Sãwũã oita ãba yi jʉrebari Bʼaita Kristianora kĩrãkʼa akʉza Trajaita Daizezeita

Yi arare ararebʉta

1. Ãba yi jʉrebʉ Bʼaita Kristianora kĩrãkʼa akʉza Trajaita Daizezeita oibara Karta nekʼawuabarideba akʉza nama jarabʉdeba. Nejaradiabarira jõmaʉ̃ba ũdubibara ãya omarẽã zokʼadapeadata. Ẽbẽra semanaza wãbʉta nekʼãrẽ oseabʉ ãba yi jʉrebʉmae ãya opanʉbʉrʉ Daizeze Bedʼeaba jarabʉta. Ãba yi jʉrebʉrʉde Karta nekʼawuabari estudiaita, ẽbẽra abaʉba diskurso diakĩrãbʉbʉrʉ bedʼeaibara mebẽã yi nãã bedʼeabʉme. Maʉ̃ mebẽãbara jara ũrĩbiyi kʼãrẽta oibarata asignasion diaita. Maʉ̃ ẽbẽrata warrarabʉrʉ yibariraʉ̃me ãbabaibara, Daizeze Bedʼea kʼawuabaribʉrʉ yi nejaradiabariʉ̃mebaibara (od-S yi 8 parr. 8).

YI NÃÃ BEDʼEABɄTA

2. 1 minuto. Trãbi tẽã akʉza yiwidʼida tẽã, mebẽã nãã bedʼeabʉba obiyi yi ũrĩpanʉraba kʼawuakĩrãnamarẽã kʼãrẽ ʉ̃rʉ bedʼeaita akʉza ũdubibara kongregasionʼra kʼãrẽba kʼarebaita.

BEDʼEA BIA DAIZEZE BEDʼEADE ŨDUDATA

3. Diskursota (10 minuto). Karta nekʼawuabaride bedʼea bia ũme ʉ̃tʉ zebʉ. Naʉ̃ diskursorata oibara zõrãrãba mawũã ẽ bʉrʉ zõrãrã kʼarebabariba. Dayirãba Daizeze Bedʼeadebema libro yiwidi akʉbʉrʉde, akʉdaibara bideota, naʉ̃ bideoba ũdubiyi kʼãrẽ ʉ̃rʉ bedʼeabʉta naʉ̃ libroba. Yi diskurso jara ũrĩbibʉba jara ũrĩbiyi kʼãrẽne abarikachuta maʉ̃ bideota naʉ̃ kartaʉ̃me, iyara Karta nekʼawuabaride edabʉra jõma jara ũrĩbibara, adewara ewarita erbʉbʉrʉ ũdubibara potota akʉza testora jõma, bedʼea awuru kartadebemata zokʼaseabʉ, mamina maʉ̃ bedʼeara mama bedʼeabʉ kĩrãkʼa bedʼeaibara.

4. Jʉrʉda nekʼãrẽ biʼiabʉta Daizezedebemata (10 minuto). Nama widipanʉ akʉza panʉpanʉ. Naʉ̃ra jaradiabʉ zõrãrãba mawũã ẽ bʉrʉ zõrãrã kʼarebabariba. Yi jara ũrĩbinʉmʉbara widita ũme oibara akʉza jidaseabʉ testora leita mawũã ẽ bʉrʉ jõma le ẽ baita. Yi ʉ̃ta juwa jirabaripanʉrãra 30 segundo mawũã ẽ bʉrʉ eda bedʼeaibara.

5. Leita: (4 minuto). Naʉ̃ra oibara yumakẽrã abaʉba. Naʉ̃ mebẽãbara leibara iya lemarẽã jaradapeadatrʉ. Mebẽã nãã bedʼeabʉbara kʼarebaibara mebẽrã bia bedʼeadamarẽã, iyikʉza kʼawuaita iya lenʉmʉta, aripe leita, bia bedʼeaita wuabemaraba ũrĩne akʉza mesera le ẽ baita. Ʉ̃kʉrʉ lebʉra yi zroma baera, bia jʉrʉpanʉ kʼaiba oita ãya sãwũã lepanʉneba maʉ̃ omarẽã zokʼaita.

