Lepanʉraba widipanʉta

¿Kʼaseabʉ Daizeze Bedʼeabara Daizeze nãã wãrĩnu jarai ʉ̃rʉra?

Disionario abaʉba jarabʉ, Daizeze nãã wãrĩnu jaraibara [kapũrĩa bedʼeade jurar] naʉ̃bara jarakĩrãbʉta: «Daya Daizeze nãã nei oya adara maʉ̃ra wãrĩnu oita» (Diccionario de uso del español, de María Moliner). Daizeze nãã wãrĩnu jaraira bʉseabʉ kartade mawũã ẽ bʉrʉ bedʼeade jaraseabʉ.

Ʉ̃kʉrʉbara krĩchapanʉ biga ẽãta daya jaraita,daya nekʼãrẽta wãrĩnu oita Daizeze nãã Jesuba jarasi baera: «Kʼãrẽ oita kʼãrẽ daidʼu wãrĩnu aribʼaeya arãũdua […] kʼãrẽta maraba odʼaibʉrʉ ãjãne audua, odʼa ẽ bʉrʉ ãjãne arãũdua. Ne ãmaña jarabʉrʉra bia ẽãneba ze bʼʉta ãtõmiãneba ze bʼʉa» (Mat. 5:33-37). Jesubara kʼawuabasi Moíses leybara zokʼabasita israelitaraʼa edaʉde Daizeze nãã wãrĩnuta jaraibarabasita akʉza kʼawuabasi ʉ̃kʉrʉ kristianorãba Daizeze nãã wãrĩnuta jarasidata (Gén. 14:22, 23; Éxo. 22:10, 11). Adewara Jesubara kʼawuabasi Jeowabara jarasita iyi kʼarea nei oita (Heb. 6:13-17). Mawũẽra Jesubara jarakĩrãkʉ ẽ basi daya wãrĩnu Daizeze nããne oya adara jipade jarabe ẽ basita. Awuarabʉrʉ jarakĩrãkʉasi Daizeze nãã nekʼãrẽ oya jaradara bari ʉ̃rʉ jaraibara ẽãta. Dayirãba nei oya adabʉrʉ maʉ̃ra jõma aripe odaibara, maʉ̃ta kãgabʉ Jeowaba dayirãba odamarẽã.

¿Kʼãrẽta oibara Daizeze trʉ̃ne nei oita jaramarẽã jaradara? Nããra, biʼia krĩchara bʉa jaradara wãrĩnu aripe oi kʼawuaita. Bʉa krĩchabʉbʉrʉ aripe obe ẽãta, Daizeze trʉ̃ne nei oita jararãra. Daizeze Bedʼeaba naʉ̃ ũrãgʼata diabʉ: «Bʉa nei oita jarara, mamina maʉ̃ta aripe oẽ bʉrʉ, audre bigabayi jaraita oẽ baita» (Ecl. 5:5). Akʉza akʉra kʼaseabʉta wãrĩnu Daizeze Bedʼeaaraba, bʉa oya ada ʉ̃rʉ.

Edaʉde daya nei oi jarabʉra, Daizeze nããra bia bʉ. Bari jaraita Jeowa ʉ̃rʉ Kʼawuabipanʉrãta juwa jidapanʉnera, Daizeze nãã nei odaita jarabʉ. Daizeze nãã akʉza wuabemara daidu ãya jarapanʉ yi kãgapanaita, ibiadepanaita, ãyirainu yi wawia ũdubipanaita akʉza ewari jõmaʉ̃nẽ yi erpanaita. Ãya mawũã jarada tẽã, jõmaʉ̃ba akʉpanʉ ãyira yi kimata akʉza jʉ̃ãpanʉ ewari jõmaʉ̃nẽ ãba panamarẽã (Gén. 2:24; 1 Cor. 7:39). Juwa jidapanʉne Daizeze nãã nei oya abʉra, Daizezebara bia akʉbʉ.

Edaʉde Daizeze nãã nei oita jarabʉra, Daizezebara bia akʉ ẽ. Bari jaraita, kristianorabara jara ẽ, ãyira yõnaibarata ãyi pʉwʉrʉ kʼarea, mawũã opanʉbʉrʉ Daizeze Jeowaba zokʼabʉta ũrĩna ẽ bayi. Kristianorãra «ẽjũãne duanu ẽã» maʉ̃ba ãyira yõpanʉ ẽ (Juan 15:19; Is. 2:4; Sant. 1:27).

