Tabernakulo Daizezeʼa yiwidʼita

Moisés Sinaí katumane chuaside, Jeowaba jarasi omarẽã tabernakulota. Mama Jeowaʼa yiwidʼibasi, maʉ̃ tabernakulora edeseabasi ãyi wãbʉrʉma.

Jeowaba jarasi: «Israelitara widira diamarẽã ãya diaseabʉta tabernakulo parãita». Israelitarabara edesida orota, platata, kobreta, mõgara kĩrãwãreãta, aniyorata, areterata, nedʉwʉrʉ ẽta, wua lino omata akʉza lana omata. Maʉ̃ kʼãrẽa Moisésba jarasi: «Marabara mejãcha wesida, wua weraidua».

Yumakẽrã bioʉba akʉza wẽrãraba nekʼãrẽ okʼaupanʉrabara kʼarebasida maʉ̃ tabernakulo oita. Jeowaba kʼarebasi maʉ̃ ẽbẽrarãbara biʼia omarẽã ãya nekʼãrẽ oibadara. Ʉ̃kʉrʉta ne kapanasi, wua bia kasu kʼaubasi, orota bia traja kʼaubasi, mõgararata bia kõbeasi akʉza bakuruba bia nekʼãrẽ okʼawuabasi.

Israelitarabara tabernakulora bia parãsida Jeowaba jarada kĩrãkʼa. Parãsida wua kĩrãwãreãbʉta, mawũã tabernakulodebema kuarto ẽzadra jirabʉ kʼãrãpe ũme zebita: kuarto ababemara Santobasi yi ababema kuartora Santísimobasi. Kuarto Santísimonera edabasi arka bedʼea abarika zedadebemata, maʉ̃ra bakuruba parãchuasi akʉza oroba. Santodera edabasi ĩbira juwa jiwini barabʉta akʉza altar insienso babarita, adewara mesata. Tabernakulo ãĩra basi altar kobre omata akʉza ponchera kobre omata. Israelitarabara jarasi Jeowaʼa ãyara jõma Jeowaba widibʉra oita. Arka bedʼea abarika zedadebemabara kʼarebabasi kĩrãbeita maʉ̃ bedʼea jaradata. ¿Kʼawuabʉka kʼãrẽta bedʼea abarika zedara? Oita daya oya adata.

Jeowabara jidasi Aarónta akʉza yi warrarata mama saserdote bamarẽã akʉza trajadamarẽã. Ãyara bia akʉibarabasi tabernakulora akʉza oprendade diaibarabasi Jeowa. Santísimonera Aaróntrʉ eda wãseabasi iyira sumo saserdotebasi baera. Eda wãbasi poagaza ewari abapai, mama sakripisio diaita iyi nemitia odabari, yi mebẽrã nemitia odabari akʉza israelitara nemitia odabari.

Israelitara Egiptodeba ãĩ wãna tẽã, poaga abaʉde maosida tabernakulora. Mawũã israelitarabara erpanasi sama Daizezeʼa yiwidʼita.

Jeowaba tabernakulo ʉ̃rʉ jirabʉsi jãrãrata, maʉ̃ba tabernakulora Jeowa zareaba birasi. Mawũã Jeowaba ũdubisi iyira sobiabʉta. Jãrãrata tabernakulo ʉ̃rʉ piki jirabasibʉrʉ, israelitarãra mama piki adaibarabasi. Mamina jãrãrata aña wãsibʉrʉ, ãyisida wãibarabasi.