ORA BɄA DAIZEZE BEDʼEA JARADIABɄRɄDE

6. 15 minuto. Nama jaradiabʉ daya sãwũã audre bia jaradia kʼawuaita. Zõrãrãbida maʉ̃ diskursota diaseabʉ. Ẽbẽra aba abakaʉba oibara Kãgara ẽbẽrarã kartaba jarabʉ kĩrãkʼa mawũã ẽ bʉrʉ karta Jaradiaita. Diskursode bedʼea yi wuabemarabawaraʉba akʉmarẽã jarabʉra, maʉ̃ta oibara zõrãrãba mawũã ẽ bʉrʉ zõrãrã kʼarebabariba (akʉra parrapo 15ta maʉ̃ta sãwũã oseabʉta yi wuabemarabawaraʉba).

7. Bedʼea jʉ̃drʉra: Naʉ̃ra oseabʉ mebẽã yumakẽrãraba mawũã ẽ bʉrʉ yuwẽrãraba, mamina yumakẽrãba yuwẽrãʉ̃meba obʉbʉrʉ ãyira mebẽãrabaibara. Maʉ̃ opanʉrãra oseapanʉ piradrʉ mawũã ẽ bʉrʉ jeweda (kʼawuaita naʉ̃ sãwũã oita akʉza kʼãrẽ ʉ̃rʉ jaraita akʉra parrapo 12 akʉza 13).

8. Jẽda akʉ wãra: Naʉ̃ra oseabʉ mebẽã yumakẽrãraba mawũã ẽ bʉrʉ yuwẽrãraba, mamina yumakẽrãba yuwẽrãʉ̃meba obʉbʉrʉ ãyira mebẽãrabaibara (km-S 5/97 pag. 2). Maʉ̃ opanʉrãra oseapanʉ piradrʉ mawũã ẽ bʉrʉ jeweda. Yi naʉ̃ jaradiabʉbara bedʼeaibara iya nãã jaradiaita amaena ʉ̃rʉ (kʼawuaita naʉ̃ sãwũã oita akʉza kʼãrẽ ʉ̃rʉ jaraita akʉra parrapo 12 akʉza 13).

9. Jesu kʼaidu babira: Naʉ̃ra oseabʉ mebẽã yumakẽrãraba mawũã ẽ bʉrʉ yuwẽrãraba, mamina yumakẽrãba yuwẽrãʉ̃meba obʉbʉrʉ ãyira mebẽãrabaibara (km 5/97 pag. 2). Maʉ̃ opanʉrãra oseapanʉ piradrʉ mawũã ẽ bʉrʉ jeweda. Yi naʉ̃ oibara ũdubibara Daizeze Bedʼea ʉ̃rʉ sãwũã biʼia jaradiaita. Naʉ̃ bedʼea jara ũrĩbi nãã mejãcha, bedʼea ẽ baibara akʉza tẽã jõbʉrʉdebida kʼãrẽa mejãcha bedʼeaira nesida ẽ, maʉ̃ta kartaba omarẽã jara ẽ bʉrʉ. Parrapora jõma leita nesida ẽ oseabʉmina.

10. Jara ũrĩbira bʉa ĩjãbʉ ʉ̃rʉ: Naʉ̃ne jarabʉbʉrʉ diskurso kĩrãkʼa diaita, yumakẽrãba oibara. Mamina naʉ̃ta mebẽrãba oũdubibʉbʉrʉ oseabʉ mebẽã yumakẽrãraba mawũã ẽ bʉrʉ yuwẽrãraba, mamina yumakẽrãba yuwẽrãʉ̃meba obʉbʉrʉ ãyira mebẽãrabaibara. Mebẽrã yi maʉ̃ obʉbara panʉibara maʉ̃ bedʼeaba widibʉra, maʉ̃ oira zokʼaibara ãyaʼa bedʼea jarabʉdata. Mebẽã yi maʉ̃ obʉbara jaraseabʉ mebẽrã jʉrʉmarẽã iyi bedʼeai ʉ̃rʉ.

