«Ẽbẽra biata» ũdubira bʉa kʼãrẽ jarabʉdeba akʉza bʉa kʼãrẽ obʉdeba

«MEBẼRÃBA bia edadaba mʉ̃ so tõbarisi». Naʉ̃ta jarasi mebẽã Lisaba.a Maʉ̃ kĩrãkʼa krĩchabʉ mebẽã Anneba, iya jarasi: «Mʉ̃itara audre yibiabasi mebẽrãba sãwũã edadapeadata ãya mʉ̃a kʼãrẽ jaradapeadaira». Idi ewadera naʉ̃ra mebẽãrabara Daizeze Bedʼea akʉbʉmina akʉza maʉ̃ ʉ̃rʉ krĩchabʉmina, mebẽrãba sãwũã edadaba audre kʼarebasi Daizeze orraira.

¿Sãwũã tõbariseapanʉ ẽbẽrarã sora dayirãba ãyi bia edabʉdadeba? Maʉ̃ ũdubira nekʼãrẽ ũmeneba oseapanʉ, dayirãba jarabʉdeba akʉza obʉdeba. Atia maʉ̃ta kʼawuadayi, adewara kʼawuadayi kʼairata bia edaibarata.

BIA EDABɄTA ŨDUBIRA BɄA JARABɄDEBA

Proverbios 31ne bedʼeabʉ yuwẽrã kima bia ʉ̃rʉ, jarabʉ «iya jarabʉdeba ũdubibʉ ẽbẽra biata» (Prov. 31:26). Iya naʉ̃ta ũdubibʉ kʼãrẽ jarabʉdeba akʉza sãwũã jarabʉdeba. Yibarirabida abarika oibara, yibarirabara kʼawuapanʉ ãyi wũãwũãra kĩrʉ bedʼeara sopʉabiseabʉta. Yibariraba ãyi wũãwũãra ibiade akʉza sobiade bedʼea ẽ bʉrʉ ũrĩkĩrãna ẽ bayi ãyi bedʼeara, mamina ãyi bedʼeabʉdeba kãgata ũdubipanʉbʉrʉ, ãyi wũãwũãraita zare ẽ bayi ũrĩta ãya jarabʉra.

Dayirã wũãwũã barabʉta mawũã ẽ bʉrʉ wũãwũã neẽmina, ¿kʼãrẽta oseapanʉ dayirãba jarabʉdeba wuabemara bia edadaita? Proverbios 31:26de jarabʉ kʼãrẽta oseapanʉta, jarabʉ: «Burubiata ũdubibʉ iya jarabʉdeba». Maʉ̃ oira, bedʼeai nãã krĩchaibara kʼãrẽta jaraita akʉza sãwũã jaraita. Bʉta ẽbẽra abaʉ̃me bedʼeabʉde ababemata bedʼeakaitadogobʉrʉ, bʉyikʉza widiseabʉ: «¿Mʉ̃a jaraibara iyira audre kĩrʉbika, mawũã ẽ bʉrʉ aduʼa babika?» (Prov 15:1). Dayirãta buru biabʉrʉ bedʼeai nãã, nãã krĩchayi kʼãrẽta jaraita.

Awuru proverbioba jarabʉ: «Biʼia krĩcha ẽã bedʼeabʉba kõbʉ espadade kĩrãkʼa» (Prov. 12:18). Dayirã awuruʉ̃me bedʼeabʉrʉde krĩchabʉbʉrʉ daya jarabʉba awuru sãwũã sentibita, naʉ̃ba kʼarebayi jʉra kʼawua bʼaita bedʼeabʉrʉde. Dayirã ẽbẽra biata ũdubikĩrãpanʉbʉrʉ ikayirua jara ẽ bayi akʉza kĩrʉ bedʼea ẽ bayi (Efes. 4:31, 32). Awuarabʉrʉ krĩcha biata erpanañi akʉza ibia bedʼeadayi. Jeowaba yiza biata diabʉ. Elías perabaside, Jeowara angeldeba ibiade bedʼeasi iyaʼa so zarea diaita (1 Rey. 19:12). Dayi ẽbẽra biarabari daya kʼãrẽ jarabʉdeba ũdubibʉ ẽ, awuarabʉrʉ daya obʉdebida ũdubibara, atia akʉdayi sãwũã ũdubita.

