Karta Zõrãrã burubia ãba yi jʉrepanʉrane:

Mebẽrã:

Wãrĩnu Jeowa kãgapanʉrãra Daizeze Bedʼeasida kãga. Wãrĩnu ĩjãpanʉ Daizeze Bedʼeade eda nebʉrabʉra wãrĩnuta akʉza erbʉ ũrãgʼa dayi kʼarebaseabʉta, adewara ũdubibʉ sãwũã Jeowabara ẽbẽrarãra wãrĩnu kãgata (Salmo 119:105; Lucas 1:3; 1 Juan 4:19). Daibara eda Daizeze Bedʼeadebʉta ẽbẽrarãba kʼawuamarẽã kãgapanʉ. Maʉ̃ kʼarea osida naʉ̃ librota: Daizeze Bedʼeadeba mʉ̃a nekʼawuabʉta. Nama jaradayi naʉ̃ librora sãwũãbʉta.

Naʉ̃ libro osidadera osida wũãwũãra ʉ̃rʉ krĩchadape, mamina naʉ̃ librobara ẽbẽrarã kĩrãdawuarabʉrasida Daizeze Bedʼea ʉ̃rʉ audre kʼawuakĩrãbʉbʉrʉ kʼarebaseabʉ. Daizeze Bedʼeara ẽbẽrarã jõmaʉ̃ita baera kʼarebaseabʉ ẽbẽrarã yi maʉ̃ ʉ̃rʉ akʉbʉrasida, maʉ̃ba sobiabibʉ baera.

Naʉ̃ librode edabʉra Daizeze Bedʼeadeba osida, mamara ũdubibʉ ẽbẽra parãnaneba ʉ̃ta. Naʉ̃ libro osidadera zarea osida bedʼea zarea neẽ, ũrĩne akʉza iyi berabarida kĩrãkʼa arare arare bʉdamarẽã.

Naʉ̃ librobara bari nebʉratrʉ jarabʉ ẽ, naʉ̃ librode eda dibujorabʉra akʉza naʉ̃ne bedʼeabʉra bari osida ẽ, awuarabʉrʉ osida dayirãba krĩchadamarẽã sãwũã krĩchabasita, adewara sãwũã berabarisita maʉ̃ra nebʉrata.

Naʉ̃ librodera ũdubibʉ eda Daizeze Bedʼeade jarabʉdera, ʉ̃kʉrʉ ẽbẽrarãba sãwũã Daizeze Bedʼea ũrĩna ʉ̃rʉ akʉza ʉ̃kʉrʉba sãwũã Daizeze Bedʼea ũrĩna ẽ bada ʉ̃rʉ. Naʉ̃ libroba kʼarebabʉ dayirãba kʼawua zemarẽã, kʼãrẽta kʼawuaseabʉta maʉ̃ra ẽbẽrarã ʉ̃rʉ (Romanos 15:4; 1 Corintios 10:6). Naʉ̃ librora 14 partede drasida, parte jʉ̃drʉi nãã bʉ dayirãba kʼãrẽ kʼawuaseabʉta.

Bʉta wũãwũã barabʉbʉrʉ, kapitulo aba leseabʉ iyiʉ̃meba akʉza yi dibujorata akʉseabʉ. Tẽã leseabʉ maʉ̃ kapitulodebema testota. Mara wũãwũã jaradiara kʼãrẽne abarika badebʉta Daizeze Bedʼeata maʉ̃ libroʉ̃mera. Maʉ̃ta ẽbẽra kĩrãdawuarachua jaradiakĩrãbʉbʉrʉ abarika oseabʉ, mawũã jaradiaita Daizeze Bedʼeaba jaradiabʉ kĩrãkʼa.

Kãgapanʉ naʉ̃ librodeba zõrãrãba, warraraba jari soiduba ũrĩkĩrãbʉba kʼawuadamarẽã Daizeze Bedʼeaba jarabʉta mawũã ãyabida ozedamarẽã. Mawũã ãyisida Jeowa yiwidʼiseabʉ akʉza Jeowa mebẽrãne eda baseabʉ.