Jeowa bedʼeata ũrĩna ẽ basi

Ewari berabarida tẽã israelitarãra drʉa ibʉawabʉmae panasidera Coréba, Datánba, Abiramba akʉza 250 yumakẽrãraba ũrĩkĩrãna ẽ basi Moisésba jaradata. Ãya jarasida: «¡Daira masẽsida mara kʼarea! ¿Kʼãrẽa bʉabʉrʉ zokʼaibara daira? ¿Kʼãrẽa Aaróntrʉ sumo saserdote bʼaibara? Jeowara mara ũmepaide bʉ ẽ, dai bawarabida bʉ». Jeowaba mawũã jaraira kãga ẽ basi, iyi ʉ̃rʉbʉ kĩrãkʼabasi baera.

Moisésba Coréʼa jarasi akʉza ẽbẽrarã iyibawarapanʉra: «Nʉ zeidua tabernakulo eda, mõbe weidua epedeko zaketa insienso eda. Nama Jeowaba ũdubiyi kʼaita jʉrʉsita».

Maʉ̃ nrʉema Coréta akʉza iyi kʼaidu 250 panʉra yumakẽrãrata wãsida tabernakuloeda, Moisésbawara ãba yi jʉreita. Insiensota ba jʉ̃drʉsida saserdote kĩrãkʼa. Maʉ̃ne Jeowaba jarasi Moisésʼa akʉza Aarónʼa: «Jĩga wãidua Corédeba akʉza ẽbẽrarã iyibawara panʉneba».

Coréra jʉ̃ẽsi tabernakulo Moisés chuidu, mamina Datánta, Abiramʼʉ̃mera wãna ẽ basi. Jeowaba jarasi israelitara: «Coré, Datán, akʉza Abiram karpa debara jĩga wãidua». Mawũẽra israelitarãra mamaʉ̃bara meserabai ãĩ wãsida. Datánta, Abiramta akʉza ãyi mebẽrãta ãyi de kʼawapanasi, maʉ̃ba egoro dra totosidera beasi. Tabernakulodebida tʉbʉ pʉreata ʉ̃tʉba u zesi, maʉ̃ba beasi Coréta akʉza 250 ẽbẽrarã iyi kʼaidupananarata.

Maʉ̃ tẽã Jeowaba jarasi Moisésʼa: «Ẽbẽrarã yi nãã edebari triburanebema aba abakaʉba wedaibara bakuruta, mõbe maʉ̃ne yi trʉ̃ta bʉibara. Mamina Levídebema bakurudera bʉeidua Aarón trʉ̃ta, tẽã eda bʉeidua tabernakulode. Mʉ̃a jidayi bakuru yumakẽrã abaʉdeta, maʉ̃nera ʉ̃tʉ zebiyi neponorata».

Maʉ̃ nrʉema Moisésbara maʉ̃ra bakurura ẽbẽra jõmaʉ̃ra ũdubisi. Aarón bakurutrʉ nepono barabasi akʉza almendrata ʉ̃tʉ zesi. Jeowabara mawũã jõmara ũdubisi Aaróntrʉ iya jidasita sumo saserdote bamarẽã.