11. Diskurso: Naʉ̃ra mebẽã yumakẽrãba oibara. Kãgara ẽbẽrarã kartaba erbʉ apendiserata. Diskurso diaita zokʼadara apendise 1 maʉ̃ kartadebemata, jara ũrĩbibara sãwũã zokʼaseabʉta testorata jaradia wãbʉrʉde. Bari jaradaita maʉ̃ bersikulo ʉ̃rʉ jara ũrĩbiseabʉ, mawũã ẽ bʉrʉ ũdubiseabʉ sãwũã jara ũrĩbiseabʉta maʉ̃ testo ʉ̃rʉ ẽbẽra.

12. Nekʼãrẽ edabʉ akʉita: Naʉ̃ parrapode akʉza naʉ̃arebemane naʉ̃ ʉ̃rʉ bedʼeayi: «Bedʼea jʉ̃drʉra» akʉza «Jẽda akʉ wãra». Yi mebẽã maʉ̃ oibara jara ũrĩbibara Daizeze Bedʼeadebemata akʉza widibara ẽbẽra jẽda akʉ wãseabʉ kʼawuaita Daizeze Bedʼeadebema audre bia jara ũrĩbita. Yi naʉ̃ oibara jidaibara bedʼea iyibʉmae ẽbẽrarãba audre ũrĩta. Iya jidaseabʉ bideo ũdubita, mawũã ẽ bʉrʉ karta diaita Nekʼãrẽ jaradiabaridebemata. Krĩchade kʼawuada jarai kaude bedʼeaibara iyi bedʼeai kĩrãkʼa akʉza wuabemara ẽbẽra ʉ̃rʉ krĩchabʉta ũdubibara, adewara aduʼa bedʼeabaibara.

13. Sama jaradia bʼaita: Maʉ̃ oibara maʉ̃ obʉrʉdera oibara iyi pʉwʉrʉdebʉmae berabaribʉ kĩrãkʼa. Bari jaradaita:

(1) Deza deza: Jaradiaibara deza deza (ẽbẽrarã kĩrãbita bedʼeabʉde, telepononeba, mawũã ẽ bʉrʉ kartadeba), adewara jẽda akʉ wãibara ẽbẽra daya jaradiada deza deza jʉ̃ẽside.
(2) Bʉyi wãmae jaradiara: Naʉ̃ba ũdubibʉ sãwũã dayi wãmae Daizeze Bedʼea ʉ̃rʉ bedʼeaseabʉta ẽbẽraba kʼawua ẽ nãã. Bari jaradaita, maʉ̃ta oseabʉ: trajode, kolegiode, bʉ de kʼawa, mawũã ẽ bʉrʉ badumae.
(3) Ode jaradia wãita: Maʉ̃ oira oseabʉ esibidorde, ne nẽdopanʉmae, ode, parkede, mawũã ẽ bʉrʉ ẽbẽrarãbʉmae.

14. Bideo sãwũã zokʼaita akʉza kartarata: Yi naʉ̃ oibara bideota ũdubimarẽã eda jarabʉbʉrʉ ũdubinʉmʉ kĩrãkʼa ora, mamina bʉa maʉ̃ta okĩrãbʉbʉrʉ jara ẽãne, ũdubi kĩrãkʼa ora.

BʼAITA KRISTIANORA KĨRÃKʼA

15. Jʉ̃drʉi naweda nããra trãnañi, naʉ̃ra obʉ zõrãrãba mawũã ẽ bʉrʉ zõrãrã kʼarebabariba. Maʉ̃ tẽã ũrĩpanʉ diskurso ũme, naʉ̃ra diskursoraba kʼarebabʉ yi ũrĩpanʉta Daizeze Bedʼeaba jarabʉta odamarẽã, naʉ̃ra 15 minutobayeda oibara. Kongregasionba nesidabʉta zõrãrãbʉrʉ jara ũrĩbiyi. Yi wuabemabawaraʉba akʉibarabʉrʉ, yi maʉ̃ ʉ̃rʉ jaradiabʉbara jʉrʉseabʉ maʉ̃ awuara kʼãrẽta widiseabʉta. Mebẽã yi maʉ̃ oira mejãcha bedʼea ẽ baibara jʉ̃drʉbʉrʉdeba, mawũã iya bia jara ũrĩbimarẽã iya bedʼea jara ũrĩbikĩrãbʉta akʉza ẽbẽrarãbida juwa ʉ̃ta wuadamarẽã.

