¿Kʼawuabasika?

¿Sãwũã kʼawuapanʉ israelitaraitara trãbaira jipade yibia basita?

ISRAELITARAITARA trãbaira arigʉ yibiabasi. Daizeze Bedʼeaba jarabʉ basita ʉ̃kʉrʉ ẽbẽraba nekʼãrẽ zabʉta akʉza trãbʉta. Daizeze Bedʼeadera wiñabʉ trãbirata bari jaraita, Salmos librota, El Cantar de los Cantaresdeta akʉza Lamentaciones, naʉ̃ra librorãra bʉsida trãbaita. Libro ẽbẽrarã nãã bada ʉ̃rʉ nebʉrabʉba jarabʉ Daizeze Bedʼeaba ũdubibʉta israelitarabara ãya nekʼãrẽ obʉde badua zokʼabasita trãbirãra.

Nekʼãrẽ obʉde zapanasi trãbirata. Israelitarabara ãya trãbi zabʉdeba ũdubipanasi ãyi sãwũãbʉta (Is. 30:29). Wẽrãrabara panderetata zapanasi akʉza trãpanasi adewara bairapanasi ẽbẽra aba nokʼo babibʉdade mawũã ẽ bʉrʉ gorogororaba ãyi nejʉrara ãyi juwa edre baebibʉdade adewara Daizezea piesta obʉdade (Juec. 11:34; 1 Sam. 18:​6, 7; 1 Rey. 1:​39, 40). Israelitaraba ẽbẽra aba beibʉrʉdera ãyi sãwũãbʉta ũdubira trãpanasi (2 Crón. 35:25). Libro abaʉba ũdubibʉ israelitarabara mejãcha kãgabasita trãbirãra.

Nokʼorabara ũrĩkĩrãbasi trãbirãra. Nokʼo Saúlbara Davidta jʉrʉsi iyaʼa arpata za ũrĩbimarẽã (1 Sam. 16:​18, 23). Davidbara iyi nokʼo bada tẽã parãsi nekʼãrẽ trãbi zabarita akʉza trãbira biakiruta bʉsi adewara ẽbẽrarãta bio jʉrʉsi maʉ̃raba nekʼãrẽta zadamarẽã templode (2 Crón. 7:6; Amós 6:5). Nokʼo Salomónbida yumakẽrãrata erbasi akʉza yuwẽrãrata iyi deda trãnamarẽã (Ecl. 2:8).

Israelitarabara Daizezeʼa yiwidʼibʉrʉdera trãpanasi. Jerusalén templodera basi ẽbẽrarã 4 mil nekʼãrẽ zapanʉrata, ʉ̃kʉrʉba zapanasi simbalota, arpata akʉza awuru nekʼãrẽ zabarirata (1 Crón. 23:5; 2 Crón. 5:12). Mamina naʉ̃ra awabʉrʉ trãbira zapana ẽ basi Jeowaʼa yiwidʼibʉrʉdera, wuabema israelitarabida ãyi dedaʉba Jerusalénma wãbʉrʉdera ode trã wãpanasi, ãya trãbi zabada trʉ̃ra Canciones de las Subidas basi (Sal. 120-134). Adewara israelitarabara Paskua ewaridera trãpanasi trãbi Hallelta.a

Idi ewadebida Daizeze ode panʉraitara trãbirãra arigʉ yibia (Sant. 5:13). Jeowaʼa trãpanʉ iyi ʉ̃rʉ ibia bedʼeaita (Efes. 5:19). Kongregasione ãbaʉba Jeowa trãpanʉ baera ãyi kʼawabʉta sentipanʉ (Col. 3:16). Trãbirabara zarea diabʉ bedʼea zroma awuantaita (Hech. 16:25). Trãbirabara dayi sodebʉta Jeowaʼa jarabibʉ akʉza ũdubibʉ dayirãbara wãrĩnu ĩjãbʉta iyi ʉ̃rʉ adewara kʼãrẽaba kãgabʉta iyita.