Mʉ̃ara mʉ̃trʉ krĩchabasi

MɄ̃ NEBɄRATA.

Mʉ̃ wikabasidera basi pʉwʉrʉ Leipzigde (República Democrática Alemana), Polonia kʼawa akʉza República Checa kʼawa. Mʉ̃ zeze trajo kʼarea mʉ̃ 6 poagabaside wãsi Brasilʼeda tẽã Ecuadorʼeda.

Mʉ̃ 14 poagabʉde mʉ̃ yibarirabara mʉ̃ra zokʼasida kolegio Alemanianebʉeda jipa bʼaita. Mʉ̃ra mʉ̃ yibariraneba jĩgabasi baera, nekʼãrẽ mʉ̃yikʉza oibarabasi. Mʉ̃ara mʉ̃yikʉza nekʼãrẽ okʼawuabasi baera krĩcha ẽ basi wuabemaraba mʉ̃ ʉ̃rʉ kʼãrẽ krĩchapanʉra.

Mʉ̃ 17 poagabʉde, mʉ̃ yibarirãra zesi Alemaniena, nawedara mʉ̃ra ãyibawara basi, mamina mʉ̃ara mʉ̃a kãgatrʉ okĩrãbasi baera, deda kʼãrẽ jarapanʉ ũrĩ ẽ baya wãsi mʉ̃ra 18 poagabaside.

Mʉ̃ara kãga ẽ basi naʉ̃ drʉade kʼãrẽ berabaribʉra. Maʉ̃ba jʉrʉ jʉ̃drʉsi kʼawuaita kʼarea mawũã berabaribʉta. Mʉ̃ara organizasionʼra bio akʉsi, mamina mʉ̃a kʼawuasi audre yibia baita naʉ̃ drʉade kʼãrẽ bʉta ũdukʼawuaita, ẽbẽrarãba ãrĩ naena naʉ̃ drʉata.

Mʉ̃ara motota edape mʉ̃ra wãsi Alemanianeba Áfricaeda, mamina mʉ̃ra jẽda zeibarasi motota ãrĩsi baera Europaeda. Mʉ̃ moto ara okʼãrãpe mʉ̃ra wãsi Portugalʼeda. Mʉ̃a maʉ̃ne krĩchasi mʉ̃ moto idubʉita, mawũã ũdukʼawuaita naʉ̃ drʉata mamina barkodeba.

Maʉ̃ne basi warrara berabarikĩrãpanʉta oseano Atlántico. Mawũẽra mʉ̃ra ãyibawara wãsi maʉ̃rane edabasi Laurie, iyira mʉ̃ kimaba zesi. Mar Caribe pusadebʉ ʉ̃kʉrʉ islarata. Daibara maʉ̃rata akʉ jʉ̃ẽsi. Maʉ̃ranebema isla yi trʉ̃ Puerto Ricode basi daira. Mamina maʉ̃ tẽã daira jẽda zesi Europaeda. Mʉ̃ara Laurieʉ̃meba kãgabasi barko yi zromata dai mama panaseabʉta. Daibara 3 jedekobayeda jʉrʉsi barkora, mamina wua jʉrʉ ẽ basi, mʉ̃ta trʉ̃sida baera gorogoro bamarẽã Alemamiane.

Mʉ̃ra 15 jedekobayeda gorogorode basi pusade. Maʉ̃ne mʉ̃ra juwa jidasi Laurieʉ̃me. Mʉ̃ gorogoro bai naena mʉ̃a edasibasi lancha zaketa. Mʉ̃ gorogorobasiedara maʉ̃ lanchara ara obasi barko zroma babita. Daibara krĩchapanasi mʉ̃ gorogorodeba ãĩ wãbʉrʉde, wãita drʉara ũdukʼawuade. Mʉ̃ gorogorodeba ãĩ wãna audre ẽãde mʉ̃a ũdukʼawuasi Jeowa ʉ̃rʉ Kʼawuabipanʉrãta, mawũã Daizeze Bedʼeata kʼawua jʉ̃drʉsi mʉ̃ara. Maʉ̃nera wabidade ma oẽ basi mʉ̃ barkosida.

SÃWŨÃ AWUARA BABISI DAIZEZE BEDʼEABARA MɄ̃ BEBɄRA.

Abedaedara mʉ̃ara krĩchasi mʉ̃ra nekʼãrẽ mejãcha awuara oita nesida ẽãta, mʉ̃ra juwa jidasi baera akʉza wua sigarriyo do ẽ basi baera (Efesios 5:5). Mʉ̃ara krĩchabasi mʉ̃ bebʉra bia zokʼabʉta, mʉ̃ara ũdukʼawua wãbasi baera Daizezeba odata naʉ̃ drʉade nekĩrã neidabʉta.