DAYA OBɄBA KʼÃRẼBASEABɄ WUABEMARATA

Jeowade kĩrãkʼa oibara jarakĩrãkʉ ibia bedʼeaita akʉza wuabemarata bia edaita (Efes. 4:32; 5:1, 2). Lisa, nãã bedʼeadaba, ũdusi sãwũã Jeowa ʉ̃rʉ Kʼawuabipanʉrãba wuabemara bia edapanʉta, iya jarabʉ: «Mʉ̃ mebẽrãbawara awuru deda wãi barabaside, juwa jidapanʉra ũme Jeowa ʉ̃rʉ Kʼawuabipanʉrãba permiso widisida ãyi trajode, mawũã mʉ̃ netata kʼareba edeita awuru deda, maʉ̃ ewadera mʉ̃a waidide Daizeze Bedʼea ʉ̃rʉ kʼawua ba ẽ basi». Maʉ̃ mebẽrãba mawũã edadaba kʼarebasi Lisara Daizeze ʉ̃rʉ kʼawuakĩrãita.

Annebida ũdusi sãwũã Jeowa ʉ̃rʉ Kʼawuabipanʉrãba wuabemara bia edabʉta, iya jarasi: «Naʉ̃ drʉade kayiruata mejãchabʉ baera mʉ̃ara ẽbẽrarã ʉ̃rʉ aña krĩchabasi, maʉ̃ba mʉ̃a Jeowa ʉ̃rʉ Kʼawuabipanʉrã ũdukʼawuaside ĩjã ẽ basi ãya ẽbẽrarã wãrĩnu bia edakĩrãpanʉta. Mʉ̃ nejaradiabariba ũdubisi wãrĩnu wuabemara bia edakĩrãbʉta, naʉ̃ba kʼarebasi awurura ʉ̃rʉ bia krĩchaita, mõbe iya mʉ̃a jaradiabʉrʉde maʉ̃ ʉ̃rʉ krĩchaita».

Atia kʼawuatabeda Jeowa ʉ̃rʉ Kʼawuabipanʉrãba wuabemara bia edabʉba kʼarebasita naʉ̃ra ẽbẽra so tõbarita akʉza naʉ̃ba kʼarebasi ãya audre kʼawuakĩrãita Daizeze Bedʼea ʉ̃rʉ.

JEOWADE KĨRÃKʼA WUABEMARA BIA EDADAIBARA

Edaʉde ʉ̃kʉrʉitara zare ẽ ipidaita akʉza awurura ibia bedʼeaita ãyi kulturata akʉza ãyita mawũã baera, mamina maʉ̃ kʼarea mawũã panʉbʉrʉ Daizezede kĩrãkʼa opanʉ ẽ (naʉ̃ testoʉ̃me akʉra Hechos 28:2).

Ẽbẽra biata neta jauredebema (Gál. 5:22, 23). Dayirãba Jeowade kĩrãkʼa akʉza Jesude kĩrãkʼa naʉ̃ nebiata ũdubikĩrãpanʉbʉrʉ jʉrʉibara Daizeze jaure zareata. Dayirãra Jesu kʼaidubema baera ũdubikĩrãpanʉ wuabemara wãrĩnu bia edakĩrãpanʉta, ẽbẽrarãta kãga baera akʉza Jeowata. Dayirãba wuabemara bia edabʉrʉde akʉza ibia bedʼeabʉrʉde, naʉ̃bara Jeowata mejãcha sobiabibʉ.

¿KʼAIRATA BIA EDADAIBARA?

