KAPITULO 57
Jeowaba zokʼasi Jeremíasta jaradia wãmarẽã
Jeowabara jidasi Jeremíasʼra propeta bamarẽã Judá pʉwʉrʉde. Zokʼasi maʉ̃ pʉwʉrʉde ẽbẽrarã jaradiamarẽã. Mõbe jarasi iduaribimarẽã ãya nekʼãrẽ kayirua obʉta. Mamina Jeremíasbara jarasi Jeowaʼa: «Mʉ̃ra warrara, maʉ̃ba mʉ̃ra bedʼeabe ẽ ẽbẽrarã nããra». Jeowaba iyaʼa jarasi: «Perarãra mʉ̃a kʼarebayi bʉra akʉza mʉ̃a bʉaʼa jarayi kʼãrẽta jaraibarata».
Jeowaba jarasi Jeremíasʼa ãba jʉremarẽã zõrãrã Judá pʉwʉrʉdebemata. Jarasi jarra egoro omata todozoa bʉemarẽã zõrãrã nãã. Mõbe jaramarẽã jarasi: «Naʉ̃ kĩrãkʼa kʼãwũã berabariyi Jerusalénʼra». Jeremíasba maʉ̃ obʉrʉba zõrãrã mejãcha kĩrʉsida. Saserdote yi trʉ̃ Pasjurba Jeremíasʼra posi, mõbe Jeremíasʼra sepode jĩrʉta akʉza yi juwa eda ãba kabarikʉsi, Jeremíasʼra pirabe ẽ ʉ̃nadrʉsi. Nrʉema diapeda Pasjurbara ẽtasi iyira. Mõbe Jeremíasba jarasi: «Mʉ̃itara zare, mʉ̃ara Daizeze bedʼeara wuara jaradia ẽ». ¿Wãrĩnu maʉ̃ta osika Jeremíasbara? Mawũã ẽ. Jeremíasbara bia krĩchape jarasi: «Daizeze bedʼeara mʉ̃ sode erbʉ jipa. Maʉ̃ba iduaribi ẽ bayi jaradiaita». Maʉ̃ kʼarea Jeremíasbara iya jaradiabʉra iduaribi ẽ basi.
Poaga bio berabarida tẽã awuru nokʼoba zokʼasi Judádera. Saserdoterabara akʉza propeta zeri ẽãraba jʉradebasi Jeremíasba jaradiabʉra. Maʉ̃ kʼarea jarasida prinsipera: «Naʉ̃ yumakẽrãra beadaibara». Jeremíasba jarasi: «Maraba mʉ̃ta beadara bari beadayi. Mʉ̃ara jarabʉ Jeowaba jaramarẽã zokʼadata. Mawũã mʉ̃a krĩchabʉta jara ẽ». Prinsiperaba maʉ̃ ũrĩside jarasida: «Naʉ̃ ẽbẽrarã kʼãrẽa beira neẽ».
Jeremíasbara iduaribi ẽ basi iya jaradiabʉra. Mamina naʉ̃nera prinsiperãra mejãcha kĩrʉsida, mõbe jarasida nokʼoʼa Jeremíasta beadamarẽã. Nokʼobara jarasi ãya obʉrʉta omarẽã, mawũãi ãyara Jeremíasʼra jidada kʼãrãpe pozode eda ibalbʉesida egoroba awachude, mama beimarẽã. Pikãgade Jeremíasʼra egorobade joʉ wãsi.
Maʉ̃ kʼarea nokʼo gorogorora zokʼabari abaʉba, yi trʉ̃ Ébed-Mélecba, nokʼoʼa jara jʉ̃ẽsi: «Prinsiperabara Jeremíasʼra pozode balbʉesida, dayirãba mama iduaribidara Jeremíasʼra beiyi». Kaʉ̃ nokʼobara zokʼa bʉesi Ébed-Mélecta akʉza iyi kʼaidu zokʼa bʉesi yumakẽrã 30, mawũã Jeremíasta maʉ̃ pozodeba ãĩ bʉedamarẽã. Jeremíasbara iya jaradiabʉra jipa iduaribi ẽ basi. ¿Bʉsida iyi kĩrãkʼa bakĩrãbʉka?
«Jõmaʉ̃ba marã juradʼaya mʉ kʼarea, mawũãmina mʉta pẽwã zuburiata jõñiĩnu nʉmʉrã ẽdrʉya» (Mateo 10:22).