra iya oda kʼarea. Iyi kʼaidubemarabara kĩrãbesida propesia abaʉba jarabʉta Dayirã ẽdrʉbibari ʉ̃rʉ: «Mʉ̃ara Jeowa dera wawia akʉyi».

Tẽã poaga 33de Jesúsbara akʉza jẽda ara ojʉ̃ẽsi templode ẽbẽrarãba aña opananarãra. Jesúsbara iduaribi ẽ basi ẽbẽrarãba nekayiruata odamarẽã yi Zeze dedara.