BEDʼEA YI NÃÃRABEMATA | SEWA NEBɄRABARA DAIZEZEDEBA JĨGABABIBɄ
¿Zareka Daizeze kãga ũdubi zeira?
«‹Kãgara Jeowara jõma bʉ soiduba, jõma bʉ kakuaiduba akʉza jõma bʉ krĩchaiduba›. Naʉ̃ta yi nããbema zokʼadapeadara akʉza yi audre yibiara» (Jesukristo, poaga 33).a
Ʉ̃kʉrʉitara zare Daizeze kãgabʉ ũdubi zeira, krĩchapanʉ baera iyi ũdukʼawuaira zareata, ẽbẽra kayirua baera akʉza jĩgarabʉ baera. Akʉra ʉ̃kʉrʉba kʼãrẽta jarabʉta:
«Mʉ̃a Daizezeʼa yiwidʼibasimina krĩchabasi iyira mʉ̃neba jĩgarabʉta. Krĩchabasi neẽãta akʉza kãga ũdubi ẽãta» (Marco, Italia.)
«Mʉ̃a okĩrãbasi Daizezeba jarabʉta, mamina mʉ̃a krĩchabasi iya jarabʉra zareata oira. Krĩchabasi Daizezera jipa ẽbẽra kayiruata akʉza ẽbẽrarãta zʉbʉriabibʉta. Mʉ̃a krĩcha ẽ basi iya nebia erbʉra» (Rosa, Guatemala.)
«Wũãwũãrainʉba krĩchasi Daizezebara dayirã nemitiatrʉ akʉbʉta dayirã zʉbʉria oita. Tẽã krĩcha jʉ̃drʉsi iyira jĩgarabʉta dayirãneba, adewara krĩchasi iyira jari nokʼo ẽbẽrarã krĩcha ẽ kĩrãkʼabʉta» (Raimunda, Canadá.)
¿Bʉara abarika krĩchabʉka? ¿Zareka Daizeze kʼawa bʼaira? Mejãchaʉba abarika krĩcha zebʉda Daizeze ʉ̃rʉ. Edad Mediade ẽbẽrarã mejãchaʉba Daizezeʼara yiwidʼida ẽ basi ¿kʼãrẽa? Perapanasi baera. Ẽbẽra nebʉrabari Will Durantba naʉ̃ta jarasi: «Ẽbẽra abaʉta jipa nekayirua omiabasibʉrʉ, ¿sãwũã yiwidʼiseabasi Daizeze kayiruara akʉza jĩgarabasibʉrʉ?».
¿Kʼãrẽa ẽbẽrarãra mawũã krĩchapanʉ Daizeze ʉ̃rʉra? ¿Kʼãrẽta jarabʉ Daizeze Bedʼeabara? ¿Zare ẽ baika kãga ũdubita Daizezeʼa iyi ʉ̃rʉ wãrĩnuta ũdukʼawuabʉrʉbʉrʉ?