Jesúsbara jidasi Saulota

Saulora romanobasi, iyira tosida pʉwʉrʉ Tarsode. Iyi religionʼra pariseobasi akʉza iyara mejãcha kʼaubasi judiora ley ʉ̃rʉ, adewara mejãcha jʉrabasi Jesús kʼaidubemara. Ãyi dedaʉba yumakẽrãrata akʉza wẽrãrata erbari edebasi karselʼeda. Esteban beasidadera Saulobara akʉedaʉnʉmasi sãwũã mõgaraba beabarabʉra. Estebanʼra Jesús kʼaidubemabasi.

Jesús kʼaidubemarãra ũdukaudebasi kristiano kĩrãkʼa. Saulobara kristianora bari Jerusalénʼne awabʉrʉ jida ẽ basi. Awuarabʉrʉ jarasi sumo saserdoteʼa iyira zokʼa bʉemarẽã pʉwʉrʉ Damascoeda, mamabema kristianorasida jidaita. Saulo Damasco kʼawa babʉrʉde iyima mejãcha ʉ̃na tẽisi, maʉ̃ba baebisi iyira. Maʉ̃ne nemita ũrĩsi: «¿Saulo, kʼãrẽa pẽwãbʉ bʉara mʉ̃ra?». Sauloba widisi: «Kʼai bʉra». Mõbe maʉ̃ nemiba jarasi: «Mʉ̃ra Jesús. Wãra Damascoeda, mama jaradayi bʉa kʼãrẽta oibarata». Saulora daʉberrea totosi, maʉ̃ba kʼareba ededaibarabasi.

Damascode chuasi kristianota aba, maʉ̃ trʉ̃ra Ananíasbasi. Jesúsba jarasi Ananíasʼa: «Wãra Judasma, iyi dera chu kaye Rectade, mama widira Saulo ʉ̃rʉ». Ananíasba jarasi: «Mʉ̃a ũrĩbʉrʉ Saulobara kristianorãra bʉebʉta karselʼeda». Mamina Jesúsba jarasi: «Wãra Sauloidu. Mʉ̃a iyira jʉrʉsi pʉwʉrʉra bioʉʼa jaradia wãmarẽã Daizeze ʉ̃rʉ».

Aramaʉ̃ta Ananíasʼra Saulo bʉidu jʉ̃ẽ kʼãrãpe jarasi: «Saulo, mebẽã, mʉ̃ra Jesúsba zokʼabʉrʉ bʉ dabʉta jẽda ũdubimarẽã». Aramaʉ̃ta Saulobara jẽda ũdu besi. Jesús ʉ̃rʉ kʼawua kʼãrãpe, Jesús kʼaidubemabasi akʉza buru kʼoe kʼãrãpe kristianorabawaraʉba sinagogade jaradia jʉ̃drʉsi. ¿Bʉmara wuabemara judiorãra, maʉ̃ kʼareara kʼãrẽta krĩchasiba? Saulobara jaradiabasi Jesús ʉ̃rʉ, maʉ̃ta judiorabara akʉpanasi. Judioraba krĩchapanasi: «¿Iyara nããrãra Jesús kʼaidupanʉrãra pẽwãbasi ẽka?».

Pablobara Damasco pʉwʉrʉde poaga ũbeabayeda jaradiasi, judiorabara jipa jʉrapanasi baera krĩchapanasi sãwũã beadaita. Mamina mebẽrãbara maʉ̃ta ũrĩ, kʼarebasida sãwũã ẽdrʉbita. Maʉ̃ kʼãrẽa ẽne eda bʉeda kʼãrãpe muroare ãĩ bʉesida.

Saulo Jerusalénʼena jʉ̃ẽsidera, zarea osi mebẽrãra akʉ wãita. Mamina mebẽrã mamabemara perabasi iyi kʼarea. Mamina mebẽã abaʉba iyi trʉ̃ Bernabéba ũdubisi Saulora jipa awuarabasita iyi nãã badaira. Saulobara mebẽrãbawaraʉba jaradia jʉ̃drʉsi Daizeze ʉ̃rʉ Jerusalénʼne. Ẽbẽrarãbara ewari berabari wãne Saulora trʉ̃ jara wãsida Pablo.