YI 49
¿Bʉ mebẽrãra sãwũã sobia baseabʉ? (Yi 1)
Yi juwa jidapanʉrabara kãgapanʉ ewari jõmaʉ̃nẽ sobiapanaita ãyi ʉ̃rabʉrʉ juwa jidada kĩrãkʼa, maʉ̃ra mawũã panaseabʉ. Kristianora dããraba juwa jidapanʉraba kʼawuabʉ maʉ̃ra wãrĩnu berabariseabʉta Daizeze Bedʼeaba jarabʉde obʉbʉrʉ.
1. ¿Kʼãrẽ ũrãgʼata diabʉ Daizeze Bedʼeabara yumakẽrãra?
Daizezebara kãgabʉ yumakẽrãra yi kima akʉza yi wũãwũãra buru bamarẽã (akʉra Efesios 5:23). Jeowaba kãgabʉ iya nebia jidamarẽã iyi mebẽrãita. Daizeze Bedʼeaba jarabʉ: «Yumakẽrãra, mara kimara kãgaidua» (Efesios 5:25). Maʉ̃bara, ¿kʼãrẽta jarakĩrãkʉ? Yumakẽrã yi kima kãgabʉbara deda bia akʉbʉ akʉza wuabemara daidubida, yi kimaba akʉbʉ, sobiabibʉ akʉza iya nesidabʉta diabʉ (1 Timoteo 5:8). Yi audre yibiara iya kʼarebabʉ Jeowa neũdukʼawua bamarẽã (Mateo 4:4). Bari jaraita, iyi kimaʉ̃me yiwidʼibʉ iyira akʉza Daizeze Bedʼeata akʉpanʉ. Yumakẽrãba iyi kimata bia akʉbʉde, audre Jeowa neũdukʼawua ba wã (akʉra 1 Pedro 3:7).
2. ¿Kʼãrẽ ũrãgʼata diabʉ Daizeze Bedʼeabara yuwẽrãra?
Daizeze Bedʼeaba jarabʉ: «Yuwẽrãbida wawia ũdubibara yi kimara» (Efesios 5:33). ¿Sãwũã maʉ̃ta oseapanʉ yuwẽrãrabara? Iya krĩchaseabʉ yi kimaba nebia erbʉ ʉ̃rʉ akʉza iyi akʉita zarea obʉ adewara yi wũãwũãrata. Adewara wawia ũdubiseabʉ yi kimaba kʼare oita jidabʉrʉde, adewara ibia bedʼeabʉ iyaʼa akʉza wuabemarabida yi kima ʉ̃rʉ, iyi kima Jeowa odebʉ ẽ mina.
3. ¿Sãwũã ãba baseabʉ juwa jidabʉrãra?
Daizeze Bedʼeabara jarabʉ: Ãyi ũmena «kakua abaʉ kĩrãkʼa» bʉta (Mateo 19:5). Ãyira zarea odaibara yi idubʉda ẽ baita, kʼãrẽ bedʼea zroma berabaribʉmina. Maʉ̃ berabari ẽ marẽã, ãyira ãba bʼaibara, jaraibara ãyi kʼãrẽ krĩchabʉta akʉza ãyi sãwũãbʉta. Ãyitara audre yibiabaibara yi kimata akʉza Jeowata. Jʉra kʼawua bʼaibara awuru ẽbẽraʉ̃me mejãcha neũdukʼawua ba ẽ baita yi kimaira.
AUDRE BIʼIA KʼAWUADADRɄ
Akʉra Daizeze Bedʼeadebemaba sãwũã zarea erbabiseabʉta bʉ juwa jidabʉra.
4. Yumakẽrãra: kãgata ũdubira bʉ kima akʉza biʼia akʉra
Daizeze Bedʼeaba jarabʉ: «Yumakẽrã kimabarabʉbara yi kimara kãgaibara ãyikʉza iyi kakua kãgabʉ kĩrãkʼa» (Efesios 5:28, 29). Maʉ̃bara, ¿kʼãrẽta jarakĩrãkʉ? Akʉra BIDEOTA, mõbe naʉ̃ta panʉidua:
¿Sãwũã yumakẽrãbara ũdubiseabʉ iya kãgabʉta akʉza bia akʉbʉta iyi kimara?
Akʉra Colosenses 3:12, mõbe naʉ̃ta panʉidua:
¿Sãwũã yumakẽrãbara naʉ̃ nebiata ũdubiseabʉ yi kima?
