Jonatánbara zowaĩnĩgʉabʉta ũdubisi akʉza kʼẽrẽpabʉta

Saúl warra nããbemara Jonatánbasi, iyira gorogorobasi akʉza zowaĩnĩgʉabʉta ũdubisi. Davidbara jarasi Jonatánʼra nejõbʉira audre meserabasita akʉza leonʼira zarea mejãcha erbasita. Ewari aba Jonatánbara ũdusi pilisteo gorogororata katumanebasita, mõbe Jonatánbara iyi kʼarebabariʼa jarasi: «Dayirãra ãyibawara yõñi, Jeowaba dayirãta yõmarẽã jarara. Pilisteoraba dayirã jarara wãzemarẽã ãyibawara yõita, mawũãra kʼawuadayi yõ wãibarata». Maʉ̃ne pilisteorabara jarasida: «¡Yõita zeidua!». Maʉ̃ ewaride Jonatánbara akʉza iyi kʼarebabariʉ̃meba pilisteorãra 20 beasida.

Jonatánʼra yi warra nããbemabasi baera, Saúl beisidera iya zokʼaibarabasi yi zeze nokʼora. Mamina Jonatánbara bia kʼawuabasi Jeowabara Davidta jidasita nokʼo bʼaita, maʉ̃ kʼarea kĩrʉ ẽ basi Davidʼʉ̃mera. Awuarabʉrʉ ãyira neũdukʼawua biabasi. Yiya kʼarebaita jarasida. Jonatánbara diasi Davidʼara iyi wuata, yi enẽdrʉmata, iyi kuchota akʉza kʉrrʉde jʉ̃barita, mawũã ũdubita wãrĩnu iyi neũdukʼawuata.

David Saúldeba mĩrʉbasidera, Jonatánba akʉ wã kʼãrãpe jarasi Davidʼa: «Zowaĩnĩgʉabara Jeowaba bʉta jidasi baera nokʼo bamarẽã akʉza mʉ̃ zezebara maʉ̃ra bia kʼawuabʉ». ¿Bʉara erbakĩrãbʉka neũdukʼawua biata Jonatánʼne kĩrãkʼa?

Jonatánʼra edaʉde David kʼarea bebʉdebasi. Jonatánba kʼawuabasi baera yi zeze Saúlba Davidʼra beakĩrãbasita, naʉ̃ta jarasi: «Bʉa Davidta beara nekayirua zromata oyi. Iyira jipa ẽbẽra bia baera». Saúlʼra mejãcha kĩrʉsi Jonatánʼʉ̃me. Maʉ̃ poaga bio berabarida tẽã Saúlta Jonatánʼʉ̃mera yõne beisida.

Jonatán beida tẽã, Davidbara jʉrʉsi Jonatán warra Mefibosetʼta. Iya Mefibosetʼa jarasi: «Mʉ̃a bʉra ewari jõmaʉ̃nẽ akʉbayi, bʉ zezera mʉ̃ neũdukʼawua biabasi baera. Bʉra nama mʉ̃me ãbabayi akʉza mʉ̃me ãba nekobayi». Davidbara jipa kĩrãdua ẽ basi iyi neũdukʼawua Jonatánʼra.