«Kãgabasi iyi dobaʉba wãrĩnura ũdukʼawuamarẽã»

MɄ̃ NEBɄRATA:

Mʉ̃ra tosida Santo Domingode (República Dominicana), daira kimarepanasi maʉ̃ranebemara mʉ̃ra yi tẽãbemabasi. Mʉ̃ yibarirabara nekʼãrẽ mejãcha kʼawuabasi baera maʉ̃ba kãgapanasida daira biapanamarẽã. 4 poaga mʉ̃ todai naweda, mʉ̃ yibarirabara ũdukʼawuasida yumakẽrãra ũme religion mormónʼnebemata, maʉ̃ ẽbẽrarã bia yobasi akʉza wuabemara ẽbẽrarãta bia edabasi, maʉ̃ kʼarea mʉ̃ yibarirãra mejãcha kĩrãmigasida. República Dominicanane mʉ̃ mebẽrãta nããra iwãsi iglesia mormónʼnane (Iglesia de Jesucristo de los Santos de los Últimos Días).

Mʉ̃ra edabasi maʉ̃ iglesiade nekʼãrẽ jõma obʉdade, maʉ̃ iglesiadebemara mʉ̃ara audre kãgabasi mebẽrã ʉ̃rʉ mejãcha krĩchasida baera akʉza ẽbẽrarãra ẽbẽra biapanamarẽã, mʉ̃ra mejãcha sobiabasi maʉ̃ religionebʉ baera. Maʉ̃ba krĩchasi maʉ̃ religionebema misionero ba zeita.

Mʉ̃ 18 poaga babʉrʉde mʉ̃ mebẽrãra wãsi Estados Unidosʼeda, mawũã mʉ̃ta universidade estudiamarẽã. Poaga aba berabarida tẽã mʉ̃ yãbarãra jʉ̃ẽsi dai akʉde Floridaeda, ãyira Jeowa ʉ̃rʉ Kʼawuabipanʉrã. Ãya jarasida ãyi kʼaidu wãmarẽã asambleaeda, mama kʼawuaibasi Daizeze Bedʼea ʉ̃rʉ. Mʉ̃ara kãgasi ẽbẽrarãba Daizeze Bedʼea jʉrʉpananata akʉza ãya sãwũã kʼawuada ʉ̃rʉ bʉpananata, maʉ̃ kʼarea mʉ̃a jarasi diadamarẽã kuadernota lapizʼʉ̃me mʉ̃abida ãyide kĩrãkʼa oita.

Asamblea berabarida tẽã mʉ̃ yãbaraba jarasi mʉ̃ta misionero bakĩrãbʉ baera, kʼarebakĩrãbʉta audre Daizeze Bedʼeata ũdu kʼawuadamarẽã. Mʉ̃ita maʉ̃ra yibiabasi mʉ̃ara audrera kʼawuabasi Libro de Mormón ʉ̃rʉ Daizeze Bedʼeaira.

SÃWŨÃ AWUARA BABISI DAIZEZE BEDʼEABARA MɄ̃ BEBɄRA:

Ãyi wãna tẽã daira bedʼeabasi selulardeba Daizeze Bedʼea ʉ̃rʉ. Ãyara mʉ̃aʼa jarabasi mʉ̃a ĩjãbʉta Daizeze Bedʼeaʉ̃me akʉmarẽã, ãyara kãgabasi mʉ̃ara wãrĩnuta mʉ̃yidobaʉba ũdukʼawuadamarẽã.

Mʉ̃a krĩchabasi mʉ̃ religionba jaradiabadara wãrĩnubasita, mamina mʉ̃a akʉsi ãya jaradiabadara abarika ba ẽ basita Daizeze Bedʼeaba jarabʉmera. Mʉ̃ yãba yõdraba zokʼa bʉesi karta ¡Despertad! 8 noviembre 1995⁠de, maʉ̃ra bedʼeabasi religion mormóna ʉ̃rʉ, mʉ̃ra mejãcha kĩrãmigasi kʼawuasi baera mʉ̃a mejãcha kʼawua ẽ basita mʉ̃ religionba kʼãrẽ ĩjãbada ʉ̃rʉ, maʉ̃ kʼarea mʉ̃ara jʉrʉsi pagina internetʼne dai religionebemata maʉ̃ rebistaba jarabʉra wãrĩnu kʼawuaita. Mʉ̃a maʉ̃ra ũduside wãrĩnu ĩjãsi maʉ̃ rebistaba jarabadara wãrĩnubasita, maʉ̃ kʼarea mʉ̃ara museorata mejãcha akʉ jʉ̃ẽsi Utah pʉwʉrʉde, mama mʉ̃a kʼawuasi mʉ̃ religionba jaradiabadara wãrĩnu ẽ basita.