Mamina wabida basi mʉ̃ sãwũã bʉ kʼãrẽ awuara oibarata, mʉ̃ra waidide ʉ̃ta krĩchabʉta ũdubibasi akʉza krĩchabasi wuabemaraba ley erbʉ ũrĩra nesida ẽãta. Adewara mʉ̃ara kãgabasi wuabemaraba bia akʉdamarẽã mʉ̃a obʉtrʉ. Mʉ̃ita audre yibiara mʉ̃ basi.

Ewari aba mʉ̃a lesi katumane bedʼea bia ʉ̃rʉ (Mateo 5deba 7 bayeda). Mʉ̃ra kĩrãmigasi Jesúsba sobia bʼai ʉ̃rʉ jaradaba. Mama Jesúsba jarasi ẽbẽra jarrapanʉrãra akʉza obisiapanʉrãra sobiapanʉta (Mateo 5:6). Mʉ̃ra maʉ̃ba krĩchabisi sãwũã jarrabʉbʉrʉ akʉza obisiabʉbʉrʉ sobia baseabʉta. Mʉ̃a Daizeze Bedʼea kʼawuabʉde kʼawua wãsi jõmaʉ̃ba nesipanʉta Daizeze ʉ̃rʉ kʼawuaita, mamina dayirãra eda krĩchabʉta ũdubibara mawũã Daizeze ũdukʼawua zeita. Jesúsba jarada kĩrãkʼa: «Sobiapanʉ Daizezedebema audre kʼawuakĩrãpanʉta, maʉ̃rata eda bʼai baera Daizeze Nokʼode» (Mateo 5:3).

Daibara Daizeze Bedʼea kʼawua jʉ̃drʉsi dai Alemaniane panaside, mamina daira wãsi maʉ̃are Franciaeda akʉza tẽã Italiaeda Jeowa ʉ̃rʉ Kʼawuabibarira panʉma. Mʉ̃ra kĩrãmiga basi ãya kãgata mejãcha ũdubipanasi baera akʉza ãbapanasi baera. Wãrĩnu ãyira mebẽrãbasi (Juan13:34, 35). Ewari bio berabarida tẽã daira buru kʼoesida.

Mʉ̃ra Jeowa ʉ̃rʉ Kʼawuabibaribasidu mʉ̃ sãwũãbʉra awuara babibarabasi. Mʉ̃ra Laurieʉ̃me wãsi Áfricadeba Estados Unidosʼeda jʉ̃ẽñiena. Maʉ̃ne maʉ̃ pusade baside daiba kʼawuasi jipa wikabʉta daira Daizezeira. Daira pusa ẽzadrabʉ baera mʉ̃ra ewari mejãcha erbasi, maʉ̃ba Daizeze Bedʼeata akʉ jʉ̃drʉsi. Mʉ̃ra Jesús nebʉraba mejãcha krĩchabisi. Jesúsʼra nekʼãrẽ kayirua okabasimina akʉza nekʼãrẽ bia erbasimina jʉrʉ ẽ basi iyita wuabemaraba bia akʉdamarẽã, awuarabʉrʉ iyitara audre yibiabasi yi Zezeta.

Mʉ̃a Jesúsba oda krĩchabʉrʉde kʼawuasi mʉ̃a ewari wiña erbʉtrʉ diabe ẽãta Jeowaʼa, awuarabʉrʉ mʉ̃ bebʉdera Jeowatrʉ audre yibiabaibarabasi (Mateo 6:​33). Dai Estados Unidos jʉ̃ẽside daibara jipa idubʉsi dai wãbadara akʉza jipa besi Estados Unidosde, mawũã Jeowaita audre nekʼãrẽ oita.

MɄ̃A NEBIATA ŨDU ZEBɄRɄ.

Nããra mʉ̃ ʉ̃rʉ krĩchabaside mʉ̃ara kʼawua ẽ basi mʉ̃a jidabʉra sãwũã berabarita (Isaías 48:17, 18). Atiara kʼawuabʉ mʉ̃a mʉ̃ bebʉde kʼãrẽ oita, Daizezeʼa yiwidʼita akʉza ẽbẽrarã kʼarebaita Jeowaʼa ũdukʼawuadamarẽã.

Mʉ̃ kimaʉ̃me audre bia wã Daizeze Bedʼeaba ũrãgʼa bia diabʉdeba akʉza Jeowaba daiʼa diasi wũãwũãta, iyara ũdukʼawuabʉ Jeowara.

Daira bedʼea zroma ũdupanʉ, mamina Jeowabara amae ẽ daira. Maʉ̃ba daibara jidapanʉ iyiʉ̃me kʼẽrẽpa bʼaita nekʼãrẽ berabaribʉrʉbʉsida (Proverbios 3:​5, 6).