16. Ãba yi jʉrebarimae Daizeze Bedʼeadebema libro akʉita (30 minuto). Naʉ̃ra zõrãrã bia jaradiabʉba obʉ (kongregasione zõrãrã mejãcha neẽbʉrʉ, zõrãrã kʼarebabariba bia jaradiabʉba oseabʉ). Zõrãrã kongregasion aba abakadebemaba jaraibara kʼaiba bia jaradiabʉta maʉ̃ oira. Mebẽã naʉ̃ bia jara ũrĩbibʉra berabarikara 30 minuto jaradapeadata, ũdubibara testora audre yibiata, adewara kʼarebaibara yi ũrĩpanʉraba odamarẽã Daizeze Bedʼeaba jarabʉta. Yi naʉ̃ oiba ũduseabʉ ũrãgʼara sãwũã widi ʉ̃rʉ akʉza sãwũã panʉi ʉ̃rʉ (w23.04 pag. 24, rekuadro). Semanaza mebẽrãba awuara awuaraka oyi. Mebẽã nãã bedʼeabʉba 30 minuto eda omarẽã jarara parrapo jõma leita nesida ẽ mawũã ẽ bʉrʉ iya krĩchaseabʉ sãwũã oita.

JÕITA

17. 3 minuto. Mebẽã nãã bedʼeabʉba kĩrãbebiyi ãba yi jʉrebʉmae kʼawuadapeadata, bedʼeadaya kʼãrẽta kʼawuadaita wuarebema semanane. Ewarita erbʉbʉrʉ jaraseabʉ kʼaiba oita diskursora wuarebema semanane. Karta lebʉrʉde akʉza bedʼea jara ũrĩbibʉrʉde jaraibara jõi naweda. Kʼãrẽ ewaride jaradia wãita akʉza kʼairaba Daizeze Nokʼo ʉ̃rʉ bedʼeabaride sʉgʉita, maʉ̃ra karadayi tablerode. Karta leita akʉza bedʼea jara ũrĩbita ewariba dia ẽ bʉrʉ, jaraibara mebẽã bedʼeabʉa iya bedʼeabʉrʉde minuto audre eda omarẽã (akʉra parrapo 16 akʉza 19). Ãba yi jʉrebʉ jõita trãnañi akʉza yiwidʼidayi.

BEDʼEA SO ZAREA DIAITA AKɄZA ŨRÃGʼAITA

18. Asignasion jõna tẽã mebẽã nãã bedʼeabʉbara bia osita jarayi adewara ũrãgʼayi Jaradiaita kartadeba. Asignasion jõbʉrʉde mebẽã nãã bedʼeabʉba jarayi kʼãrẽ lesione onʉmasita maʉ̃ ẽbẽraba, adewara jarayi kʼãrẽa bia osita mawũã ẽ bʉrʉ kʼãrẽa audre bia oibarata. Ãba yi jʉrebʉ jõbʉrʉde ũrãgʼa diaseabʉ, maʉ̃ oita zokʼaseabʉ maʉ̃ra kartara: Kãgara ẽbẽrarã, Jaradiata akʉza Benefíciese. Lesion iya oibadadebema ʉ̃rʉ, mawũã ẽ bʉrʉ awuru lesionta (parrapora 19, 24, akʉza 25de jarabʉ kʼãrẽta odaibarata mebẽã nãã bedʼeabʉba akʉza zõrãrã ũrãgʼa diabariba).

EWARI

19. Diskurso baduta (mebẽã nãã bedʼeabʉsida) berabarikara yi minuto jaradapeadata, Karta nek’awuabariba jarabʉ kʼãrẽ ũmadaʉ awabayeda bedʼeaseabʉta. Bʉa jaraibadata jõma jarasibʉrʉ mawũãsidu ewari erbʉbʉrʉ bedʼeaita, eda bʉerãra bedʼeata. Mebẽãta iyi bedʼeabʉde ewarita berabarira, zõrãrã ũrãgʼa diabarita tẽã junea iyiʉ̃me bedʼeayi (akʉra parrapora 24 akʉza 25). Ãba yi jʉrebarita, trãbita yiwidʼiʉ̃me, maʉ̃ra odaibara 1:45 minutode.