Mʉ̃a krĩchabasi Daizeze Bedʼeata Libro de Mormónʼʉ̃mera abarika bedʼeabʉta, mamina mʉ̃a Daizeze Bedʼea akʉ jʉ̃drʉsidera kʼawuasi abarika jaradia ẽãta. Bari jaraita Daizeze Bedʼeaba Ezequiel 18:4⁠de jarabʉ almara beibʉta, mamina Libro de Mormónʼne Alma 42:9⁠de jarabʉ almara jipa bei ẽãta.

Ãya jaradiabadara Daizeze Bedʼeade eda ẽ basi akʉza maʉ̃ awuara kʼawuasi ãyara erbasita kʼaiare bʼaita, maʉ̃ta erbasi baera maʉ̃ ʉ̃rʉ jaradiabasi. Bari jaraita ãya jarabasi jardin Edénʼra basita pʉwʉrʉ Jacksonʼne (Misuri, Estados Unidos).

Akʉza propetara maʉ̃ra iglesiadebemaba jarapanasi, Daizeze Nokʼoba naʉ̃ drʉa zokʼa jʉ̃drʉbʉrʉdera maʉ̃ra oyi Estados Unidos nokʼodeba. Mʉ̃a naʉ̃ta widibasi kʼãrẽta berabaribasita, maʉ̃ pʉwʉrʉrata akʉza wuabemara pʉwʉrʉta maʉ̃ nokʼoba zokʼa jʉ̃drʉbʉrʉdera. Ewari aba maʉ̃ religionebema misionero bakĩrãbʉba mʉ̃ra trʉ̃si, mama mʉ̃aʼa widisi naʉ̃ ʉ̃rʉ: «Bʉ pʉwʉrʉta awuru pʉwʉrʉme yõbasibʉrʉ, ¿bʉra yõika mormonera maʉ̃ pʉwʉrʉdebemarabawarara?». Iya jarasi yõita, mʉ̃a iya mawũã jaraira jʉ̃ã ẽ basi. Maʉ̃ra audre jʉrʉbasi mʉ̃ religionʼraba jaradiabada ʉ̃rʉ akʉza mʉ̃a widisi mʉ̃ religionebadara nokʼora, ãya maʉ̃ne mʉ̃aʼa jarasi, mʉ̃a bedʼea mʉ̃a wididara wiña wiñane kʼawua wãita.

Mʉ̃ra sobia ẽ besi ãya mawũã jara ũrĩbida kʼarea akʉza krĩcha jʉ̃drʉsi kʼãrẽa mʉ̃ra misionero bakĩrãbasita. Mʉ̃ara kʼawuasi mʉ̃ra misionero bakĩrãbasita wuabemarata kʼarebakĩrãbasi baera, adewara kãgabasi wuabemara ẽbẽrarãba maʉ̃ra bia akʉdamarẽã mʉ̃ra misionero baera, mamina wãrĩnu bʼaira mʉ̃ara wika kʼawuabasi Daizeze ʉ̃rʉra, mʉ̃a Daizeze Bedʼea kʼawuabasimina mejãcha krĩchakabasi maʉ̃ ʉ̃rʉra, adewara kʼawua ẽ basi Daizezeba kʼãrẽ nebia oita krĩchabʉta ẽbẽrarãita.

MɄ̃A NEBIATA ŨDU ZEBɄRɄ:

Mʉ̃a Jeowa ʉ̃rʉ Kʼawuabipanʉrãbawara Daizeze Bedʼea akʉ jʉ̃drʉsidera nekʼãrẽ mejãcha kʼawuasi: kʼaita Daizeze trʉ̃ra, dayirã beibʉrʉdera kʼãrẽta berabaribʉta, sãwũã Jeowaba iya oita krĩchabʉra aripe berabaribita Jesúsdeba. Mʉ̃ara idibʉrʉ wãrĩnu ũdukʼawuabʉrʉ Daizeze Bedʼeara, mʉ̃ra mejãcha sobiabasi mʉ̃a kʼawuada ʉ̃rʉ awurura jaradiabasi baera. Maʉ̃ra ewari jõmaʉ̃nẽ kʼawuabasi Daizezera wãrĩnubʉta, mamina naʉ̃nera Daizezeara yiwidʼibasi neũdukʼawua kĩrãkʼa. Mʉ̃ra 12 julio 2004⁠de buru kʼoesi, Jeowa ʉ̃rʉ Kʼawuabibarira bʼaita akʉza jedeko 6 berabarida tẽã yi nãã edebarita ojʉ̃drʉsida.

5 poagabayeda trajasi Betel Brooklynʼne (New York). Mʉ̃ra mejãcha sobiasi mama trajabasi baera Daizeze Bedʼea oita akʉza kartarata osi baera mawũã ẽbẽrarã kʼarebaita, jipa arigʉ sobiabʉ kʼãwũã ẽbẽrarãta kʼarebabʉ baera Daizeze ũdukʼawua zemarẽã.