¿Kʼaiba parãsi Daizezera?

Yi zezeba yi warra 7 poagabʉa jarasi: «Warra dããraba Daizezeba Drʉata akʉza nekʼãrẽ jõma mamabʉta odata. Iya parãsi ũmadaʉta, jedekota akʉza chĩdauta». Mamina yi warrabara maʉ̃ ʉ̃rʉ krĩchanʉmesi mõbe widisi: «Zeze, ¿kʼaiba parãsi Daizezera?».

Yi zezeba panʉsi: «mia kʼaiba parã ẽ basi, Daizezera ewari jõmaʉ̃nẽ kikibari». Yi warra wũãwũã baera yi zezeba panʉbʉrʉba sobiabasi mamina iyi wari wãne akʉza jẽda widisi iyabaʉ bedʼeata. Iya biʼia ũrĩ ẽ basi, kʼãrẽa neẽãta Daizezera yi parãnara, nekʼãrẽ jõmabʉra chubʉrʉ yi parãnata. Mamina wuabida naʉ bedʼeata panʉna ẽ: ¿samaʉ̃ba zesi Daizezera?

Daizeze Bedʼeabara abarika jarabʉ yi zezeba yi warraʼa panʉna kĩrãkʼa. Jeowaba jarasi Moisésʼa: «Katuma ʉ̃tʉ zei naweda akʉza drʉa parãi naweda, bakikibarisi akʉza bakikibariyi bʉra Daizeze» (Salmo 90:1, 2). Propeta Isaíasbida naʉ̃ kĩrãkʼa jarasi: «¿Kʼawua ẽka?¿Ũrĩbari ẽka? Jeowa drʉa jõma parãnara, iyira ewari jõmaʉ̃nẽbayi» (Isaías 40:28). Judas kartaba jarabʉ Daizezera ewari jõmaʉ̃nẽ kikibarita (Judas 25).

Naʉ̃ra testoraba ũdubibʉ Daizezera Nokʼo ewari jõmaʉ̃nẽ bakikibarita Pabloba jarada kĩrãkʼa (1 Timoteo 1:17). Naʉ̃ba jarakĩrãbʉ Daizezera ewari jõmaʉ̃nẽ bakikibarita poaga bio berabarisimina akʉza ewari jõmaʉ̃nẽ bakikibariyi (Apocalipsis 1:8). Mia kʼaiba parã ẽ basi Daizezera adewara ewari jõmaʉ̃nẽ bakikibariyi.

¿Kʼãrẽa zare dayirãitara ũrĩta Daizezera ewari jõmaʉ̃nẽ kikibarira? Dayirã jõmaʉ̃ta beipanʉ baera, maʉ̃ kʼarea Jeowaba ewari akʉbʉ kĩrãkʼara akʉ ẽ dayirãbara. Jeowaitara 1.000 poagara ewari ababʉ iyira ewari jõmaʉ̃nẽ kikibari baera (2 Pedro 3:8). Bari jaradaita. Adichichira zokʼaibʉ ewari 50bai. Mawũẽra, ¿adichichibara kʼawuabʉka 70, 80 poaga bʼaira dayirã kĩrãkʼa? Adichichibara kʼawua ẽ mawũã ewari bio zokʼai baera. Dayirãsida adichichi kĩrãkʼabʉ, dayirã krĩchara wiñabʉ Daizezedeira (Isaías 40:22; 55:8, 9). Maʉ̃ kʼarea dayirãra krĩcha zroma oẽ baibara bia kʼawua ẽ kʼarea Daizeze ʉ̃rʉ.

Dayirãita zareamina ũrĩta Daizezera ewari jõmaʉ̃nẽ kikibarita, naʉ̃ra wãrĩnu. Daizezeta parãsidabʉrʉ mawũãra Daizezeba nejõma parãna ẽ basi. Mamina Daizeze Bedʼeabara jarabʉ Jeowabʉrʉ nejõma parãsita (Apocalipsis 4:11). Dayirãbara kʼawuapanʉ idi nekʼãrẽ jõmabʉra nããrara neẽbasita (Génesis 1:1, 2). ¿Mawũẽra nekʼãrẽ jõmabʉra samaʉ̃ba zesi? Angelerata akʉza Jesu bai nawedara basibaibara Nekʼãrẽ jõma odara (Job 38:4, 7; Colosenses 1:15). Daizezeba nekʼãrẽ jõma parãi nawedara, iyira abapaibasi. Mawũẽra Daizezera mia kʼaiba parãna ẽ basi.

Nekʼãrẽ jõmabʉba akʉza dayi bebʉchuba ũdubibʉ Daizeze kikibarira bʉta. Adewara Daizezebʉrʉ jõma zokʼaseabʉ akʉza dayirãʼa bebʉ diaseabʉ (Job 33:4).