Kristianorãra pʉwʉrʉ biode wã

Jesúsbara jarasi apostolera naʉ̃ drʉa jõmaʉ̃nẽ jaradia wãnamarẽã Daizeze ʉ̃rʉ, apostolerabara maʉ̃ta osida. Poaga 47 baside mebẽrã Antioquíadebemaba zokʼasi Pablota Bernabéʉ̃me pʉwʉrʉ awuara awuarakade jaradia wãnamarẽã. Ãyira wãsi Asia Menorʼeda, maʉ̃ra pʉwʉrʉrane ãyara jaradiakĩrã jaradiasi, bari jaradaita jʉ̃ẽsi Derbe, Listra akʉza Iconio.

Pablo Bernabéʉ̃mebara ẽbẽrarã jõmaʉ̃ʼa jaradiasida: yi nekʼãrẽ neẽãbʉa, yi plata mejãcha erbʉa, wũãwũãra akʉza zõrãrã. Adewara jaradiasida ẽbẽra Sergio Pauloʼa, maʉ̃ra gobernador Chipredebemabasi, mamina jaibana abaʉba idu jaradiabi ẽ baibasi. Pabloba jarasi maʉ̃ jaibana: «Jeowara bʉ ʉ̃rʉ bʉa». Maʉ̃ne maʉ̃ jaibanara daʉberre besi. Sergio Pauloba maʉ̃ ũduside wãrĩnu ĩjãsi Jeowa ʉ̃rʉ.

Pabloba Bernabéʉ̃mebara jaradia wãsida Daizeze ʉ̃rʉ: ode, deza deza, yiko nẽdobadamae akʉza sinagogade. Ewari aba Listra pʉwʉrʉde ãyara bebisi ẽbẽra arrenga wãbadata. Ẽbẽrarãba maʉ̃ ũduside krĩchasida ãyira daizezeta, maʉ̃ kʼarea ãyaʼa yiwidʼikĩrãpanasi. Mamina Pabloba Bernabéʉ̃mebara iduaribi ẽ basi ãya maʉ̃ta omarẽã, maʉ̃ne jarasida: «¡Daizeze abaʉʼabʉrʉ yiwidʼibara! Daira bari yumakẽrã baera, daiʼa yiwidʼibe ẽ». Aramaʉ̃ta judiorata zesi, mõbe aña bedʼea jʉ̃drʉsi Pablo ʉ̃rʉ. Mawũẽ Pablora mõgaraba mejãcha posida, beisita krĩchasida baera, Pablora ãĩ tabʉsida pʉwʉrʉdebara. ¡Mamina Pablora wabida zokʼaibasi! Mebẽrãta iyi kʼarebaita mesera zeda kʼãrãpe jẽda edesida pʉwʉrʉeda. Tẽã Pablora jẽda wãsi Antioquíaeda.

Akʉza poaga 49de Pablobara pʉwʉrʉ awuara awuarakade jaradia wãsi. Jẽda wãsi mebẽrã Asia Menordebema ũduita, maʉ̃ tẽã wãsi Europaeda jaradiade. Bari jaradaita wãsi: Atenasʼena, Éfesoeda, Filiposʼeda, Tesalónicaeda akʉza awuru pʉwʉrʉeda. Silasta, Lucasta akʉza Timoteota iyiʉ̃me jʉ̃ẽsida. Ãyara mejãcha nekʼãrẽ osida kongregasion yiwidi oita, adewara zarea osida mamabema kongregasionta zareapanamarẽã. Pablora basi Corintode poaga aba berabariyeda, mamabida kʼarebasi mebẽrãta zareapanamarẽã. Jaradiabasi akʉza kartata bʉbasi kongregasion bioraita. Adewara trajabasi de karpa oita. Maʉ̃ tẽã jẽda wãsi Antioquíaeda.

Pablobara poaga 52de wãma ũbea wãsi jaradiaita, maʉ̃ne jaradia jʉ̃drʉsi Asia Menorʼeda, tẽã wãsi Filiposʼeda akʉza Corintoeda. Pablora poaga biobayeda basi Éfeso pʉwʉrʉde, mama ẽbẽrarãta bebikʉabasi, jaradiabasi akʉza kʼarebasi kongregasionta. Adewara eskuelade badua diskurso diabasi. Ẽbẽrarã mejachaʉba ĩjãsida iya jarabadara. Mejãcha jaradiada tẽã Pablora wãsi Jerusalénʼena.