KONGREGASIONʼRA ZÕRÃRÃ AKɄ ZEBARI

20. Kongregasionʼra zõrãrã akʉbari zebʉrʉde, Karta nekʼawuabariba jarabʉ kĩrãkʼa odayi, mamina jõma iyabaʉ oda ẽ bayi. «Ãba yi jʉrebarimae Daizeze Bedʼeadebema libro akʉita» oi kaude, Kongregasionʼra akʉbari zõrãrãba ũdubiyi diskursota 30 minutobʉta. Maʉ̃ diskurso jʉ̃drʉi naweda mebẽã nãã bedʼeabʉba kĩrãbebiyi kʼãrẽ kʼawuadata adewara jarayi kʼãrẽ ʉ̃rʉ kʼawuadaita wuarebema semanane. Bedʼea jara ũrĩbiyi, karta leibarabʉrʉ le ũrĩbiyi, adewara jarayi Kongregasionʼra akʉbari zõrãrãba oita diskursora. Kongregasionʼra akʉbari zõrãrãba diskurso oda tẽã naʉ̃ra jõñi trãbi iya jʉrʉdadeba akʉza jaraseabʉ awuru mebẽã yiwidʼimarẽã. Maʉ̃ semananera oẽbayi ãba yi jʉrebari zakera. Ʉ̃kʉrʉ ẽbẽrarãta awuru bedʼeade ãba yi jʉrepanʉta Daizeze Bedʼea kʼawuaita, ãba yi jʉredayi ãyi bedʼeade ũrĩta, mamina Kongregasionʼra akʉbari zõrãrãba diskurso diabʉrʉde ãba yi jʉredayi wuabemarabawara maʉ̃ diskurso ũrĩta.

ASAMBLEA SEMANANE

21. Asamblea semananera kongregasionʼra ãba yi jʉreda ẽ bayi. Mamina kĩrãbebidua mebẽrã ãya deda akʉseabʉta ãba yi jʉrebarimae akʉibadata, dobabʉrabida akʉseabʉ maʉ̃ra.

JESU BEIDA JẼDA KĨRÃBEITA SEMANANE

22. Jesu beida jẽda kĩrãbeita semanane baera ãba yi jʉreda ẽ bayi.

ZÕRÃRÃ ÃBA YI JɄREBARI BʼAITA KRISTIANORA KĨRÃKʼA AKɄZA TRAJAITA DAIZEZEITA AKɄBARI

23. Zõrãrã kongregasione biobʉdera, iyita jidasida maʉ̃ oita. Iyara akʉibara ãba yi jʉrebʉrʉde jõma daucha odamarẽã. Adewara bedʼeaibara zõrãrã ũrãgʼa diabariʉ̃me. Karta nekʼawuabari yiwidi ʉ̃tʉ zebʉrʉdera jʉrʉbʉ kʼaiba oita asignasionʼra jõma jedeko ũmebayeda. Asignasionʼra Ora bʉa Daizeze Bedʼea jaradiabʉrʉde eda bʉra akʉza leita, iya jʉrʉseabʉ kʼaiba oita. Mamina wuabema asignasionʼra kʼaiba oi jʉrʉi naena zõrãrã kongregasionebemaba kʼawua jarayi kʼaiba oseabʉta (akʉra parrapora 3-16 akʉza 24). Diskurso diai nãã krĩchaibara mebẽãba oseabʉ kʼawuaita, mebẽã sõbe poagabʉta akʉza iya jarai ʉ̃rʉ kʼãrẽaba ũdukʼawuabʉta. Maʉ̃ awuara asignasion diabʉrʉde, maʉ̃ ʉ̃rʉ krĩchaibara. Maʉ̃ asignasionʼra diaibara semana ũbea bʼai naweda. Zokʼaibara pormulario Bʼaita Kristianora kĩrãkʼa akʉza Trajaita Daizezeita kʼãrẽ oita (S-89-S), mebẽrã asignasion diabʉdade. Akʉza akʉibara tablerode edabʉ kʼawuaita. Zõrãrãbara jʉrʉseabʉ awuru zõrãrãta mawũã ẽ bʉrʉ zõrãrã kʼarebabarita kʼarebamarẽã maʉ̃ oita. Mamina mawũãsidu ʉ̃kʉrʉ asignasionʼra zõrãrãbʉrʉ jarabʉ kʼaiba oita.