5. Yuwẽrãra: kãgata akʉza wawiata ũdubira bʉ kima
Daizeze Bedʼeaba jarabʉ yuwẽrãba wawia ũdubimarẽã yi kimata iyi Daizeze ode bʉ ẽ mina. Akʉra 1 Pedro 3:1, 2, mõbe naʉ̃ta panʉidua:
Bʉ kimata Jeowa odebʉ ẽ bʉrʉ maʉ̃ta bʉa kãgabʉbʉrʉ Jeowa ode bamarẽã, bʉmara, ¿kʼãrẽba kʼarebai: bʉa Daizeze Bedʼea badua jaradiaiba mawũã ẽ bʉrʉ bʉ kʼẽrẽpa bʼaiba akʉza wawia ũdubiba? ¿Kʼãrẽa mawũã krĩchabʉ?
Yi juwa jidapanʉra ãbaʉba jidaseapanʉ kʼãrẽ oita, mamina edaʉde yuwẽrã juwua jidabʉitara zare yumakẽrãba jidabʉra. Yuwẽrãbara jaraseabʉ iya krĩchabʉra, wawiade akʉza ibiade, mamina iyara krĩchaibara Jeowaba jarabʉta yumakẽrãbʉrʉ jidabʉ baera kʼãrẽ oita. Iyira zarea oibara iyi kimaba jidada oita, maʉ̃ba obʉ yi mebẽrãbawara sobia bʼaita. Akʉra 1 Pedro 3:3-5, mõbe naʉ̃ta panʉidua:
¿Sãwũã krĩchabʉ Jeowara yuwẽrãba wawia ũdubibʉde yi kima?
6. Mara bedʼea zromara ara oseapanʉ
Yi juwa jidabʉrabara jõma aripe opanʉ ẽ, maʉ̃ kʼarea zarea oibara ãyi bedʼea zroma ara oita. Akʉra BIDEOTA, mõbe naʉ̃ta panʉidua:
Naʉ̃ bideode ũdubidadebara, ¿sãwũã kʼawuapanʉ juwa jidapanʉrãra ãba ba ẽ basita ãyi nãã bada kĩrãkʼa?
¿Kʼãrẽta osida audre ãba bʼaita?
Akʉra 1 Corintios 10:24 akʉza Colosenses 3:13, mõbe naʉ̃ta panʉidua:
¿Sãwũã naʉ̃ ũrãgʼata oseapanʉ ãyi kimaʉ̃me ãba bʼaita?
Daizeze Bedʼeaba jarabʉ yiya wawia ũdubibarata. Naʉ̃ba jarakĩrãkʉ wawiade akʉza kãgade edadaibarata mebẽrãra. Akʉra Romanos 12:10, mõbe naʉ̃ta panʉidua:
¿Yi juwa jidapanʉrabara jʉ̃ãibaraka ababemaba iyi bia edamarẽã iyabida bia edai baera? ¿Kʼãrẽa?
Ʉ̃KɄRɄBA KRĨCHAPANɄTA: «Mʉ̃ kimaʉ̃mera mʉ̃ra ãba bʉ ẽ nãã bada kĩrãkʼa».
¿Sãwũã ãyaʼa ũdubiseapanʉ Daizeze Bedʼeabara kʼarebabʉta?
KĨRÃBEITA
Juwa jidapanʉrãra sobia baseabʉ yiya kãgata ũdubipanʉbʉrʉ, yiya wawiata ũdubipanʉbʉrʉ akʉza Daizeze Bedʼeade jarabʉde obʉbʉrʉ.
Panʉnadrʉ
¿Kʼãrẽta oseabʉ yumakẽrãbara iyi kimaʉ̃me sobia bʼaita?
¿Kʼãrẽta oseabʉ yuwẽrãbara iyi kimaʉ̃me sobia bʼaita?
¿Bʉta juwa jidabʉbʉrʉ saʉ̃ Daizeze bedʼearadebemaba kʼarebaseabʉ bʉ kimaʉ̃me bia bʼaita?
JɄRɄDA AUDRE KʼAWUAITA
Akʉra ũrãgʼa biaba sãwũã karebabʉta bʉ mebẽrãbawara sobia bʼaita
Akʉra bideo trãbi ũdubibʉta juwa jidapanʉraba Daizeze ũrãgʼata obʉbʉrʉ nebia ũduita.
Akʉra kʼãrẽta jarakĩrãkʉta mebẽrã buru wawiaita
¿Sãwũã juwa jidapanʉrabara ãya bedʼea zroma erpanʉraara oseapanʉ yi idʉbʉkĩrãpanʉmina?