Dayirãitara zare ẽ bia edadaita yi dayirã bia edapanʉrãra akʉza dayirãba ũdukʼawuabʉrãra (2 Sam. 2:6). Akʉza ãya dayirãra bia edapanʉ baera biga diakĩrãpanʉ (Col. 3:15). ¿Kʼãrẽta oseapanʉ dayirãita zareabʉbʉrʉ ẽbẽra aba bia edaita?

Krĩchaseapanʉ naʉ̃ta: Jeowabara bia edabʉ ẽbẽra kayiruarasida. Daizeze Bedʼeabara bedʼea biata jaradiabʉ maʉ̃ ʉ̃rʉ. Escrituras Griegas Cristianas bio zokʼabʉ bedʼea Daizezeba iyi biaba so zʉbʉria akʉbʉ. ¿Daizezebara sãwũã ũdubibʉ maʉ̃ nebiara?

Krĩchadadrʉ Jeowaba sãwũã ẽbẽrarã mejãcha kʼareba zebʉrʉta ãyi zokʼai panamarẽã (Mat. 5:45). Akʉza dayirãba Jeowa ũdukʼawuai naweda iya iyi biaba so zʉbʉria ũdubisi dayirãra (Efes. 2:4, 5, 8). Bari jaraita, ẽbẽrarã jõmaʉ̃ kʼarea diasi: yi Warra abapaibʉta. Pabloba jarasi dayirã nebiata ũduseapanʉta Jesu beidadeba «iyi biaba so zʉbʉria akʉbʉra mejãcha baera» (Efes. 1:7). Adewara dayirã nekayirua omiamina akʉza Jeowa sopʉabibʉmina iya dayirãra idubʉ ẽ. Nebia iya jaradiabʉra ewerka tẽã ewari kʉrãdrʉbʉ kĩrãkʼabʉ (Deut. 32:2). Wãrĩnu bʼaira dayirãbara jẽda diabeda ẽ iya dayirã dia zebʉrʉra, adewara dayirã aranʉ bʼai nebia ũduira Jeowaba iyi biaba so zʉbʉria akʉbʉ baera ũdudayi (naʉ̃ testoʉ̃me akʉra 1 Pedro 1:13).

Dayirãba ũdubʉdade Jeowaba iyi biaba so zʉbʉria akʉbʉta dayirãra naʉ̃ba audre iyi kʼawa babibʉ. Maʉ̃ba bari ẽbẽra daya kãgatrʉ bia eda ẽ baibara, awuarabʉrʉ zarea odaibara ẽbẽra jõmaʉ̃ta bia edaita Jeowade kĩrãkʼa (1 Tes. 5:15). Dayirãba ewari jõmaʉ̃nẽ ẽbẽrarãta bia edapanʉbʉrʉ ewari kʉrãzabʉde pʉreaba jʉ̃wʉrʉabari kĩrãkʼa bayi. Dayirã mebẽrãrata, dayirã mebẽrã kongregasionebemata, dayirã kopaerora kolegiodebemata akʉza trajodebemarata, adewara dayirã de kʼawa panʉrãra dayirã kʼawa bakĩrãpanañi.

¿Bʉ mebẽrãne akʉza bʉ kongregasione bʉka ẽbẽrarã nesidabʉta bʉ kʼarebata bʉa ibia bedʼeaita akʉza bʉa ãyi bia edaita? Bari jaraita, bʉbaibara mebẽrã bʉ kʼareba nesidabʉta, iyi de akʉide, ne eda wãine kʼarebaita, mawũã ẽ bʉrʉ aña wãine kʼareba edemarẽã. Jaradia wãbʉrʉdera, ¿sãwũã ũdubiseapanʉ dayirãbara ẽbẽrarãra bia edapanʉta? Kʼarebapanʉne yi kʼareba nesidapanʉrata.

Jeowade kĩrãkʼa odadrʉ, dayirãba jarabʉdeba akʉza dayirãba obʉdeba ũdubidadrʉ «ẽbẽrã biata».