MEBẼÃ NÃÃ BEDʼEABɄTA ÃBA YI JɄREBARI BʼAITA KRISTIANORA KĨRÃKʼA AKɄZA TRAJAITA DAIZEZEITA

24. Semanaza zõrãrã aba nãã bedʼeayi ãba yi jʉrebari Bʼaita Kristianora kĩrãkʼa akʉza Trajaita Daizezeita (kongregasione zõrãrã mejãcha neẽbʉrʉ, zõrãrã kʼarebabariba bia jaradiabʉba zokʼaseabʉ). Naʉ̃ mebẽãbara biʼia krĩchaibara kʼãrẽta jaraita ãba jʉrebari jʉ̃drʉita akʉza jõbʉrʉde. Mebẽã nãã bedʼeabʉbara jaraibara kʼairaba diaita asignasionʼra akʉza asignasion jõbʉrʉza wika bedʼeaibara, mamina zõrãrã bio neẽbʉrʉ iya jara ũrĩbibara ʉ̃kʉrʉ asignasionʹra. Zõrãrã kongregasionebemabara jaradayi kʼai bʼaita yi nãã bedʼeaseabʉra. Zõrãrã abaʉba bia jaradiaseabʉbʉrʉ «Ãba yi jʉrebarimae Daizeze Bedʼeadebema libro akʉita», mawũãra iyira nãã bedʼeaseabʉ. Adewara kĩrãbedaibara iyara ũrãgʼa diaibarata ibiade yi nejaradiapanʉra. Akʉza biʼia akʉibara ãba yi jʉrebʉra iyi ewaride jõmarẽã (akʉra parrapora 17 akʉza 19). Mebẽã nãã bedʼeabʉta awuru mikropononeba bedʼeaseabʉ platapormaneba, adewara jewedaseabʉ platapormane nejaradiabari bedʼeanʉmʉena.

ZÕRÃRÃ ŨRÃGʼA DIABARI

25. Maʉ̃ra zõrãrãbara biʼia jaradia kʼawuabaibara. Zõrãrãba akʉza zõrãrã kʼarebabariba diskʉrso diapanʉraba, adewara Jarakabʉ jaradiapanʉraba, «Ãba yi jʉrebarimae Daizeze Bedʼeadebema libro akʉita» akʉza yi lepanʉraba, nesidabʉbʉrʉ ũrãgʼata iyara ũrãgʼayi (akʉra parrapo 19). Poagaza awuru zõrãrãta jʉrʉseabʉ maʉ̃ oita. Iyara nesida ẽ asignasion diabʉrʉza ũrãgʼa diaita.

ÃBA YI JɄREBARI ZAKETA

26. Kongregasione nejaradiabarirata mejãchabʉbʉrʉ, ãba yi jʉrebari zakera oseapanʉ. Ãba yi jʉrebari zakedera ũrãgʼa diaseabʉ zõrãrãba mawũã ẽ bʉrʉ zõrãrã kʼarebabariba. Zõrãrã kongregasionebemaba jarayi kʼairaba oseabʉta maʉ̃ra, adewara ãba yi jʉrebʉrʉza zõrãrã awuara awuarakaʉba oyi. Yi ũrãgʼabaribara oibara parrapo 18ba jarabʉde. Maʉ̃ra asignasion jõna tẽã jẽda zeibara ãba yi jʉrebari zromaena.

BIDEORA

27. Ãba yi jʉrebʉmae semanane akʉdayi ʉ̃kʉrʉ bideorata JW Library® chubeta.

S-38-EMB 11/23