¿Kʼawuabasika?

¿Kʼãrẽa yibiabasi Jeowaba iduaribisi baera beamarẽã pusirata akʉza ãtʉta iyaʼa sakripisiode diaita?

LEYBARA jarabasi pusirata akʉza ãtʉta diaseabasita sakripisio oita Jeowaita, adewara jarabasi pusirata neẽbʉrʉ sakripisiode diaiseabasi Jeowaita ãtʉta (Lev. 1:14; 12:8; 14:30). ¿Kʼãrẽa naʉ̃ra yibiabasi? Edaʉde zareabasi baera ãtʉ ũduita, ¿kʼãrẽã?

Ãtʉra Israeldebema ẽ baera, ãyira ʉ̃kʉrʉ jedekode awuru drʉaeda wãbʉ baera berabaribʉ Israelmae. Octubredera ãtʉra wãbʉ bareare, drʉa jʉ̃wʉrʉabʉta jʉrʉbʉ baera maʉ̃ta akʉza marzode Israelmae berabaribʉ (Cant. 2:11, 12; Jer. 8:7). Maʉ̃ kʼarea jedekora mejãcha kʉrazabʉdera israelitaraitara zareabasi ãtʉ ũduita sakripisiode diaita.

Mamina pusirara awuru drʉa eda wã ẽ basi, maʉ̃ kʼarea ewari jõmaʉ̃nẽ Israeldera pusirara basi akʉza ʉ̃kʉrʉbara iyi deda pusirata erbasi (akʉra Juan 2:14, 16). Libro abaʉba jarabʉ: «Palestinanera pʉwʉrʉza basi pusirara ẽbẽra deda, ʉ̃kʉrʉbara pusira deta erbasi mawũã ẽ bʉrʉ ãyi deda sobeata basi pusiraita» (akʉra Isaías 60:8).

Mawũã Jeowabara kãgata ũdubisi, iduaribisi baera pusirata sakripisiode diamarẽã, maʉ̃ra Israelde ewari jõmaʉ̃nẽ basi baera.