«Zebira bʉ Nokʼota»

Jeowaba jarasi: «Neẽbayi beita, pʉata, kayata akʉza so zʉbʉriaita. Mʉ̃ara jõbiyi daʉbara akʉza jẽda kĩrãbeda ẽ bayi nekayirua berabaridara».

Jeowabara Adánta Evaʉ̃me bʉesi drʉa kĩrãwãreãnẽ mawũã sobiapanamarẽã. Ãyira Daizezeʼabʉrʉ yiwidʼibarabasi akʉza toda kʼãrãpe naʉ̃ drʉata ẽbẽrarãba biradaibarabasi. Mamina ãyara ũrĩ ẽ basi Jeowa bedʼeara, mawũãsidu Jeowaba iya nãã kʼãrẽ oita krĩchabadara aribia krĩchabʉ oita. Naʉ̃ librode kʼawuasida Jeowaba jaradara aripe berabaribibʉta. Iyi Nokʼodeba nebiata mejãcha weyi naʉ̃ drʉade, maʉ̃ berabʉrʉdera iya aripe berabaribiyi Abrahánʼa jarabaridata.

Aranʉbai Diaruta, angelera kayiruarata akʉza ẽbẽra kayiruarata beiyi. Jõmaʉ̃ta Daizezeʼa yiwidʼidayi. Beida ẽ bayi akʉza kayada ẽ bayi, awuarabʉrʉ nrʉemaza zareabara piradrʉdayi akʉza sobia. Naʉ̃ drʉara ẽjũã kĩrãwãreãbayi. Erpanañi mejãcha yikota, yiko warrata akʉza de biata erpanañi. Neẽbayi ẽbẽra kayiruarãra, jõmaʉ̃ta ẽbẽra biabayi. Perada ẽ bayi nedʉwʉrʉra mẽsia kʼareabida.

Jipa arigʉ yibiabayi Jeowaba beidara jẽda piradrʉbibʉrʉdera. Dayirãbara bia edadayi ẽbẽrarã jẽda piradrʉbʉrʉdera, bari jaradaita: Abel, Noé, Abrahán, Sara, Moisés, Rut, Ester akʉza David. Ãya kʼarebayi naʉ̃ drʉara jẽda kĩrãwãreã bamarẽã. Ewari jõmaʉ̃nẽ erbayi nekʼãrẽ bia odaita.

Jeowabara kãgabʉ bʉra ẽjũã kĩrãwãreãnẽ bamarẽã. Mamara audre kʼawuadayi Daizeze ʉ̃rʉ, dayirãba kʼawuakabadata. Maʉ̃ kʼarea, ¡zarea odadrʉ audre Jeowa kʼawa bʼaita idi ewade akʉza ewari jõmaʉ̃nẽ!