YI 35
¿Kʼãrẽta oseabʉ bia jida kʼawuaita?
Dayirã jõmaʉ̃ba ewariza jidabʉ dayirã sãwũã bʼaita akʉza jidabʉ dayi Jeowaʉ̃me bia bʼaita mawũã ẽ bʉrʉ bia ba ẽ baita. Bari jaradaita dayirãba jidaibara dayi sama bʼaita, kʼãrẽ oita, kʼãrẽne trajaita akʉza juwa jidaita mawũã ẽ bʉrʉ juwa jida ẽ baita. Dayirãba maʉ̃ranebemata bia jidara, dayirã sobiabayi akʉza Jeowasida sobiabiyi.
1. ¿Daizeze Bedʼeabara sãwũã kʼarebaseabʉ bia jida kʼawuaita?
Nekʼãrẽ jidainaweda Jeowa widira kʼarebata akʉza jʉrʉda Daizeze Bedʼeade kʼãrẽta krĩchabʉta Daizezeba maʉ̃ ʉ̃rʉ (akʉra Proverbios 2:3-6). Bʉara edaʉde ũduseabʉ Jeowaba kʼãrẽta omarẽã kãgabʉta, mawũãbʉbʉrʉ yibia bayi maʉ̃ bedʼea ũrĩta.
Mamina, ¿kʼãrẽta berabariseabʉ Daizeze Bedʼeaba jara ẽ bʉrʉ maʉ̃ ʉ̃rʉ kʼãrẽ iota? Ĩjãibara Jeowaba kʼarebaita «kʼãrẽ ode teibaibarata» (Isaías 48:17). ¿Sãwũã kʼarebai? Iyi Bedʼearadebemaba. Daizeze Bedʼeabara kʼarebabʉ kʼawuaita Jeowaba kʼãrẽ kãgabʉta akʉza kʼãrẽ krĩchabʉ ʉ̃rʉ. Dayirãba Daizeze Bedʼeadebema nebʉra ʉ̃rʉ akʉbʉrʉde, kʼawuabʉ kʼãrẽta kãgabʉta Daizezeba akʉza maʉ̃ ʉ̃rʉ kʼawuabʉba jidabibʉ dayirã bia wãita akʉza Jeowa sobiabita.
2. ¿Nekʼãrẽ jidai naweda nãã kʼãrẽta kʼawuabaibara?
Daizeze Bedʼeabara jarabʉ: «Yi bʉrʉbiabara nãã biʼia akʉbʉ iyi wãmae» (Proverbios 14:15). Naʉ̃ba jarakĩrãbʉ nãã kʼãrẽ jidainaweda biʼia krĩchaibarata, biʼia krĩchada tẽã bʉyikʉza widira: «Daizeze Bedʼeabara, ¿kʼãrẽta jarabʉ maʉ̃ ʉ̃rʉra? ¿Kʼãrẽ jidabʉrʉba kʼarebai mʉ̃ aduʼa bʼaita? ¿Mʉ̃a jidabʉba wuabemarãra sãwũã zʉbʉriabiseabʉ? ¿Mʉ̃a nekʼãrẽ oita jidabʉdeba Jeowara sobiabiseabʉka?» (Deuteronomio 32:29).
Daizezebʉrʉ jaraseabʉ dayirãra saʉ̃ta nebiata akʉza saʉ̃ta nekayiruata. Dayirãba iya zokʼabʉ bia ũdukʼawuabʉde, kʼãrẽ biata jidaseabʉ akʉza dayirã krĩchasida aduʼa erbaseabʉ. Dayirãba Jeowaba zokʼabʉta biʼia kʼawuapanʉbʉrʉ, bia jidaseabʉ akʉza kʼawuapanʉ saʉ̃ta nebiata adewara saʉ̃ta nekayiruata (Romanos 2:14, 15). Dayirã krĩchata bia zokʼa kʼawuabʉbʉrʉ nebiata jidadayi.
AUDRE BIʼIA KʼAWUADADRɄ
Akʉdadrʉ sãwũã kʼarebaseabʉta Daizeze Bedʼearadebemaba akʉza dayi krĩcha bia zokʼa kʼawuabʉba nebia jida kʼawuaita.
3. Daizeze Bedʼearadebema idu yi edebira
¿Sãwũã kʼarebabʉ Daizeze Bedʼeabara nekʼãrẽ jidabʉdera? Akʉra BIDEOTA, mõbe naʉ̃ta panʉidua:
¿Daizezebara kʼãrẽ nebiata diasi dayirã?
¿Jeowabara kʼãrẽa iduaribisi dayirãkʉza jida kʼawuamarẽã?
¿Daizezebara kʼãrẽta diasi dayirãkʉza bia jida kʼawuamarẽã?
Kʼawuaita Jeowaba kʼãrẽ krĩchabʉta, akʉra Efesios 5:15, 16, maʉ̃are bedʼeaidua dayi ewarita sãwũã bia zokʼa kʼawuai ʉ̃rʉ:
Daizeze Bedʼea ewariza akʉita.
Kima bia bʼaita, zeze bia bʼaita akʉza wũãwũãra bia bʼaita.
Ãba yi jʉrebarima wãita.
