Jesúsʼra iyi bei nãã iyi apostolerabawara nekosi

Judiorabara poagaza opanasi Pascuara, maʉ̃ra opanasi 14 nisánʼne. Maʉ̃ba ãyaʼa kĩrãbebibasi sãwũã Jeowaba ãyi Egiptodeba ẽdrʉbidata wua nezokʼa ba ẽ bamarẽã akʉza sãwũã Jeowaba Drʉa diaya adama ededata. Poaga 33de Jesúsba akʉza iyi apostolerabawaraʉba osida Pascuata, Jerusalénʼne ẽbẽra deda. Ãyi nekoda tẽã, Jesúsba jarasi: «Maranebema abaʉta mʉ̃ ʉ̃rʉbayi». Jesús kʼaidupanʉrãra ãyirai yi akʉdrʉ toto kʼãrãpe jarasida: «¿Kʼaiba oi maʉ̃ra?». Jesúsba jarasi: «Mʉ̃a maʉ̃ yumakẽrã pan diabʉrʉta, iyi». Aramaʉ̃ta iya Judas Iscarioteʼa panta diasi. Maʉ̃ne Judas piradrʉ kʼãrãpe wãsi.

Maʉ̃ tẽã Jesúsʼra yiwidʼisi, panta jida kʼãrãpe iyi apostolera panta dedekasi. Jesúsba jarasi: «Koidua naʉ̃ panta. Naʉ̃ panbara jarakĩrãbʉ mʉ̃ kakuata, maʉ̃ta mara diakĩrãbʉ». Akʉza bino jidada kʼãrãpe yiwidʼisi akʉza iyi apostolera dedeka kʼãrãpe jarasi: «Doidua naʉ̃ binota, naʉ̃ binobara jarakĩrãbʉ mʉ̃ wata. Naʉ̃ta mara diayi, mara nekayirua kĩrãduaita. Marara mʉ̃me ʉ̃tʉ bayi nokʼo kĩrãkʼa. Naʉ̃ta oidua poagaza mʉ̃ kĩrãbedamarẽã». Idibasidu Jesús kʼaidupanʉrãra poagaza mawũã ãba yi jʉrepanʉ, iyabaʉ ewaride, mamina diamasi. Maʉ̃ trʉ̃ra kapũrĩa bedʼeade Cena del Señor.

Ãyi mawũã neko berabarida tẽã Jesús apostolerãra akʉza bedʼea jʉ̃drʉsida kʼaita audre yi zroma bʼai ʉ̃rʉ. Mamina Jesúsba jarasi: «Maranebema audre yi zroma bʼaira eda krĩchabʉta ũdubibara».

Adewara Jesúsba jarasi: «Marara mʉ̃ neũdukʼawua. Maʉ̃ kʼarea jõma mʉ̃ Zezeba mʉ̃a jaradara maraʼa jaraya. Mʉ̃ra aranʉ wãñi mʉ̃ Zezema ʉ̃ta. Marara nama bayi akʉza jõmaʉ̃ba kʼawuadayi marara mʉ̃ kʼaidubemata, yiya kãga ũdubidai baera. Mayirai yiya kãga ũdubidaibara mʉ̃a mara kãga ũdubida kĩrãkʼa».

Maʉ̃ne Jesúsba Jeowaʼa widisi iyi kʼaidupanʉrata akʉmarẽã akʉza kʼarebamarẽã ãba bʼaita akʉza aduʼa bʼaita. Akʉza yiwidʼisi Jeowa trʉ̃ neneẽã erbaita. Maʉ̃ tẽã Jesústa iyi apostolerabawara trãna kʼãrãpe wãsida. Maʉ̃ne ewari wika waebasi Jesús jidadaita.