Pablota edesida Romaena

Pablobara akʉza jaradia wãsi pʉwʉrʉ awuara awuaraka. Iyi jẽda deda wãi naweda jaradia jʉ̃ẽsi Jerusalénʼinʉ, mamina iyira mamara karselde bʉesida. Tẽã diamasi iyi karselde bʉde, Jesúsba jarasi: «Bʉra Romaena jaradiade wãñi». Aramaʉ̃ta gorogororabara edesida Pablora Jerusalénʼneba Cesareaeda, mama poaga ũmebayeda basi eda karselde. Ewari aba Pablo nokʼo Festo nãã baside, naʉ̃ta jarasi: «Mʉ̃ra wãkĩrãbʉ Romaena, mawũã nokʼo Romanebema Césarba kʼawua jaramarẽã». Festoba jarasi: «Bʉa Césarba kʼawua omarẽã kãgabʉbʉrʉ, mama zokʼayi». Pablora eda barcode bʉesida Romaena ededaita. Iyi kʼaidu wãsida: Lucasta Aristarcoʉ̃me, maʉ̃rasida kristianorabasi.

Ãyi puza ẽzadra babʉrʉde mejãcha zesi kueta, kuera taʉ ẽ basi ewari biobayeda. Maʉ̃ barcode eda badarabara krĩchasida ãyira beita. Maʉ̃ne Pabloba jarasi: «Angel abaʉba mʉ̃aʼa jarasi kʼãĩmokʼãrãde: ‹Peraraidua. Marara jʉ̃ẽñi Romaena, jõma eda barcodebʉra beida ẽ bayi›. ¡Maʉ̃ kʼarea so zarea bʼaidua! Dayirãra bei ẽ bayi».

Kuera zesi 14 ewaribayeda, maʉ̃ tẽã ãyara barcodeba ũdusi drʉata, maʉ̃ra Malta islabasi. Ãyi mama barcode wãne barcora ãrĩ wãsi, maʉ̃ba puzade jõma doi wãsida ẽbẽrarãra. Mawũãsidu ẽbẽrarãra 276 badarãra beida ẽ basi, ʉ̃kʉrʉ drʉa põasãeda dowigui wãsida akʉza ʉ̃kʉrʉta bakuru ʉ̃rʉ dowigui wãsida. Ẽbẽrarã Maltadebemabara kʼarebade jʉ̃ẽsida akʉza tʉbʉta pʉrea odiasida, mawũã tʉbʉ pʉreama jʉ̃wʉrʉanamarẽã.

Jedeko ũbea berabarida tẽã, gorogororabara Pablota edesida Romaena, mama mebẽrãbara iyira jʉ̃ãbarabasi. Maʉ̃ ũdubʉrʉba Pablora so zarea diasi akʉza Daizezeʼa biga diasi. Gorogororabara karselde eda bʉesi, mamina naʉ̃nera de abaʉdeba pikibaibarabasi akʉza Pablora gorogoro abaʉba akʉbasi aña wa ẽ bamarẽã. Maʉ̃ deda iyira poaga ũmebasi. Ẽbẽrarãbara iyira akʉ wãpanasi baera, iyara jaradiabasi Daizeze ʉ̃rʉ akʉza Jesús ʉ̃rʉ. Adewara bʉbasi kartata mebẽrã kongregasionʼra Asia Menordebemaraita akʉza Judeadebemaraita. Jeowabara Pablodeba iyi ʉ̃rʉ mejãcha jaradiabisi pʉwʉrʉra bioʼa.