7 Nebiata jaradia kʼawuara

¿KʼÃRẼTA OIBARA?

Ẽbẽrarãba ãyi sode nebia erbʉdeba maʉ̃ta oũdubiyi iyara. ¿Bʉra zarea obʉka daucha oita? Bʉa mawũã obʉbʉrʉ bʉ warrarasida kʼarebayi mawũã bʼaita.

Ẽbẽraba iyi sode nebiata erbʉbʉrʉ iyira mejãcha trajamia, daucha akuyi akʉza so borekeabʉta ũdubiyi, maʉ̃ nebiara warrarainʉba ũdubiseabʉ.

DAIZEZE BEDʼEABA JARABɄTA: «Jaradiara bʉ wũãwũã saʉ̃ ode wãita, maʉ̃ba zõna babʉrʉde o jãpe wã ẽ marẽã» (Proverbios 22:6).

¿KʼÃRẼA YIBIA?

Idi ewade yibia dayi sode nebia erbaita mejãcha zokʼapanʉmina selularta akʉza internetʼta. «Dai warraraba selulardeba badu ewaride nemitiata akʉseabʉ (Karynba jarabʉ). Ãyira dai kʼawabʉmina nemitiata akʉseabʉ».

DAIZEZE BEDʼEABA JARABɄTA: «Ẽbẽrarã biʼia» kʼawuabʉbara, «jari ẽbẽrarã maʉ̃ bedʼea kĩrãkita akʉpanʉneba kʼawuapanʉ kʼãrẽta biata akʉza kʼãrẽta bia ẽãta» (Hebreos 5:14).

Yibia daya obʉdeba bia ũdubita. Bari jaradaita yibia naʉ̃ra bedʼea jaraita «mʉ̃ bia okʼãrãpe» akʉza «biga», adewara wuabemara ʉ̃rʉ krĩchabʉta ũdubibara, idi ewadera maʉ̃ra ũduda ẽ baera, ẽbẽrarãra audre ewari jʉrʉbʉ ãyi selularde bʼaita wuabemara ʉ̃rʉ krĩchai kaude.

DAIZEZE BEDʼEABA JARABɄTA: «Zhãrãba marã sãwũã odʼaita krĩña bʼedʼe marãba ãzhita mawũã oudua» (Lucas 6:31 Daizeze Bedʼea, Wycliffe Inc.).

¿KʼÃRẼTA OSEABɄ?

Jarada bʉ sode kʼãrẽ nebia erbʉta. Ẽbẽrarã buru biarabara jarabʉ, warrara ãyi deda jaradiapanʉbʉrʉ juwa jidai nãã ãba mia erkʼãĩbe ẽãta, mawũãra zarebayi ãyitara bari mia erkʼãĩra.

ŨRÃGʼA: Bʉa bedʼea ũrĩbʉrʉta jara ũrĩbira bʉ warrara maʉ̃ bedʼeaba bia ba kʼawuaibarata. Bari jaradaita bʉa ũrĩra bedʼea nekʼãrẽ mitia ʉ̃rʉ berabaridata, naʉ̃ta jaraseabʉ: «Kʼãrẽ bedʼea mitia jipa ¿bʉ mara kʼãrẽ kʼẽrẽa mawũã opanʉ maʉ̃ra ẽbẽrarãbara?».

«Warraraba nekʼãrẽ bia jida kʼawuaira, nãã kʼawuaibara kʼãrẽta nebiata akʉza kʼãrẽta nekayiruata» (Brandon).

Jaradiara sãwũã bia okʼawuaibarata. Wũãwũãrabida krĩcha kʼawuaseabʉ wuabemara ʉ̃rʉ akʉza jaraseabʉ «mʉ̃ bia okʼãrãpe» adewara «biga». «Wũãwũãba iyitrʉ abapai bia edadaibarata krĩcha ẽ bʉrʉ (iyirabʉeda mebẽrãne, kolegiode, komunidade), mawũãra iyara soiduba okĩrã oyi nekʼãrẽ biata wuabemaraita», jarabʉ libro karta Parenting Without Borders (Padres sin fronteras).

ŨRÃGʼA: Nekʼãrẽ oita zokʼara, mawũã iya kʼawuayi yibiata wuabemara kʼarebaita.

«Warraraba ãyi deda nekʼãrẽ oita bia kʼawuabʉbʉrʉ. Mawũãra ãyitara zare ẽ bayi ãyidoba de jãpe wãbʉrʉsida» (Tara).