Sãwũã zokʼaita, Yiza sãwũã bedʼea kʼawuaita

Yiza sãwũã bedʼea kʼawuaita maʉ̃ra enero 2018deba ʉ̃tʉzesi Karta nekʼawuabari Bʼaita Kristianora kĩrãkʼa akʉza Trajaita Daizezeita. ¿Maʉ̃ra sãwũã zokʼaseapanʉ?

Diadapeadata yi kʼawuabarira. Bedʼea widibʉta zokʼaibara adewara yi testota akʉza bedʼea jẽda panʉita widibʉsida. Mamina bideode jarabʉ kĩrãkʼa abarika jaraita nesida ẽ. Maʉ̃ba bʉara awuara jaradiaseabʉ, ẽbẽraba kʼãrẽ obʉra ewariza awuarabʉ baera, maʉ̃ kʼarea yi nãã bedʼea jʉ̃drʉisida awuara jaraseabʉ. Adewara diara karta aba nekʼãrẽ jaradiabaridebemata, mawũã omarẽã jarada ẽ mina.

Daizeze bedʼea jaradiaita. Yiza sãwũã bedʼea kʼawuaita, maʉ̃ra yibia dayirã ũrãgʼa biata diabʉ baera Daizeze bedʼea biʼia jaradiaita. Ẽbẽra abaʉba audre kʼawua kĩrãbʉbʉrʉ Daizeze ʉ̃rʉ, iyaʼa audre jaradiaseabʉ akʉza tẽã jaradiaibadata jaradiaseabʉ. Jaradiaseabʉ dayirã jarada kĩrãkʼa mawũã ẽ bʉrʉ awuara jaradiasaeabʉ. ¿Dayirãba jaradiabʉmaera audre yibiaka jedeko berabaridadebemata jaradiaita mawũã ẽ bʉrʉ awuru testo ʉ̃rʉ? ¿Bʉ bʉmaera nekʼãrẽta berabarisika ẽbẽraba ũrĩkĩrãbʉta? Yiza sãwũã bedʼea kʼawuaita zokʼaseabʉ mʉ̃yimabʉde, mamina kĩrãduakara naʉ̃ta «nekʼãrẽ jõma obʉ bedʼea bia kʼarea, maʉ̃neba nebia ũduita wuabemarabawara» (1Co 9:22, 23).