¿Kʼãrẽa awuara osida ʉ̃kʉrʉrata Jeowa ʉ̃rʉ Kʼawuabipanʉrãbara ãya ĩjãbʉ ʉ̃rʉ?

Jõma dayirãba ĩjãbʉra Daizezedeba zebʉ, maʉ̃ kʼarea awuara owãna Daizeze Bedʼea audre ũrĩ wãbʉrʉza.a

Proverbios 4:18de ũdubibʉ kʼãrẽa yibiata mawũã awuara owãnaira: «Ẽbẽrarã aripe opanʉra ora, ũna diapedadebema kĩrãk’abʉ, maʉ̃ra wiña wiñane ũna wã, bi’ia ũnadrʉ zeyeda». Ũnadrʉbʉrʉde wiña wiñane daya ũdubʉ kĩrãkʼa nekʼãrẽ maʉ̃ audubʉ bia ũduita, maʉ̃ kĩrãkʼa Jeowabara wiña wiñane jaradia wã iya kʼãrẽta kãgabʉta iyi kʼaidupanʉra (1 Pedro 1:10-12). Akʉza Daizeze Bedʼeabara jarabʉ Jeowabara, iyi ewari audre ara kʼaitaminanera iyi kʼaidupanʉra audre nekʼãrẽ jaradiaita (Daniel 12:4).

Mejãcha krĩcha ẽ baibara maʉ̃ra kʼarea mawũã opanʉta. Naweda Daizeze ode pananara ẽbẽrabida ãya kʼãrẽ krĩchabadara awuarababisi baera.

• Jeowabara jarasi israelitarãra Egiptodeba aña ededamarẽã, mamina Moisésbara 40 poaga maʉ̃ berabari naweda ẽdrʉbikĩrãbasi (Hechos 7:23-25, 30, 35).

• Propesiaba jarabaridata Jesu Dayirã ẽdrʉbibari bei kʼãrãpe jẽda piradrʉi ʉ̃rʉ Jesu kʼaidubemarabara maʉ̃ra bia ũrĩna ẽ basi (Isaías 53:8-12; Mateo 16:21-23).

• Nawedara ʉ̃kʉrʉ kristianorãra aña krĩchapanasi, Jeowa kʼãrẽ ewaride zei ʉ̃rʉ krĩchapanasidera (2 Tesalonicenses 2:1, 2).

Nawedara Jeowabara ãyira wiña wiñane kʼareba wãsi ãya krĩchabadata aripe krĩchamarẽã. Maʉ̃ra ewaride kʼarebada kĩrãkʼa Jeowa widipanʉ dayirãta idi ewade kʼarebamarẽã (Santiago 1:5).