Gedeónbara madianitarãra iyi juwa edre baebisi

Ewari berabari wãne, israelitarabara Daizeze bedʼeaba jarabʉra ũrĩ ẽ basi akʉza jẽda yiwidʼi jʉ̃drʉsi daizeze zeri ẽãra. 7 poagabayeda madianitarabara israelitara nedʉwʉrʉrãra zrʉgapanasi akʉza ne urasida mãrĩpanasi. Madianitaraba israelitara neida oda ẽ marẽã, mĩrʉpanasi katuma zobeade. Ewari berabari wãne israelitarabara kʼarebata widisi Jeowa ãyita ẽdrʉbimarẽã. Jeowaba angel aba zokʼasi Gedeónʼa bedʼeata jaramarẽã, angelba jarasi: «Jeowaba bʉta jidasi gorogoro bia bamarẽã». Gedeónba widisi: «Mʉ̃ra kʼãrẽ ẽ kĩrãkʼabʉ, ¿mʉ̃ara sãwũã kʼarebaipe israelitarãra?».

Gedeónbara kʼawuakĩrãbasi wãrĩnu iyira Jeowaba jʉrʉsi kʼawuaita. ¿Kʼãrẽta osi iyara? Gedeónbara jidasi obeja kara ogamata, mõbe egoro eda balbʉesi akʉza Jeowaʼa jarasi: «Nʉ naʉ̃ obeja kara ogamata sʉrrʉabʉbʉrʉ, mamina audura põasãbʉbʉrʉ, mʉ̃a kʼawuayi bʉara mʉ̃ra jidasita Israel edrʉbimarẽã». Maʉ̃ nrʉema, maʉ̃ obeja kara ogamara sʉrrʉabasi, mamina audura põasãbasi. Tẽã Gedeónbara Jeowa widisi maʉ̃ obeja kara ogamara põasã bamarẽã akʉza audura sʉrrʉa bamarẽã. Maʉ̃ra aripe berabarisi, mawũãtrʉ Gedeónbara wãrĩnu ĩjãsi Jeowaba iyira jidasita. Maʉ̃ kʼarea ãba edesi iyi gorogororata mawũã madianitarabawara yõ wãita.

Jeowaba Gedeónʼra jarasi: «Mʉ̃ara kʼarebayi israelitaraba madianitara ãyi juwa edre baebimarẽã. Mamina Israelba mejãcha gorogororata erbʉ baera, gorogororabara krĩchadayi ãyi zareaba madianitarãra ãyi juwa edre baebidaita. Maʉ̃ kʼarea jarada yi perabʉra ãyi deda wãnamarẽã». Maʉ̃ kʼarea 22.000 ẽbẽrarã wãsi deda, waya 10.000 ẽbẽrarã wã ẽ basi. Tẽã Jeowaba jarasi: «Waidide mejãchabʉ gorogororãra. Maʉ̃rata edera do eda, mõbe mama jarada baniata dodamarẽã. Edera bʉ kʼaidu yi bania dakita dobʉrata, maʉ̃raba akʉbʉ baera nejʉrara zebʉ kʼawuaita». Maʉ̃ranebema 300 yumakẽrãraba dakita bania dosida. Jeowaba jarasi naʉ̃ra 300 yumakẽrãbʉba ãyi juwa edre baebita madianitarãra. Gorogoro Madiánʼnebemara 135.000 basi.

Maʉ̃ Diamasi, Jeowaba jarasi Gedeónʼa: «Idibʉrʉ yõne wãnaibara madianitarabawara». Gedeónbara iyi kʼaidupanʉra gorogororãra diasi kachurata akʉza jarrata, maʉ̃ jarrade edabasi tʉbʉ pʉreata, adewara jarasi: «Mʉ̃ta akʉidua, mõbe oidua mʉ̃a obʉrʉta». Gedeónbara biabisi kachura akʉza jarrata bogozoabisi, mõbe tʉbʉ pʉreabʉta ʉ̃ta jida kʼãrãpe jʉrasi: «¡Jeowa kuchota akʉza Gedeón kuchoʉ̃me!». Gedeónba oda kĩrãkʼa abarika osida 300 yumakẽrãrabida. Madianitarãra peraba badua wẽba wãsi. Ãya kʼawua ẽ basi baera kʼãrẽ oita, yiya bea jʉ̃drʉsida. Akʉza Jeowabara kʼarebasi israelitarãra ãyi nejʉrarata ãyi juwa edre baebita.