4. Bia zokʼa kʼawuara bʉ krĩchara mawũã nekʼãrẽ bia jida kʼawuaita
Daizeze Bedʼeaba jarabʉbʉrʉ daya kʼãrẽ oita zare ẽ jidaita, mamina jara ẽ bʉrʉ kʼãrẽ oita, ¿dayirãbara kʼãrẽta oseabʉ? Akʉra BIDEOTA, mõbe naʉ̃ta panaidua:
Naʉ̃ bideo ũdubibʉdera, ¿kʼãrẽta osi mebẽãbara iya bia jida kʼawuaita akʉza Jeowa sobiabita?
¿Kʼãrẽa jara ẽ baibara dayirãbara awurua dayirãbari jidamarẽã? Akʉra Hebreos 5:14, mõbe naʉ̃ta panʉidua:
Dayirãitara yibia bakasimina wuabemaraba jaradamarẽã daya kʼãrẽ oseabʉta, mamina, ¿kʼãrẽa audre yibia dayirã aba abakaʉba jida kʼawuaita?
¿Kʼãrẽba kʼarebaseabʉ daya bia jida kʼawuaita?
Dayirãba jida kʼawuaira mapa kĩrãkʼabʉ, kʼarebabʉ baera samare wãita.
5. Wawiara wuabemaraba jidabʉta
Dayirã jõmaʉ̃ta awuarabʉ baera jidapanʉ nekʼãrẽ awuarabʉta mamina akʉdayi sãwũã wawia ũdubidaibarata wuabemaraba krĩchabʉta. Akʉdaya yiza ũme.
Yiza 1: Mebẽã mejãcha yokĩrãta wãñi awuru kongregasionma, mamina mamabema mebẽrãra yokĩrãna ẽ.
Akʉra Romanos 15:1 akʉza 1 Corintios 10:23, 24, mõbe naʉ̃ta panʉidua:
Mõbemata naʉ̃ testoba jarabʉdera, ¿mebẽãbara kʼãrẽta jidaseabʉ? Bʉ krĩchaba iduaribibʉrʉ bʉa obʉta mamina ẽbẽra bʉbawara bʉ krĩchaba iduaribi ẽ bʉrʉ bʉa obʉ kĩrãkʼa oita, ¿kʼãrẽta oseabʉ bʉara?
Yiza 2: Mebẽã abaʉba kʼawuabʉ Daizeze Bedʼeaba jarabʉta aukara itua do ẽ bʉrʉ bedʼea neẽãta, mamina iyara jipa do ẽ maʉ̃ ituara. Ewari aba trʉ̃sida ãyi mebẽrãbawara ãba bʼaita, mamina iya ũdubʉ ãyira itua dobarabʉta.
Akʉra Eclesiastés 7:16 akʉza Romanos 14:1, 10, mõbe naʉ̃ta panʉidua:
Mõbemata naʉ̃ testoba jarabʉdera, ¿mebẽãbara kʼãrẽta jidaseabʉ? Bʉa ũdura ẽbẽraba opanʉta bʉ krĩchaba iduaribi ẽãta, ¿bʉara kʼãrẽta oseabʉ?
¿Kʼãrẽta oseabʉ bia jida kʼawuaita?
1. Jeowa kʼarebata widira bia jida kʼawuaita (Santiago 1:5).
2. Jʉrʉda Daizeze Bedeade akʉza kartarane maʉ̃ ʉ̃rʉ bedʼeabʉta, adewara kʼarebata widiseabʉ mebẽã audre kʼawuabʉʼa.
3. Krĩchara kʼãrẽta berabariseabʉta bʉa jidabʉdeba bʉta akʉza wuabemarata.
Ʉ̃KɄRɄBA KRĨCHAPANɄTA: «Bʉa jidaseabʉ bʉa jidakĩrãta, ¿kʼaiba kasiai ẽbẽrarãba jarapanʉta?».
¿Kʼãrẽa yibia bʼai krĩchaita Jeowa sãwũã krĩchabʉta akʉza wuabemarata?
KĨRÃBEITA
Bia jida kʼawuapanʉ Jeowaba maʉ̃ ʉ̃rʉ kʼãrẽ krĩchabʉ kʼawuabʉde akʉza kʼawuabʉde wuabemara zʉbʉria ẽãne.
Panʉnadrʉ
¿Bʉa jidabʉrʉba sãwũã Jeowara sobiabiseabʉ?
¿Bʉa kʼãrẽta oseabʉ bʉ krĩcha bia zokʼa kʼawuaita?
¿Sãwũã wawiata ũdubiseapanʉ wuabemaraba jidabʉ kʼarea?
JɄRɄDA AUDRE KʼAWUAITA
¿Bʉa jidabʉdeba sãwũã audre Jeowa kʼawa babiseabʉ?
«Daya obʉdeba ũdubibara Jeowa wãrĩnu kãgabʉta» (Jarakabʉ, 15de abrilde 2011de)
Kʼawuara audre Jeowaba sãwũã ũrãgʼa bia diabʉta.
Jeowabara jaradiabʉ iyi kʼaidu panʉra sãwũã bia jida kʼawuaita (9:50)
Akʉdadrʉ kʼãrẽba kʼarebasita yumakẽrãba jidaita, iya kʼawua ẽ basimina kʼãrẽ oita.
Akʉdaya sãwũã Jeowa sobiabiseabʉta iya dayirã jara ẽ mina kʼãrẽta oibarata.