Edaʉde dayi krĩchabara iduaribibʉ Daizeze nãã nei oita jaraita, mamina edaʉde iduaribi ẽ. Kristianorabara edaʉde biʼia krĩchaibara Daizeze nãã nei oi jarai naweda. Jesuba jaradiadata: «Cesardera Cesarʼa diadua, Daizezedera Daizezeʼa diaidua» (Luc. 20:25).

Krĩchadadrʉ kristiano abaʉta drʉa jãpebemata awuru drʉade bakĩrãbʉta, mamina iya kʼawuayi maʉ̃ drʉade jipa baira Daizeze nãã nei oita jaraibarata. Maʉ̃ Daizeze nãã nei oi jaraide Daizezeba kãga ẽã jaraibʉrʉ, iyira kristiano baera kʼawuabʉ kʼãrẽta jarabʉta Daizeze Bedʼeaba, maʉ̃ kʼarea oẽ bayi. Mamina nokʼoba iduaribibʉbʉrʉ Daizeze nãã nei oita awuara jaramarẽã, jaraseabʉ iyi krĩchaba iduaribibʉta.

Dayirãba maʉ̃ta odara, Romanos 13:1ba jarabʉ kĩrãkʼa opanʉ: «Zhãrã jõma nokʼorã edre bʼeaudua». Mawũẽra kristianoraba krĩchaseabʉ bigabʉta nokʼoraba awuara jaramarẽãbʉra Daizeze nãã nei oi jarabʉta. Jeowaba zokʼabʉde opanʉ baera, nokʼora edre baidua abʉta.

Romanorabara jarapanasi ãyi espada kʼarea wãrĩnu nei oita, mawũã ũdubipanasi ãya jaradara aripe oibasita, ãyi daizeze yõbari kʼarea. Griegorabida juwa ʉ̃ta wuapanasi ãyi daizeze nãã jaraita nei oita. Dayirã Daizeze nãã nei oita jaramarẽã jarabʉdadera, edaʉde jarapanʉ dayi juwaba nekʼãrẽ tã kʼãrãpe mawũã ẽ bʉrʉ dayi juwaba neida okʼãrãpe maʉ̃ta jaramarẽã. Mamina mama dayi krĩcha biabʉba kʼawua jarayi maʉ̃ oita mawũã ẽ bʉrʉ oẽ baita.

Kristiano wãrĩnuarabara bandera tõbari kʼãrãpe jara ẽ bayi Daizeze nãã nei oita banderara ẽbẽrabara zokʼabʉ baera yiwidʼita akʉza naʉ̃ra Jeowaba bia akʉ ẽ baera. Mamina bʉ tribunalde bʉde Daizeze Bedʼea bʉ juwaba tõbari kʼãrãpe bʉaʼa jaradara jaramarẽã wãrĩnuta Daizeze nãã, ¿bʉara kʼãrẽta oi? Bʉa maʉ̃ta mawũã oibʉrʉ bʉyikʉzaʉba kʼawua krĩchaibara maʉ̃ oita mawũã ẽ bʉrʉ oẽ baita. Bʉa maʉ̃ta mawũã ora kayirua ẽ, nabema krĩstianorabida ãyi juwaba ne tõbaribʉde mawũã ẽ bʉrʉ ãyi juwaba ne obʉde jarasi baera Daizeze nãã nei oita (Gén. 24:2, 3, 9; 47:29-31). Bʉa maʉ̃ta ora, kĩrãbera bʉa Daizeze nãã wãrĩnuta jaraita jarabʉta, maʉ̃ kʼarea bʉa badu bedʼeata widibʉdara bʉara aripe panʉibara, wãrĩnuta jaraibara.

Dayirãra Jeowa neũdukʼawua bakĩrãbʉ baera ewari jõmaʉ̃nẽ nãã biʼia krĩchadaibara akʉza yiwidʼidaibara Daizeze nãã nei oita jarai naweda. Mamina jʉra kʼawua baibara dayirãba Daizeze nãã nei oi jarabʉde Daizezeba kãga ẽãta oideba, dayirãba Daizeze nãã nei oita jarasibʉrʉ maʉ̃ra oibara (1 Ped. 2:12).