Lepanʉraba widipanʉta
¿Jesúsba iyi bei nãã yiko osidera iyi kʼaidubemara 70 panʉra sama panasi? ¿Ãyara doba amaesidaka Jesúsʼra?
Krĩchada ẽ baibara Jesúsba iyi bei nãã yiko oside naʉ̃ra ẽbẽrarã neẽ basita Jesústa doba amaesida baera, mawũã ẽ bʉrʉ Jesúsba ãyita bia akʉ ẽ basi baera. Awuarabʉrʉ maʉ̃ ewaridera Jesúsʼra iyi kʼaidubemara 12 panʉrabawarabʉrʉ bakĩrãbasi.
Jesúsbara bia akʉbasi iyi kʼaidubemara 12 panʉrata akʉza yi 70 panʉrata. Iyi kʼaidubemara jõmaʉ̃nẽ nããra jidasi 12 ẽbẽrarã, maʉ̃rata iyi apostol babisi (Luc. 6:12-16). Iya maʉ̃ra ẽbẽrarã jidasidera Galileade basi, mõbe iya maʉ̃ra ẽbẽrarãra zokʼasi Daizeze Nokʼo ʉ̃rʉ jaradia wãmarẽã akʉza kayaberata bebidamarẽã (Luc. 9:1-6). Tẽã, Judeade, jidasi awuru ẽbẽrarãta 70 iyi kʼaidubemara bamarẽã, mõbe ũme ũmeka zokʼasi Daizeze bedʼea jaradiade (Luc. 9:51; 10:1). Maʉ̃ba Jesúsba jaradia wãbʉrʉmae ũdubasi kʼai ẽbẽrata iyi kʼaidubema bʼaita.
Judiora Jesús kʼaidubema bapanʉrabara idubʉda ẽ basi paskua ewari opanʉra, adewara ãya maʉ̃ra ãyi mebẽrãbawaraʉba opanasibaibara (Éx. 12:17-20). Iyi bei nãã Jesúsʼra wãsi Jerusalénʼena iyi apostolerabawara. Mamina Jesúsbara iyi apostolera Judeade, Galileade akʉza Pereade panʉra jõmaʉ̃ʼa widi ẽ basi iyibawaraʉba odamarẽã maʉ̃ paskua ewarita. Maʉ̃neba jaraseapanʉ Jesúsʼra iyi apostolerabawarabʉrʉ bakĩrãbasita. Maʉ̃ kʼarea jarasi: «Mʉ̃a marabawaraʉba kokĩrãbasi naʉ̃ Paskuara, mʉ̃ zʉbʉriai nãã» (Luc. 22:15).
¿Kʼãrẽa ãyibawarabʉrʉ bakĩrãbasi Jesúsʼra? Iyira Daizeze kordero kĩrãkʼa beita arakʼaita basi baera, mawũã ẽbẽrarã nemitiadeba ẽdrʉbita (Juan 1:29). Nawedara sakripisiora diapanasi Jerusalénʼnebema templode, Jesúsʼsida maʉ̃ pʉwʉrʉde beibasi. Paskua ewaridera korderota kopanasi, naʉ̃ba israelitara kĩrãbebibasi Jeowaba ãyi Egiptodeba ẽdrʉbida ewarita, mamina Jesús beidabara ẽbẽrarã jõmaʉ̃ta ẽdrʉbibasi nemitiadeba akʉza beideba (1 Cor. 5:7, 8). Jesús beidaba idaribibasi iyi 12 apostoleraba kʼarebadamarẽã kongregasion ojʉ̃drʉita (Efes. 2:20-22). Apocalipsisde jara ũrĩbibʉ Nueva Jerusalén pʉwʉrʉra de jĩrʉ 12bʉ ʉ̃rʉ bʉta, iyi de jĩrʉra mõgara, mõbe maʉ̃ra mõgara aba abakaʉba abʉ Jesu 12 kʼaidubemara trʉ̃ta (Apoc. 21:10-14). Naʉ̃ra 12 apostolerabara kʼarebaibasi nekʼare Jeowaba oita krĩchabʉ aripe berabarita. Maʉ̃ kʼarea jaraseapanʉ Jesúsʼra naʉ̃ra 12 apostolorebawarabʉrʉ ãba bakĩrãbasita paskua ewaride akʉza iyi bei nãã yiko oda koita.
Maʉ̃ ewaridera Jesús kʼaidubemara 70 panʉrãra akʉza wuabemarãra neẽ basi, mamina Jesúsba iyi bei nãã yiko odadeba ãyabida nebiata ũduibasi. ¿Sãwuẽrã? Diamasi iyi bei nãã Jesúsʼra bedʼea abarika zesi iyi apostolerabawara. Tẽã, yi ʉ̃ta wãita jidabʉrʉrasida eda baibasi maʉ̃ bedʼea abarika zedade (Luc. 22:29, 30).